Аравдугаар сарын 7,8-ны өдрүүдэд Монголын халдварт өвчин судлалын багш, эмч нар нэг дор чуулж байна. Энэ үеэр бид АШУҮИС-ын ахмад багш, Анагаах ухааны профессор Я.Дагвадоржтой хэсэг хөөрөлдлөө. 

Тэрбээр, Олон тэгш ой давхацсан энэ өдөр манай халдвартын үе үеийн эмч нар чуулга уулзалтаа зохион байгууллаа. Дэлхий дахин коронавируст цар тахалтай тэмцсэн хүнд үед манай улс хамгийн сайн ажилласан, тэмцсэн улсуудын нэг. Үүний тэргүүн шугамд ажилласан халдвартын эмч, ажилчдаараа бахархаж байна. Энэ бол манай тэнхимийн үйл ажиллагааны нэгэн хэмжүүр гэж харлаа.

Халдварт өвчин бол амьд байгалийг дагаж явдаг өвчин. Тиймээс амьд байгаль байгаа цагт бүрмөсөн устаж үгүй болно гэж байхгүй, үе үе гарна. Үүнтэй соргог тэмцэж байх ёстой.

Халдварт өвчин ямар аюултай болохыг өнгөрсөн цар тахал дэлхий нийтэд харуулсан. Өнөөдөр ийнхүү халдвартын эмч, багш нар чуулснаар цаашид ямар халдвар дэгдэх, ямар арга хэмжээ авч ажиллах талаар ярилцах боломж олдлоо. Өнгөрсөн хоёр жилийн хугацаанд анагаахын салбарт маш том туршлага болсон. Бид үүнийг дүгнэх ёстой" гэв.

Т.Мөнхжаргал