"Чингис хаан" хаад язгууртны музейн нээлт болж байна. Энэ үеэр тус музейн захирал С.Чулуун ёслолыг нээж үг хэллээ. 

Тэрбээр "Монголын уудам тал нутагт мэндэлсэн талын баатрын хөвгүүн хүнд бэрхийг туулан ертөнцийг товхинуулж, амар амгаланг энхжүүлэн ёс төрийн голомтыг бадрааж өнө мөнхөд орших агуу түүхийг бүтээж хүмүүн төрөлхтөнд оньсого мэт нууцлаг, уул мэт сүрлэг, мөрөн мэт хүчирхэг амьдарсан хүмүүнийг Чингис хаан хэмээн дэлхий хүндлэн биширдэг.

Тэрбээр эртний түүхийн хэлхээг түүчээлж энгүй хүчирхэг эзэнт улсыг байгуулж энх мөнхөд үлдэх удам хойчдоо шүтэгдэж, төрийн ёс, цэргийн ёсны эрдэмд төгс боловсорсон хаадын хаан, мянган жилд ганц мэндлэх суу билэгт хүмүүн билээ. Их эзэн хааныхаа суу алдрыг бахархан дурсаж, сурталчлан таниулж, бишрэн дээдлэх соён гэгээрлийн их өргөөний нээлтэд хуран цугларсанд баяртай байна. “Чингис хаан” музей нь Монголчуудын анхны төрт улс, Хүннүгээс эхлэн их эзэн хаадын байгуулж хоёр зууныг эрхшээсэн хүчирхэг эзэнт гүрэн, эвлэрэл хагарал, эрхшээл, бэрхшээлийг туулж эцэг өвгөдийн үлдээсэн улс Монголоо эрхэмлэн 20 дугаар зууны эхэн үед цөхрөлтгүй тэмцэл, уйгагүй зүтгэл цуцашгүй итгэлийн хүрээнд боломжгүйг давж туурга тусгаар эртний түүхт энэ улсын минь үлдээж өгсөн эрин үеийн бүхий л хаад язгууртны бүрэн түүхийг тольдон үзүүлнэ.

“Чингис хаан” музей нь Монголын төрөөс нийгэм соёлын салбарт сүүлийн 30 жилд хийсэн хамгийн том бүтээн байгуулалт юм. Монгол залуусын хүсэл тэмүүллийн үр дүнд Ази тивийн эхний аравт багтах хэмжээтэй, их үзмэрийнхээ эзлэх хуваарь тэргүүлж, аюулгүй байдал, сан хөмрөг хадгалалт хамгаалалтын орчин үеийн шийдэл бүхий нүүдлийн иргэншлийг цогцоор нь харуулж чадах музей хэмээх, шинжлэх ухаан, соёлын ордонтой боллоо." хэмээв.

М.Сүхэхэй