XVII жарны Усан хэмээх туулай жилийн адаг сар дундаа орж, удахгүй Монголчуудын уламжлалт Цагаан сарын баяр болно. Жил бүхний зааг дээр онцлох үйл явдлууд, осол эндэгдэл гарах нь ёс мэт санагдана. Удахгүй эхлэх ЛУУ жилийн өмнөхөн улс даяар гал түймэр гарч, дэлбэрэлт болж, ганц биш олон хүний амь үгүйрэв.
Өнгөрсөн мягмар гаргийн шөнө Баянзүрх дүүргийн 26 дугаар хороо, бидний мэдэхээр Дүнжингарав худалдааны төвийн урд зам дээр ноцтой осол гарсны улмаас 60 тонн газ тээвэрлэж явсан автомашин дэлбэрч, онцгой байдлын албаны гурван аврагч, цөөнгүй жирийн иргэд амь үрэгдээд байна. Улс даяар цочролд оруулж, зүрх эмтрээсэн уг үйл явдлын ард буруутанг хайх үйл ажиллагаа явагдаж, осолтой холбогдуулан хоёр жолоочийг саатуулсан юм.
Үүний өчигдөр буюу лхагва гаргийн 21 цагийн орчимд Баянзүрх дүүргийн 23 дугаар хороонд айлын байшин шатсан ноцтой түймэр болов. Азаар хүний амь эрсдээгүй. Албаныхан галыг унтраасан байна. Мөн урд шөнө Дорноговь аймгийн төвд гал гарчээ. Гэвч тэр тухай тодорхой мэдээлэл байхгүй байна.
Оны өмнөхөн буюу 12 дугаар сарын 25-нд Баянгол дүүргийн тавдугаар хороонд байрлах “Улаанбаатар гурил” ХХК гурилын үйлдвэрийн агуулах өнөөдөр өглөөний 06:38 цагт гал гарч, шатсан. Чингэлтэй дүүргийн Онцгой байдлын хэлтсийн Гал түймэр унтраах, аврах 10 дугаар анги, Баянгол дүүргийн Онцгой байдлын хэлтсийн Гал түймэр унтраах, аврах 18 дугаар анги, Сонгинохайрхан дүүргийн Онцгой байдлын хэлтсийн Гал түймэр унтраах, аврах 26 дугаар ангийн алба хаагчид ажиллаж, гал түймрийн тархалтыг өглөөний 07:30 цагт бүрэн унтраасан юм.
"Ойр ойрхон олон гал гарч, яг л луу жил хоншоороо цухуйлгахаасаа өмнө галаараа тургин довтлох шиг санагдав. "
Өнгөрсөн ТУУЛАЙ жил дардан байсангүй. Зундаа хур тунадас элбэг орж, хэн хүнгүй урсаад арилчихалгүй намартай золгосон. Ямар сайндаа л хүмүүс "Бороо, бороо ороосой" хэмээн дуулсан реппер GINJIN, Mrs M нарыг наргиа болгон буруутгах вэ дээ.
Долдугаар сарын дундуур буусан үер цаашлаад наймдугаар сарын эхээр болсон үер олон ч хүний сэтгэлд хар дурсамж бүтээсэн. Тодруулбал, наймдугаар сарын 05-нд Ялангуяа Дарь-Эхээс цааш Цагаан давааны орчимд богино хугацаанд орсон усархаг борооны улмаас үер бууж, олон зуун хашаа, байшин, автомашин сүйдсэн. Мөн л нэлээдгүй хүний амь үгүйрсэн билээ.
Усан хэмээгдсэн ТУУЛАЙ жилийн өдөр хоногууд ийнхүү хурдан, бас үер шиг ширүүхэн өнгөрлөө. Асуудалтай хотын засаг дарга шил шилээ даран гарч ирдэг ч асуудалдаа шанаадуулсаар адагт нь өөр албан тушаалын зүг явдаг даа...
Л.Сайнаа
