Грекийн нийслэл Афин хотод амьдарч байсан Шотландын иргэн, хүмүүнлэгийн ажилтан 38 настай Элизабет Жейн Россын үхэл олон улсын анхаарлыг татсан хэрэг болоод байна. Түүний цогцос Афины нэгэн орхигдсон барилгаас чемоданд хийсэн байдалтай олджээ. Росс Грект дүрвэгсэд болон эмзэг бүлгийн хүмүүст туслах чиглэлээр ажилладаг төрийн бус байгууллагуудтай хамтран ажилладаг байсан. 

Тэрээр зургадугаар сарын 26-нд Шотландын Эдинбург хотоос Грект ирж, эхэндээ Афины ойролцоох Керацини дүүрэгт танилуудынхаа гэрт байрлаж байжээ. Харин долдугаар сарын 15-нд Афины Кипсели дүүрэгт байдаг америк найзууд дээрээ очихоор гараад сураггүй алга болсон байна.

Долдугаар сарын 18-нд Кипсели дүүргийн орхигдсон барилгаас түүний цогцсыг нэгэн хүн олж, цагдаад мэдэгджээ. Цогцос чемоданд удсан байсан тул яг үхлийн шалтгааныг тогтоох боломжгүй байсан. Шинжээчид хор судлалын болон бусад лабораторийн дүгнэлтийг хүлээж байгаа юм.

Хэрэгт холбоотойгоор Афганистаны мэргэжлийн боксчин 26 настай Шариф Ахмадзайг баривчилж, хүн амины хэрэг, дээрэм болон зэвсгийн холбогдох зүйл ангиар яллагдагчаар татжээ. Тэрээр Россын банкны картыг ашигласан, цогцсыг зөөсөн гэдгээ хүлээн зөвшөөрсөн ч хөнөөсөн гэдэг дээр үгүйсгэж байгаа аж. Мөрдөн шалгах ажиллагааны явцад Россын гар утсыг түүнийг алга болсны дараа ч ашигласан байж болзошгүй нөхцөл илэрсэн байна. Цагдаа нар хэн нэгэн түүний нэрээр мессеж илгээж, гэр бүлийг нь эрэл хайгуул эхлүүлэхээс төөрөгдүүлэхийг оролдсон байж магадгүй гэж үзэж байна.

Россын гэр бүлийнхэн түүнийг “сайхан сэтгэлтэй, үнэнч, өөрийгөө бусдын төлөө зориулсан хүн” байсан хэмээн дурсаж, түүний амьдралын гол зорилго нь тусламж хэрэгтэй хүмүүст хүрэх явдал байсан гэжээ.

Грекийн эрх баригчид энэ хэргийг үргэлжлүүлэн шалгаж байгаа бөгөөд Их Британийн хууль сахиулах байгууллагуудтай хамтран ажиллаж байна. Одоогоор Россын үхлийн яг шалтгаан болон хэргийн сэдэл бүрэн тогтоогдоогүй байна.

Л.Баяр