Өнөөдөр 17:00 цагт П.И.Чайковский алдарт "ХУНТ НУУР" балетыг УДБЭТ-т тоглох гэж байна. П.И.Чайковский үзэсгэлэнт гүнж Одетта-ын тухай Германы эртний нэгэн домгоос сэдэвлэн Хунт нуур балетаа 1875 онд бичжээ. Анх 1877 онд Москвад тоглосон боловч төдийлөн амжилт олсонгүй. Удирдаач, бүжигчид мөн үзэгчид уг балетыг хөгжмийн хувьд ихээхэн хүнд, бүжиглэхэд хэцүү гэж үзэж байсан байна. Харин 1895 онд Санкт-Петербург хотын Маринскийн театрт шинээр найруулан тавьснаар их амжилт олсон юм. Хөгжмийн зохиолч Рикардо Дриго хөгжмийн найруулга, алдарт бүжиг дэглээч Мариус Петипа, Лев Иванов нарын бүжгийн шинэ дэглэлт дэлхийд алдаршжээ.



1877-2-20-нд Москвагийн Их театрт анх тоглосон.

Манай тайзнаа 1975-6-28 нд анх тоглогджээ.
Удирдаач: Н.Туулайхүү УГЗ
Цомнол: В.И.Бегпчев, В.Ф.Гельцер
Хореограф-Балетмейстер: Б.Жамъяндагва ХБ, АЖ, ТШ
Зураач: Б.Төмөрхуяг

Туслах найруулагч Х.Гэрэлчимэг МУГЖ

ДҮРҮҮД:

Одетто /тэргүүн цагаан хун/-Ч.Ганчимэг СТА

Зигфрид /хан хүү/-М.Од

Одиллия /Ротбартын охин хар хун/-Ч.Ганчимэг СТА

Ротбарт / Хорон санаат шидэт хар шувуу/-А.Өлзий-Орших

Хатан-Ш.Оюунтуяа СТА

Салбадай-Ч.Гансүх

Па де труа-Г.Цолмон МУГЖ, Ц.Хонгорзул, А.Бэлгүдэй

Жижиг хунгууд-Г.Цолмон МУГЖ, Ж.Ханбулнай, Б.Алтаннамар, Ц.Хонгорзул

Том Хунгууд-Г.Батчимэг СТА, М.Мөнхтуяа, Б.Энхтуул СТА

УДБЭТ-ын Балетын жүжигчид, ХБК-ийн оюутнууд оролцон тоглож, симфони найрал хөгжим хөгжимдөнө.

 Энэ балет Үзэсгэлэнт гүнж Одетта, ханхүү Зигфрид нарын хайр сэтгэлийн тухай өгүүлнэ. Одетта ордны бүгчим агаараас салхинд зугаалахаар гарч, цэцэг түүж явсаар хорон санаат шидэт хар шувуу Ротбартад баригдав. Ротбарт түүнийг хун болгон хувиргаж нууранд хөвүүлнэ. Ротбарт ингэж олон сайхан хүүхнийг хун болгон хувиргадаг ажээ.

Огторгуйд хунгийн сүрэг ниснэ. Угийн анд дуртай ханхүү Зигфрид буу шийдмээ бэлдэж, нөхдийн хамт анд гарлаа. Сартай шөнө. Алс тэртээд нуурын ус цэлэлзэн, аймшигт хадан хавцал ёрдойн үзэгдэнэ. Нууранд хөвөх сүрэг хунгийн сүүлчийн толгой дээрээ титэмт хун бол үзэсгэлэнт гүнж Одетта юм. Гэнэт хадан хавцал гэрэлтэн, титэмт хун залуу бүсгүй болон хувирч, уйтгартайяа бүжиглэнэ. Бүсгүйн гоо үзэсгэлэнд эзэмдүүлсэн ханхүү түүний замыг хаан зогсов. Одетта ханхүүд өөрийн гунигт түүхээ ярих бөгөөд Одетта болон түүнийг хүрээлэн буй хүүхнүүд бүгд хорон санаат Ротбартын илбэнд өртөн хохирогсод билээ. Өдөр нь бүгд хун шувуу болж, зөвхөн шөнийн цагаар хүүхнүүд болон хувирдаг тавилантай ажээ.

Ханхүү Зигфрид хорон санаат Ротбарттай тулалдан ялж, өөрийн хайрт бүсгүй Одеттагаа авран, амраг хос жаргалын замдаа ороход хорвоо ертөнц баяр хүргэх шиг наран мандана. Одетта бол төгс төгөлдөр хайр дурлалын бэлэгдэл болсон дүр юм.