БАРИМТ 1
Тэрбээр 1986 оны 11 дүгээр сарын 13-нд төрсөн. 40 настай.
БАРИМТ 2
Хөвсгөл аймгийн Тосонцэнгэл сумын уугуул.
БАРИМТ 3
"Хөвсгөлийн Хүчтэн" дэвжээ, "Эрч" спорт хороо, Монос группийн бөх.
БАРИМТ 4
Биеийн өндөр 184 см, биеийн жин 120 кг.
БАРИМТ 5
2006 онд Хөвсгөл аймгийн наадамд түрүүлж Аймгийн арслан цол, 2007 онд Хөвсгөл аймгийн наадамд түрүүлж Хурц чимэг нэмжээ.
БАРИМТ 6
2009 оны үндэсний их баяр наадмын бөхийн барилдааны тавын даваанд Монгол улсын харцага Т.Өсөх-Ирээдүйтэй (тухайн үедээ Монгол улсын начин цолтой байсан) тунан барилдаж давснаар Монгол улсын начин цолыг хүртсэн.
БАРИМТ 7
Улмаар 2011 оны үндэсний их баяр наадмын бөхийн барилдаанд Монгол улсын заан Батмөнхөөр (тухайн үедээ аймгийн арслан байсан) 6 даван харцага цолны болзол хангасан.
БАРИМТ 8
2015, 2016 онуудад 6 давж харцага цолоо баталсан тэрбээр 2017 оны наадамд 9 даван түрүүлж, Монгол Улсын арслан цол хүртжээ.
БАРИМТ 9
Ц.Содномдорж нь бие галбир сайхантай, уран гоё барилдаантай, олны хүндлэл хүлээсэн бөх билээ.
БАРИМТ 10
Түүний багш нь чөлөөт бөхийн ОУХМ, Хөвсгөл аймгийн Алаг-Эрдэнэ сумын харьяат, аймгийн арслан, чөлөөт бөхийн "Женко" клубийг үүсгэн байгуулагч Сүхбаатарын Мөнхсүх юм.
БАРИМТ 11
2018 оны Улсын баяр наадамд Улсын начин Э.Ванданцэрэнгээр тав, Аймгийн арслан Б.Амаржаргалаар зургаа давж, долоогийн даваанд Улсын заан Жаргалбаярт баруун талдаа хавсруулж унаснаар баяр наадмаа өндөрлүүлсэн.
БАРИМТ 12
2019 оны Улсын баяр наадмаар одоогийн Улсын арслан Б.Орхонбаяраар зургаа, Улсын аварга П.Бүрэнтөгсөөр долоо давж, наймын даваанд Улсын арслан Э.Оюунболдод унажээ.
БАРИМТ 13
Улмаар 2022 онд дөрөв давж, 2022, 2023 онуудад зургаа давсан. Мөн 2024 онд гурав, 2025 онд дөрөв даваад байна.
БАРИМТ 14
Тэрбээр Монгол бөхийн өргөөнд нийт 19 удаа түрүүлжээ.
БАРИМТ 15
Түүний анхны түрүү нь 2007 оны Нийслэлийн өдөрт зориулсан улс аймгийн цолтой бөхийн барилдаан байв. Тэр үед Ц.Содномдорж Аймгийн хурц арслан цолтой байжээ. Тухайн үед гурвын даваанд Улсын заан Д.Баасандорж, дөрвийн даваанд Улсын арслан Х.Мөнхбаатар, тавын даваанд Улсын заан Ц.Мягмарсүрэн, зургаагийн даваанд Улсын харцага Л.Пүрэвжав, долоогийн даваанд Улсын арслан Д.Азжаргалыг хаяжээ.
БАРИМТ 16
Тэр бас бөхийн өргөөнд 11 удаа үзүүрлэж байв.
БАРИМТ 17
Түүний гуншинг хэлвээс, Үнэн зориг, Цогт гарамгай, Үлэмж дэлгэрэх, Саруул сайжрах, Үлэмж бадрах, Үнэн итгэлт, Саруул шаламгай.
БАРИМТ 18
Тэрбээр сар шинийн баярт зориулсан барилдаанд 2016 онд түрүүлж, 2019 онд үзүүрлэжээ. Мөн 2012, 2018 онуудад их шөвөгт шалгарсан.
БАРИМТ 19
Улсын арслан Ц.Содномдорж арван хүүхэдтэй айлын найм дахь нь бөгөөд таван эгч, хоёр ах, хоёр эмэгтэй дүүтэй аж.
БАРИМТ 20
Түүний аав, ах нь үндэсний бөхөөр хичээллэдэг бөгөөд Цэдэв гуай болон том ах нь ч мөн Сумын заан цолтой бөх аж.
БАРИМТ 21
Ц.Содномдоржийг үндэсний бөхийн замд татан оруулсан хүн бол Дундговь аймгийн харьяат аймгийн заан Мөнхтөр. Тэрбээр заан Мөнхтөрийн ажиллуулдаг “Монгол газар” спорт клубт хичээллэдэг байх үедээ танилцаж байсан байна.
БАРИМТ 22
Ц.Содномдоржийг арслан болоход Хөвсгөл аймгийн нутгийн зөвлөл, "Хөвсгөлийн хүчтэн" дэвжээнээс хүндэтгэл үзүүлж, “Lexus 570” маркийн автомашин бэлэглэж байв. Мөн түрүү бөхийн бай Land Cruiser-200 машин гардаж байжээ.
БАРИМТ 23
Тухайн үед УИХ-ын гишүүн, Боловсролын сайд Л.Энх-Амгалан улсын арслан Ц.Содномдоржид танан цагаан хөөрөг бэлэглэж байв.
БАРИМТ 24
Тэрбээр Монгол бөхийн өргөөнд хамгийн сүүлд 2017 оны дөрөвдүгээр сарын 30-нд Монгол Улсын хурц арслан, улсын хүндэт тайлбарлагч Ц.Бадамсэрээжидэд хүндэтгэл үзүүлэх барилдаанд Улсын харцага цолтой түрүүлжээ. Тэгэхээр түүний өчигдрийн түрүү нь арслан цолтой анхных нь түрүү болж байна.
