Зам, тээврийн хөгжлийн яам гэж байлаа, Л.Оюун-Эрдэнэ Ерөнхий сайдын үед. Одоогийн УИХ-ын дарга С.Бямбацогт сайдаар нь ажиллаж байх тэр үед Зам, тээврийн хөгжлийн яам Нисэхийн газартай, Санхүүгийн хэлтэстэй байв. Харин Г.Занданшатар Ерөнхий сайд гарч ирээд хөгжилдөө хүрчихсэн гэж үзсэн үү яасан, бүү мэд ямартай ч Засгийн газрын бүтцээ оруулж ирэхдээ Зам, тээврийн яам болгон нэрийг нь өөрчилсөн байсан. Ингээд “Хөгжил”-өө нэрнээсээ хассан яам дотроо бүтцээ зурах “эрх нь нээгдсэн”.

Хамгийн харамсалтай нь үеийн үед “ГАЗАР”-тай байсан Нисэхийн салбар хэлтэс болон статус ддошилж, санхүүгийн хэлтэс нь Санхүү, хөрөнгө оруулалтын газар болон өргөжих эхлэл энэ үед тавигдсан байдаг юм. Ямар ч сайдын үед бодлогоо гаргадаг салбарууд нь буюу авто зам, авто тээвэр, төмөр зам, иргэний нисэхийн салбарын газар энэхүү яаманд байсан нь ингэж Б.Дэлгэрсайхан сайдын үед алдагдсан.

Инээдтэй ч гэх үү, эмгэнэлтэй ч гэх үү нэгэн зүйл сонирхуулахад Зам, тээврийн яамны Нисэхийн хэлтсийнхэн гадаад харилцаагаа явуулахдаа өөрсдийн нэрийн хуудас дээрээ “ГАЗАР” хэмээн өөрчлөн бичдэг болжээ. Гадаад харилцаанд ижил статустай албан тушаалтнууд л ижил төвшинд харилцаж чаддагаас тэр шүү дээ. Манай яамны хэлтэс төлөөлж байгаа хүн бусад орны газрынхантай нэг ширээний ард суугаад адил төвшинд ажил ярьж болдоггүйгээс л ингэж нэрийн хуудсаараа хүртэл хуурч явах нөхцөлийг яам нь бүрдүүлсэн гэсэн үг.

Бодлого боловсруулдаг газраа хэлтэс болгоод бодлого ч гаргадаггүй, хөрөнгө ч босгодоггүй санхүүгийн хэлтсээ газар болгон өөрчилсөний цаад шалтгаан нь ердөө л Б.Дэлгэрсайхан сайдын дагуулж ирсэн Т.Сумъяа гэдэг эмэгтэйгээс болсон хэрэг. Боловсролын яамны барилга захиалагчийн албанд ажиллаж байсан, Дорноговийн харьяат тэрбээр Зам, тээврийн яаманд ирсэн даруйдаа л Хэмнэлтийн хуулийг үл тоон бүх тавилгаа шинэчилж хэл ам таталж явсан нэгэн. Түүнийг газрын дарга болгохын тулд Нисэхийн салбарыг хэлтэс болгож, Тээврийн салбарын хэлтсийг татан буулгасан гэхээр Б.Дэлгэрсайхан сайдад хэр ойр хүн гэдэг нь харагддаг. Түүгээр ч үл барам Т.Сумъяаг төрийн захиргааны дарга болгох гэж газрын даргын орон тооны шалгууруудыг нь зөвхөн түүнд тохируулж зарласан байдаг юм. Гэсэн ч өөрт нь зориулж зарласан тусгай шалгалтдаа хоёр ч удаа ороод босго оноогоо ч авч чадаагүй бүдэрсэн тэрбээр үргэлжлүүлэн ажилласаар л буй.

“Нэг бол засаад авахсан, даанч хоёрын хоёр гахайтай” гээд социализмын үеийн үйл явдлыг харуулсан хошин шогийн үзүүлбэр байдаг даа. Түүн шиг төрийн захиргааны тусгай шалгалтдаа хоёрын хоёр удаа бүдэрсэн Т.Сумъяа нь санхүү, хөрөнгө оруулалтын чиглэлээр ажиллах албан тушаалтны хамгийн чухал үзүүлэлт болох логик шинжилгээний шалгалт дээрээ ердөө 2 оноо авсан тухай яамныхан нь жиг жуг хийцгээх л юм билээ.

Уг нь Зам, тээврийн сайд Б.Дэлгэрсайханыг аливаа шийдвэрийг зоригтой гаргаж чаддаг, түүнийгээ хамгаалдаг, бас нөлөөлж чаддаг гээд улстөрчийнхөө хувьд нэмэх оноо авах чанар олонтой хэмээдэг. Харамсалтай нь улстөрч сайддаа мэргэжлийн зөвлөгөө өгч, салбарынхаа бодлогыг тодорхойлоход нь туслах ёстой багийнхан нь ийм мэргэжлийн бус байна. Өөрт нь зориулж зарласан орон тооны тусгай шалгалтад хоёр ч удаа бүдэрчихсэн хүн сайдад мэргэжлийн туслалцаа үзүүлнэ ч гэж юу байхав дээ!!!

А.Болдбаатар