2023 оны аравдугаар сарын 12-ны өдөр болсон НИТХ-ын ээлжит бус хуралдаанаар нийслэлийн Засаг даргад нэр дэвшүүлэх асуудлыг хэлэлцэж, тухайн үед Хууль зүй, дотоод хэргийн сайдаар ажиллаж байсан Х.Нямбаатарыг НИТХ дахь МАН-ын бүлгээс нэр дэвшүүлсэн байдаг. Улмаар төлөөлөгчдийн 78.5 хувийн саналаар түүнийг нийслэлийн Засаг даргаар томилохыг дэмжсэн.
Хотын даргын албыг хашсан хугацаандаа түгжрэл, нийтийн тээврийн шинэчлэл, газар чөлөөлөлт зэрэг асуудалд төвлөрөн ажилласан ч түүний удирдлага, үйл ажиллагаатай холбоотой шүүмжлэл нийгэмд багагүй өрнөсөн.
Тэгвэл энэ оны тавдугаар сарын 16-ны өдөр Ерөнхий сайд Н.Учрал хотын дарга Х.Нямбаатарыг махны үнийг зохиомлоор өсгөх нөхцөл бүрдүүлсэн гэх үндэслэлээр үүрэгт ажлаас нь чөлөөлөх шийдвэр гаргасан.
Үүний дараа хотын дарга Х.Нямбаатар өөрийн цахим хуудсаар дамжуулан “Даваа гарагт үүрэгт ажлаа албан ёсоор хүлээлгэн өгнө” хэмээн мэдэгдсэн. Ингэснээр нийслэлийн удирдлагын түвшинд дахин өөрчлөлт орж, дараагийн "Хот"-ын даргын асуудал улс төрийн хүрээнд анхаарал татаж эхэллээ.
Хуулийн хүрээнд авч үзвэл, Монгол Улсын Засаг захиргаа, нутаг дэвсгэрийн нэгж, түүний удирдлагын тухай хуулийн 64 дүгээр зүйлд тодорхой зохицуулсан байдаг.
Тухайлбал, тус хуулийн 64.3-т “Дээд шатны Засаг дарга, Ерөнхий сайд энэ хуулийн 64.2-т заасан тохиолдолд зохих шатны Хурлын санал, эсхүл өөрийн санаачилгаар огцруулах шийдвэр гаргана” хэмээн заасан нь Ерөнхий сайд нийслэлийн Засаг даргыг чөлөөлөх, огцруулах бүрэн эрхтэй болохыг хуульчилжээ.
Мөн 64.5-д “Засаг даргыг хугацаанаас нь өмнө чөлөөлсөн, огцруулсан бол Засаг даргыг шинээр томилох хүртэлх хугацаанд түүний бүрэн эрхийг Засаг даргын орлогч хэрэгжүүлж хариуцлагыг бүрэн хүлээнэ” гэж заасан байна.
Т.Зузу
Сэтгэгдэл (3)