Монгол Улсын Ерөнхийлөгч У.Хүрэлсүхийн санаачлан хэрэгжүүлж буй “Эрүүл Монгол хүн” хөтөлбөрийг Японы Шүд, амны хөндийн хөгшрөлтийн эсрэг нийгэмлэг дэмжин ажиллахаар болов.
Монгол Улсаас Япон Улсад суугаа Онц бөгөөд Бүрэн Эрхт Элчин сайд Б.Баярсайхан 2026 оны 2 дугаар сарын 01-ний өдөр Ерөнхийлөгчийн эрүүл мэнд, нийгмийн бодлогын зөвлөх Б.Бадамцэцэг тэргүүтэй эрүүл мэндийн салбарын төлөөлөл Япон Улсад ажиллахтай холбогдуулан “Монголчуудын шүд, амны хөндийн эрүүл ахуйн асуудлууд” сэдэвт хамтарсан уулзалт арга хэмжээг зохион байгуулав.
Тус уулзалтыг Японы Шүд, амны хөндийн хөгшрөлтийн эсрэг нийгэмлэг дэмжин хамтран зохион байгуулсан ба уулзалтад нийгэмлэгийн тэргүүн Т.Мацүо тэргүүтэй шүдний эмч, эрүүл ахуйчид болон АНУ-ын Теннисигийн хүрээлэнгийн доктор П.Энхсайхан нар оролцов. Уулзалтын үеэр МУ-ын Ерөнхийлөгчийн Эрүүл мэнд, нийгмийн бодлогын зөвлөх Б.Бадамцэцэг “Эрүүл Монгол хүн” хөтөлбөр, “Монголчуудын эрүүл мэндийн асуудлууд” сэдвээр, Эрүүл мэндийн яамны Нийгмийн эрүүл мэндийн бодлогын хэрэгжилтийн газрын дарга Б.Цэцэгсайхан “Монголчуудын шүд, амны хөндийн эрүүл мэндийн өнөөгийн нөхцөл байдал, цаашид анхаарах асуудал” сэдвээр тус тус илтгэл тавьж оролцогчдын асуултад хариулав.
Японы Шүд, амны хөндийн хөгшрөлтийн эсрэг нийгэмлэгийн гишүүд энэ жилийн 8 дугаар сард Монгол Улсад анх удаа ажиллах ба энэ үеэр Монгол Улстай танилцах, монголчуудын шүд, амны хөндийн эрүүл мэндийн нөхцөл байдалтай газар дээр нь танилцах, хамтарсан уулзалт, арга хэмжээг зохион байгуулахаар төлөвлөж буйгаа танилцууллаа. Нийгэмлэгийн тэргүүн Т.Мацүо хамтарсан уулзалтад танилцуулсан Монгол Улсын эрүүл мэндийн салбарт авч хэрэгжүүлж буй төрийн бодлого шийдвэр болон хүүхдүүдийн шүд, амны хөндийн өвчлөл, шалтгаант нөхцөлийн талаарх дэлгэрэнгүй мэдээлэл нь цаашдын хамтын ажиллагаанд чухал мэдээлэл болох талаар онцолж байв.
