Увс аймгийн Түргэн сумын Эрүүл мэндийн төвтэй холбоотой маргаан, шүүмжлэл үргэлжилж байгаа энэ үед нэгэн иргэн сошиал сүлжээнд нийтэлсэн пост олон нийтийн анхаарал татаж байна. Уг мэдээлэлд сумын нөхцөл байдал, яаралтай тусламжийн зохион байгуулалт, эмнэлгийн үйлчилгээний хүртээмжтэй холбоотой ноцтой асуудлуудыг хөнджээ.
Иргэний нийтэлсэн мэдээлэлд цас их орсон, замын нөхцөл хүндрэлтэй үед яаралтай дуудлагын үйлчилгээ хангалтгүй байсан тухай дурдсан байна. Тухайлбал, жирэмсэн хүн болон гар хугарсан хүүхэд зэрэг яаралтай тусламж шаардлагатай тохиолдлуудад түргэн тусламжийн зохион байгуулалт сул, дуудлагад очих, өвчтөн тээвэрлэх ажиллагаа хүндрэлтэй байсан гэж шүүмжилжээ.
Энэхүү гомдол нь өмнө нь аймгийн Эрүүл мэндийн газраас Түргэн сумын Эрүүл мэндийн төвд хийсэн хяналт шалгалтын дүгнэлттэй давхцаж байгаа юм. Тухайн шалгалтаар ажилтны аюулгүй байдал, нийгмийн баталгааг хангаагүй, мөн дуудлагын зохион байгуулалтад зөрчил гарсан гэж үзэн байгууллагын удирдлагад хариуцлага тооцох шаардлага хүргүүлсэн байсан.
Гэвч өнөөдрийг хүртэл албан шаардлагын хэрэгжилт удааширч, шийдвэр бодитоор биелээгүй байгаа нь иргэдийн дунд бухимдал, эргэлзээ үүсгэж байна. Ийм нөхцөлд иргэдийн өдөр тутмын тусламж үйлчилгээтэй холбоотой бодит хүндрэлүүд сошиал орчинд дахин ил болж байгаа нь асуудлын цар хүрээг улам тодотгож байна.
Иргэдийн зүгээс төрийн байгууллагын шийдвэр зөвхөн цаасан дээр бус бодитоор хэрэгжих ёстойг онцолж, Түргэн сумын Эрүүл мэндийн үйлчилгээний зохион байгуулалт, хариуцлагын асуудалд яаралтай тодорхой шийдэл гаргахыг шаардаж байна.
Сэтгэгдэл (5)