Хөлбөмбөгийн ДАШТ-ий F хэсгийн эхний тоглолтод Шведийн шигшээ баг Тунисыг 5:1-ийн харьцаагаар илүүрхэн хожиж, хэсгээ тэргүүлж эхэллээ. Тоглолт Мексикийн Монтеррей хотод болж, шведүүд дэлхийн аваргын тэмцээнд сүүлийн хэдэн арван жилийн хугацаанд гаргаж байгаагүй хамгийн үр дүнтэй тоглолтоо толилууллаа. 

Шведийн довтолгооны гол хүч болох Ясин Аяри, Александр Исак, Виктор Гёкереш нарын хамтрал энэ өдөр үр дүнгээ харуулав. Тоглолтын долоодугаар минутад Тунисын хаалгачийн алдааг ашиглан Ясин Аяри холын хүчтэй цохилтоор тооны харьцааг нээсэн юм. Улмаар 30 дахь минутад Александр Исак хурдан сөрөг довтолгоог амжилттай төгсгөж, Шведийн тэргүүллийг хоёр бөмбөгөөр ахиуллаа.

Тунисын шигшээ эхний үеийн төгсгөлд хамгаалагч Омар Рекикийн мөргөсөн гоолоор тоог 2:1 болгож ойртуулсан ч энэ нь тэдний тоглолтын ганц оргил мөч байв. Завсарлагааны дараа Швед бүрэн давамгайлж, Исак болон Гёкерешийн хослолын үр дүнд гурав дахь гоол хаалганд унав. Дараа нь сэлгээнээс талбайд гарсан Маттиас Сванбергийн гоол VAR-ын шалгалтын дараа хүчинтэйд тооцогдож, онооны харьцаа 4:1 болсон юм. Эцэст нь Ясин Аяри нэмэлт цагт дахин холын цохилтоор гоолдож, тоглолтын эцсийн цэгийг хатгалаа.

Хоёр гоол оруулсан Ясин Аяри тоглолтын шилдэг тоглогчоор нэрлэгдэв. Сонирхолтой нь түүний эцэг Тунис гаралтай бөгөөд эхний гоолынхоо дараа хүндэтгэл үзүүлэн даруухан баярласан ч хоёр дахь гоолынхоо дараа сэтгэл хөдлөлөө нууж чадсангүй.

Энэхүү ялалтын дараа Шведийн шигшээ F хэсгийг гурван оноотой тэргүүлж эхэлсэн бөгөөд нөгөө талд Нидерланд, Японы шигшээ багууд 2:2-оор тэнцсэн билээ. Харин Тунисын баг дараагийн тоглолтуудад Япон болон Нидерландын эсрэг заавал оноо авах шаардлагатай болж байна. 

Л.Баяр