2026 оны хөлбөмбөгийн ДАШТ-ий шөвгийн 16-гийн эхний хоёр тоглолт өндөрлөж, шөвгийн наймын эхний хоёр эрхийн эзэд тодорлоо. Африкийн төлөөлөл Марокко дахин нэг хүчтэй тоглолт үзүүлж хамтран зохион байгуулагч Канадын мөрөөдлийг өндөрлүүлсэн бол дэлхийн аварга Францын шигшээ Парагвайг хүндхэн тулаанд буулган авч дараагийн шатанд шалгарлаа.

Марокко 3:0 Канад – "Атласын арслангууд" дахин архирлаа

Хьюстонд болсон тоглолтын эхлэл Канадын талд илүү өнгөрсөн. Эзэн орны баг эхний хагаст хэд хэдэн аюултай довтолгоо өрнүүлсэн ч боломжуудаа ашиглаж чадсангүй. Харин туршлагатай Мароккогийн шигшээ баг хоёрдугаар үед жинхэнэ чансаагаа харуулсан юм.

Тоглолтын баатар нь хагас хамгаалагч Аззедин Унахи байлаа. Тэр хоёр гоол оруулж, Канадын хамгаалалтыг нураасан бол сэлгээнээс талбайд гарсан Суфиан Рахими нэмэлт цагт гурав дахь гоолыг шигтгэн ялалтыг баталгаажуулав.

Ийнхүү 3:0-ээр ялсан Марокко ДАШТ-ий шөвгийн наймд хамгийн түрүүнд шалгарсан баг болж, Африкийн хөлбөмбөгийн хүчирхэг төлөөлөгч гэдгээ дахин баталлаа.

Харин Канад түүхэн ДАШТ-ээ өндөрлүүлсэн ч хасагдах шатанд хүрсэн амжилтаараа бахархаж байгаа нь гарцаагүй. 

Франц 1:0 Парагвай – Аваргуудын арга барил

Филадельфид болсон хоёр дахь тоглолт жинхэнэ тактикийн тулаан байлаа. Хоёр баг хамгаалалтад нягт тоглож, Парагвай сахилга баттай хамгаалалтаараа Францыг удаан хугацаанд бухимдуулсан юм. Гэсэн ч том тэмцээнд туршлага үргэлж үнэ цэнтэй байдгийг Франц харууллаа. Тэд тоглолтын цорын ганц гоолыг оруулж, 1:0-ээр ялалт байгуулснаар шөвгийн наймд шалгарсан хоёр дахь баг болов.

Францын хувьд энэ удаагийн ялалт тийм ч сүртэй харагдсангүй. Гэхдээ аваргын төлөө өрсөлдөж буй багуудад хамгийн чухал нь тоглолтын өнгө бус, дараагийн шатны эрх байдаг. "Цэнхэрүүд" яг үүнийг хийж чадлаа.

Шөвгийн наймын эхний хос ч тодорлоо. Марокко, Францын шигшээ долдугаар сарын 9-нд хоорондоо тоглож, хагас шигшээд шалгарах эрхийн төлөө хүч үзнэ. Нэг талд Африкийн шинэ хүч, нөгөө талд дэлхийн шилдэгүүдийн нэг. Энэ бол шөвгийн наймын хамгийн сонирхолтой тулаануудын нэг гарцаагүй мөн. 

Л.Баяр