Жон Гальяногийн өнгөрсөн үеийн антисемит болон арьс өнгөөр ялгаварласан үг хэллэг нь дахин шүүмжлэл дагуулжээ. Нью-Йорк хотын Метрополитен урлагийн музей /The Metropolitan Museum of Art/ загвар зохион бүтээгч Жон Гальянод зориулан 2027 онд гаргахаар төлөвлөж байсан “John Galliano: Horizons” үзэсгэлэнгээ цуцаллаа.

Уг үзэсгэлэн нь 2027 оны хавар музейн Costume Institute-д нээгдэж, тухайн жилийн Met Gala-гийн гол сэдэв болохоор төлөвлөгдөж байсан юм. Харин Гальяногийн өнгөрсөн үеийн маргаантай үйлдлүүд дахин хүчтэй шүүмжлэл дагуулсны дараа музей болон дизайнер уг төслийг хэрэгжүүлэхгүй байхаар хамтран шийдвэрлэжээ.

Жон Гальяно 2011 онд Парисын нэгэн кафед антисемит болон арьс өнгөөр ялгаварласан үг хэлсэн нь дүрс бичлэгт үлдэж, олон нийтэд тархсан юм. Үүний дараа тэрбээр Christian Dior-ийн бүтээлч захирлын албан тушаалаасаа халагдаж, Францын шүүхээс үзэн ядалт агуулсан доромжлолын хэрэгт буруутгагдсан. Гальяно өнгөрсөн үйлдлийнхээ төлөө олон жилийн турш уучлал хүсэж, өөрийн хэлсэн үгнээс үүдсэн өвдөлт, ялангуяа еврей болон ази нийгэмлэгүүдэд учруулсан шархыг бүрэн хүлээн зөвшөөрч байгаагаа дахин илэрхийлжээ.

Тэрбээр 2014 онд Maison Margiela-гийн бүтээлч захирлаар ажиллаж, загварын салбарт эргэн ирсэн бөгөөд 2024 онд тус албан тушаалаа орхисон юм. Гальяногийн үзэсгэлэн цуцлагдсан ч 2027 оны Met Gala бүхэлдээ цуцлагдаагүй. Метрополитен музей шинэ үзэсгэлэн болон 2027 оны Met Gala-гийн сэдвийг дараа нь зарлахаар болжээ.

“John Galliano: Horizons” үзэсгэлэн нь түүний 1984 онд Central Saint Martins-д төгсөхдөө бүтээсэн коллекцоос эхлээд Givenchy, Dior болон Maison Margiela-д ажилласан үеийг хамарсан, 40 жилийн уран бүтээлийг нь дэлгэрэнгүй харуулах томоохон ретроспектив байх байв.

Хэрэв хэрэгжсэн бол Гальяно нь Costume Institute-д бие даасан ретроспектив үзэсгэлэнгээр хүндэтгүүлсэн амьд дизайнеруудын дунд гурав дахь нь болох байсан юм. Өмнө нь Ив Сен Лоран 1983 онд, Рэй Кавакубо 2017 онд ийм үзэсгэлэнгээр онцлогдож байжээ.