Шинэчлэлийн Засгийн газрын тэргүүн саяхан экс тайлан өгдөг жижиг компаниудыг татан буулгана гэж мэдэгдсэн. Монголд ийм төрлийн олон аж ахуйн нэгжүүд байдаг. Тэд нийгмийн орлого багатай хэсгийн ажил амьдралаа болгох зорилгоор л байгуулсан компаниуд. Харин ийм аж ахуйн нэгжүүд Засгийн газрын тэргүүнд таалагдахаа больсон гэнэ. Бодвол Н.Алтанхуягийн эрх ашгийг л зөрчөөд байгаа бололтой. Н.Алтанхуягаас өмнөх бүх ерөнхий сайдууд ийм төрлийн аж ахуйн нэгжүүдийг орлоготой болгох бодлогыг явуулж байснаас татан буулгах зорилгыг өмнөө тавьж явсангүй.

    Аль ч улс орнуудад ийм төрлийн аж ахуйн нэгжүүд байж л байдаг. Тэдгээр аж ахуйн нэгжүүдийг Засгийн газрын тэргүүн нь “таалагдахгүй байна” гэдэг шалтгаанаар шууд татан буулгана гэдэг бол байж боломгүй үзэгдэл л дээ. Харин манай улсад байж болох үзэгдэл болов.

    Экс тайлан өгдөг аж ахуйн нэгжүүдийг татан буулгахын өмнө нийгэмд болоод Засгийн газрын тэргүүнд ямар сөрөг нөлөө үзүүлээд байгааг судалж ард түмэнд тайлагнах хэрэгтэй. Тэгээд дараа нь татан буулгавал зүйд нийцнэ.

    Ийм төрлийн аж ахуйн нэгжүүдийн зарим дээр нь багахан хэмжээний үл хөдлөх хөрөнгөнөөс эхлээд газрын зөвшөөрөл, лицензүүд хүртэл байдаг гэнэ. Тэгэхээр төр тэдгээр аж ахуйн нэгжүүдийг татвар төлсөнгүй гэж татан буулгаснаар газрынх нь зөвшөөрлүүд хүчингүй болгох зорилгууд агуулагдаж байгаа гэж эх сурвалж мэдээлэв. Өөрөөр хэлбэл төр иргэдийнхээ өмчийг шууд л дээрэмдэх гарцаа олж байгаа хэрэг.

    Бас зарим төрлийн үйл ажиллагаа эрхлэх тусгай зөвшөөрлүүд экс тайлан өгдөг аж ахуйн нэгжүүдэд байдаг. Тэдгээр үйл ажиллагаа эрхлэх тусгай зөвшөөрлүүд нь цуцлагдсанаар амьдралаа залгуулах гэж арга ядаж яваа иргэдийн амьдрал улам л хүндэрнэ. Экс тайлан өгч байгаа ч хэзээ нэгэн цагт газраа эдийн засгийн эргэлтэд оруулж улсад татвараа төлж, ажлын байр бий болгох боломжийг нь Засгийн газрын тэргүүн хаах хэрэггүй баймаар. Бас тусгай зөвшөөрөл, лицензээ ашиглаад хэзээ нэгэн цагт үйл ажиллагаа эрхэлж болно шүү дээ. Тэрнээс нь өмнө ингэж экс тайлан өгдөг аж ахуйн нэгжүүдийг татан буулгах нь улс төрийн ямар зорилго агуулж байна вэ гэдэгийг ойлгоход төвөгтэй.

    Саяхан олон тэрбум төгрөгийн хөрөнгө оруулалт хийсэн аж ахуйн нэгжүүдийг тодорхой төрлийн татвараас чөлөөлөхөөр яригдсан нь бас л дуулиан дэгдээсэн. Тэгвэл одоо экс тайлан өгдөг аж ахуйн нэгжүүдийг бүгдийг дампууруулах гэж зориглож байна. Ингэснээр Засгийн газар бизнес хийх орчинд хэтэрхий их хутгалдах боллоо.

    Үр дүнд заримыг нь татвараас чөлөөлөөд, заримыг нь дампууруулаад байвал Монголд улс төрчдийн дэмжлэгтэй цөөн тооны аж ахуйн нэгжүүд нөлөөллөө тогтооно. Ингэхийг шинэчлэлийн Засгийн газар зөв бодлого гэж бодож байгаа бололтой. Харин ард түмэн тэгж бодохгүй байна.