Сүүлийн үед Зүүн өмнөд Азийн орнуудад монгол бүсгүйчүүд очиж биеэ үнэлэх асуудал ихээр гарах болсон. Энэ талын гомдол мэдээлэл их ирдэг. Гэвч нэгдсэн тоо баримт байдаггүй. Учир нь зүүн өмнөд Азийн орнуудад монгол бүсгүйчүүд ихэвчлэн сурах гэсэн сайхан нэрээр халхавчлан амьдардаг. Тэгээд биеэ үнэлдэг аж. Сингапур, Хонг Kонг, Малайз, Макао, Тайланд, Вьетнам, Филлипини зэрэг орнуудад биеэ үнэлэгч Монгол охидын тоо хэдэн зуугаар яригдах бололтой. Бас БНСУ, Япон зэрэг орнуудад ч монгол охид ийм ажил их хийх болсон. Зарим нь бүр Youtube дээр бичлэгээ тавьж эхэлсэн. Энэ байдал эрх баригчид хийгээд Шинэчлэлийн Засгийн газрынхны санааг зовоож эхэлжээ.

    Эх сурвалжийн мэдээлж байгаагаар бол эрх баригч намын зарим гишүүд Монголд Улаан дэнлүүний гудамжийг хүлээн зөвшөөрөх хэрэгтэй гэсэн байр суурийг баримталж байгаа аж. Учир нь үүнийг хүлээн зөвшөөрөхгүй болохоор монгол бүсгүйчүүд гадны оронд очиж биеэ үнэлж байна. Бүр хар тамхинд орж амиа алдах боллоо гэх мэтээр байр сууриа зөвтгөж байгаа аж. Ийм байр суурийг баримталж байгаа гишүүдийн бодлоор бол Урт цагааны гудамжийг Улаан дэнлүүний гудамж болгож засвал яг тохирно гэж үзэж байгаа бололтой. Учир нь Урт цагааны гудамжны нилээд хэсэг нь нийслэлийн өмчид байдаг аж. Хэдхэн жилийн өмнө жуулчны гудамж болно гэж нилээд сүртэй яригдаж байгаад сураг алдарсан юм. Тэгээд ч жуулчид л Улаан дэнлүүний гудамжаар үйлчлүүлнэ. Тиймээс жуулчдын болоод Улаан дэнлүүний гудамж маягаар хөгжүүлбэл хөрөнгө оруулна гэх хүмүүс ч байгаа сурагтай. Бас байрлал нь ч тун дажгүй гэжээ. Ямар ч гэсэн хэсэг хүрээнийхэн дунд ийм яриа өрнөж эхэлсэн байна.

    Гэвч энэ бодлогыг эсэргүүцэх гишүүд маш олон байгаа аж. Учир нь Улаан дэнлүүний гудамжийг хүн ам нь ядаж 20 саяас дээш газар нээдэг. Жуулчид тасралтгүй ирэх газар байх учиртай. Улаан дэнлүүний гудамжийг дагаад мөрийтэй тоглоомны газар яригдана. Манайх шиг гурван сая хүн амтай газар ярьдаг асуудал биш. Тиймээс хэрхэвч зөвшөөрч болохгүй гэж ярих хүмүүс ч байна.

    Мөн Улаанбаатарт байдаг жижиг зочид буудлууд биеэ үнэлэлтийг илт дэмждэг. Тиймээс албан ёсны болгоод дэлхийн стандартын дагуу  асуудлыг судалж үзэх нь зөв гэсэн эргэлзээтэй байр суурьтай хүмүүс ч байгаа бололтой.

    Ямар ч гэсэн ардчилсан Засгийн үед Улаан дэнлүүний гудамжийг байгуулах эсэхийг ярьж хэлэлцүүлж, ард түмнээс асууж магадгүй болов. Мэдээж энэ асуудал ихээхэн маргаан, мэтгэлцээн дагуулах нь гарцаагүй юм.