Өмнөд Солонгосын эрх баригчид Пхеньянтай холбоогоо сайжруулахын тулд эхний ээлжинд Ким Чен Уны засаг захиргаа цөмийн зэвсгээ хураах арга хэмжээ авах хэрэгтэй гэж шаардсан байна. Өмнөд Солонгосын сайд Сөүлтэй харилцаагаа сайжруулахыг хүсвэл эхлээд цөмийн зэвсэггүй болох тал дээр хүчин чармайлт гаргах шаардлагатай гэж мэдэгджээ. Мөн хоёр орны харилцааг сайжруулахад харилцан итгэлцлийг бий болгох шаардлагатай байгааг онцолсон байна. Харин Хойд Солонгосын удирдагч шинэ оны босгон дээр мэдэгдэл хийж, цөмийн дайн эхлүүлэх бололцоотой гэж ярьжээ. Мөн тэрээр үндэсний эв нэгдлийг муутгах хортой зүйл хийхгүй байх нь хоёр орны харилцааг таатай байлгахад нөлөөлнө гэж онцолсон байна. Хойд Солонгосын удирдагч ингэж сүрдүүлж байгаа ч улс орныхоо эдийн засаг болоод ард иргэдийнхээ амьжиргааг сайжруулахын тулд Өмнөдүүдтэй таатай харилцаатай байхыг эрмэлздэг гэж шинжээчид үздэг юм. Хойд Солонгосын дотоод улс төр тогтворгүй байгаа нь авга эгчийнхээ нөхрийг цаазалсанаар батлагдсан билээ. Ийм үед дотоод дахь улс төрийн байдлаа тогтвортой болгохын тулд Өмнөд Солонгосчуудыг өдөөн хатгах болно гэж шинжээчид таамаглаж байна. Шинэ онд хэлсэн үгэндээ Ким Чен Ун авга ахаа цаазалсаны дараа дотоодын эв нэгдэл бэхжиж байна гэжээ.