Хойд Солонгосын удирдагч Ким Чен Ун удахгүй 31 нас хүрэх гэж буй талаар эх сурвалжууд мэдээллээ. “NBA”-н шилдэг тоглогчдын нэг байсан Дэннис Родман Хойд Солонгосын шигшээ багийг дасгалжуулахаар болоод байгаа билээ. Тус улсад дөрөвдэх удаагаа айлчилж буй тамирчин ирэх Лхагва гаригт нөхөрсөг тэмцээн зохион байгуулахаар төлөвлөжээ. Родман айлчлалынхаа хүрээнд Хойд Солонгосын шигшээ багийг дасгалжуулаад зогсохгүй, дипломат харилцаанд өөрчлөлт авчрах магадлалтай гэж Өмнөд Солонгосын тамирчид ярьсан байна. Тэрээр энэ удаагийн айлчлалаараа Ким Чен Уны төрсөн өдөрт оролцох давхар зорилготой байсан гэнэ. Өнгөрсөн оны хоёрдугаар сард Родман Ким Чен Унтай уулзсан анхны америк хүн болсон юм. Биеэрээ дүүрэн шивээстэй тэрээр Хойд Солонгосын удирдагчтай тун ч дотно найзалдаг бололтой.