Ганц худагт 36 хоног өлсгөлөн зарлаад буй иргэн өөрийгөө хууль бусаар хоригдож байна хэмээн үзэж байгаа талаар бид мэдээлж байсан. Улмаар хууль бусаар ганц худагт хоригдож буй гэх Н.Вандансангийн өмгөөлөгч Г.Батбаяр, Ц.Баасандорж нараас эл хэргийн талаар зарим зүйлийг тодрууллаа. Дашрамд хэлэхэд эдгээр залуусын хэрэгт Монголоос хөөгдөх дээрээ тулаад байсан Өвөрмонгол иргэн Н.Алхаа буюу Вень Шин холбоотой гэдгийг эх сурвалжууд хэлж байна. Гэхдээ тэрбээр гэрчээр эсвэл хохирогчоор оролцож байгаа юу гэдэг нь тодорхойгүй байна.
-Вандансанги нь онц хүнд гэмт хэрэгт яллагдаж байгаа. Гэхдээ анхнаасаа гэмт хэргээ хүлээгээгүй, хүлээх ч үгүй. Гэмт хэрэг хийгээгүй учраас үзэл бодлоо илэрхийлж өлсгөлөн зарлах эрх надад байна гээд өлсгөлөн зарлаж эхэлсэн. Нойтон өлсгөлөн зарлаж, өдөртөө крантнаас ганц аяга ус ууж байгаа. Өлсгөлөн зарласан үед 72 цагийн дотор эрх бүхий албан тушаалтнууд очиж уулзах ёстой байдаг. Гэвч хэн ч түүнтэй уулзаагүй. Хэрэв уулзвал чи үхлээ гээд чи л хохирно, чиний эхнэр хүүхэд л хохирно гэсэн байдлаар харьцдаг. Чи энд үхвэл Шүүхийн шийдвэр гүйцэтгэх байгууллага нь хариуцлагыг нь хүлээнэ биз гэсэн хүйтэн хөндий байдлаар харьцдаг. Эрүүгийн байцаан шийтгэх хуулийн 13.7 зааснаар шийтгэх тогтоол гараагүй тохиолдолд хэнийг ч гэм буруутайд тооцож үл болно гэсэн заалт байдаг.
-Тухайн сэжигтэн хэдэн настай вэ. Өлсгөлөн зарлаад нэлээдгүй хугацаа өнгөрч, биеийн байдал хэр байгаа вэ?
-Шүүгдэгч уурагны тутагдалд орсон, зүрхний хэм алдагдсан биеийн байдал хүнд байгаа.
-Анхнаасаа яагаад хулгайн хэрэгт холбогдсон юм бэ. Тэгээд яагаад хэргээ хүлээхгүй байгаа юм?
-Энэ нь өөрөө онцлог нөхцөл байдалтай гэмт хэрэг байгаа. Энэ гэмт хэргийг үйлдсэн жинхэнэ гэмт хэрэгтэн нь Авирмэд гээд хүн байсан. Тэр хүний гэрээслэл надад байгаа. Тэр хүн үхэхдээ “Би энэ хэргийг үйлдсэн. Вандансанги гэх хүн энэ хэрэгт ямар ч холбоогүй. Би цагдаа нарт зодуулаад арга буюу амиа хорлолоо гэсэн гэрээслэл үлдээсэн. Авирмэд ганцад хоригдож байгаад гарч ирээд буудалд боогоод үхсэн. Тэр хүний бичгийн хэвийг шүүх эмнэлгийнхэн мөн гээд тогтоочихсон. Гэтэл энэ хулгайн гэмт хэргийг эзэнтэй болгох шаардлага хэргийг байцааж байгаа мөрдөн байцаагчдад байгаа учраас ингэж улайрч байна. Үүний цаана Мөрдөн байцаагчид хэрэг илрүүлсэнийхээ төлөө албан тушаал ахих ашиг сонирхлын зөрчил байгаа учраас өөр хүнд тохож байна. Тийм учраас Авирмэдийн найз Валдансангид хэргийг тохсон.
-Хэдий хэр төгрөгний ямар эд зүйл хулгайлсан юм бэ?
-Хоёр хөөрөг хулгайлсан. Тэр хөөрөг нь 500 мянган төгрөгний л хөөрөг байна лээ. Гэтэл хохирогч нар нь учиргүй их мөнгө нэхсэн.
-Хэрэг хийсэн Авирмэдийн гэрээслэл дангаараа хэрэг хийгээгүй гэдэг баримт болох боломжгүй юу?
-Гэрээслэл нь нотлох баримт болох ёстой. Энэ гэрээслэлийг үнэлэх үнэлэмж нь шүүхийн байгууллагад байдаг.
Улмаар өмгөөлөгчдийг дээрх мэдээллийг сэтгүүлчдэд өгсөний дараа түүнийг батлан даалтад гаргажээ. Энэ талаар өмгөөлөгч Ц.Баасандоржоос тодруулахад "Вандансэнгэ 37 хоног өлсгөлөн зарлаад биеийн байдлыг харгалзаж үзээд шүүхээс батлан даалтад гаргасан. Одоо эмчилгээ хийгдээд явж байгаа. Ерөнхийдөө биеийн байдал нь хүнд гарсан. Одоо нөхөн сэргээх эмчилгээ хийгдээд явж байгаа. Энэ хэргийг хийгээгүй, намайг хилс хэрэгт хэлмэгдүүлж байна. Миний хийгээгүй хэргийг хүлээлгэх гэж байна гэдэг үндэслэлээр өлсгөлөн зарлаж, 38 хоног юу ч идээгүй. Энэ үед прокурор, цагдаагийн байгууллагаас өлсгөлөн зарлаад 33 хонож байхад очиж уулзсан. Гэхдээ ийм хүнд байгаа хүнийг үргэлжлүүлэн хорих арга хэмжээ авсаар байсан. Улмаар бид шүүх болоод олон нийтийн мэдээллийн хэрэгсэлд хандаж, батлан даалтад гаргасан. Шүүх хурал нь арай болоогүй байгаа. Хэрэг нь шүүх рүү шилжсэн, эрүүгийн хуулийн 145.4 гэсэн зүйл ангиар яллагдагчаар татагдсан. Энэ хэрэгт Вандансэнгээс гадна Балдандугар зэрэг хэд хэдэн хүмүүс байгаа. Хэргийн явцад Балдандугарын ах Авирмэд амиа хорлосон явдал гарсан. Авирмэдийн гэрээсэлд "Энэ хэргийг миний дүү хийгээгүй. Би өөрөө хийсэн. Цагдаа, хуулийн байгууллагын ажилтнууд намайг дарамталсан учир амиа хорлолоо" гэсэн агуулгатай гэрээсэл үлдээсэн байгаа. Үүнийг харамсалтай нь Ерөнхий прокурорын дэргэдэх мөрдөн байцаах алба ноцтой шалгахгүйгээр өнгөрсөн. Амиа хорлолт гэдэг үндэслэлээр л орхичихсон. Харин түүнийг хэн нэг цагдаа зодож, эрүүдэн шүүсэн асуудал байгаа юу, амиа хорлоход хүргэсэн нөхцөл байдлыг ч шалгаагүй. Дүү болоод найзыг нь аваачиж хориод, өөрийг нь гадуур байлгаж байхад амиа хорлосон. Одоо түүнийг нас барсан учир дүүд нь хэргийг нь хүлээлгэх гэж байна. Эцсийн шийдвэрийг шүүх гаргана"" гэв.
Д.Ундрах /24tsag.mn/
Сэтгэгдэл (13)