Увс аймгийн Тэс суманд өнгөрсөн сарын 23-нд Цагдаагийн тасгийн дарга нь хоёр цагдаатайгаа 57 настай иргэн Ч-г, дүүтэй нь, бас гудамжаар явж байгаад тусалсан иргэн Ч-г хамтад нь зодож, гэмтээсэн хэрэг гарсан талаар бид мэдээлсэн. Улмаар хохирогч иргэд гомдол гаргаж хуулийнханд ч хансдан байдаг.  Тэгвэл Увсын цагдаагийн газар уг хэрэгт эрүүгийн хэрэг үүсгэн шалгаж эхэлсэн байна.

Гомдол гаргасан иргэн Ч-ийн мэдүүлгээр бол тэр өдөр Ч хүүхдийнхээ хонхны баярт оролцохоор сумын төвд иржээ. Улмаар дүү Б-гийнхээ гэрт найзуудтай нь нэг шил пиво хувааж уугаад харихаар гарч, мотоциклоо асаах гэж байтал сумын хоёр цагдаа ирж саатуулан, “Каскгүй байна,Мотоциклийг чинь журамлана” гэжээ. Тэрээр өөрийнхөө учир байдлыг хэлж байтал цагдаагийн тасгийн дарга Банзрагч, хэсгийн төлөөлөгчийн хамт ирээд хөгшнийг чирж гулдран буулгаж хэсгийн байрандаа авч очино гэжээ. Гэтэл дүү нь хөгшин хүнийг явуулчих гэж гуйтал хамтад нь аваад явсан байна.  Улмаар хэсгийн байранд дээр авч ирж хоёуланг нь нэг нэгээр нь барьж зодоод дотуур хувцаснаас нь өөр зүйлгүй гадаа шонгийн модонд гавалсан гэж мэдүүлжээ.Мөн модонд хүлүүлсэн ах дүү хоёр хажуугаар нь явж байсан иргэн Ч-г дуудаж утсаар яриулахыг гуйжээ. Улмаар тэр хоёрт утсаар яриулсан Ч-г Тасгийн дарга Банзрагч “миний эзэмшил газарт дураараа халдлаа” хэмээн хэсгийн байрандаа оруулж зоджээ. Гудамжинд утсаар яриулсан гэмтэй иргэн Ч гурван хавиргаа хуглуулсан бол  57 настай өвгөн чихнийхээ хэнгэргийг хагалуулж, хамраа хугалуулсан гэсэн шүүх эмнэлгийн дүгнэлт гарчээ.

Гэвч хохирогчид ийн мэдүүлээд байгаа ч зарим эх сурвалжийн хэлж буйгаар тухайн үед  эдгээр иргэдийг саатуулсан цагдаа нар ч бэртэлтэй байгаа гэв. Тиймээс Увсын цагдаагийн хэлтсээс эдгээр иргэдэд ч, тухайн цагдаа нарт ч эрүүгийн хэрэг үүсгэсэн байна.