“Мунзуй” хочит Г.Нямдорж гэхээр л  Н.Номтойбаяр нүдэнд нь зурвасхийхээр болтлоо хүмүүст танигдаа биз ээ.  Тэгвэл сүүлийн үед Г.Нямдоржийг дуулиант ярилцлага өгөгч гэдгээр нь бүр л андахгүй болж байх шиг байна. Тэрбээр байсхийгээд л Н.Номтойбаярын “булхайг” дэлгэсэн томоохон ярилцлага өгдөг болоод удаж байгаа. Тэгвэл энэ удаад улс төрийн “акул”-ууд гэж хэлж болох Ерөнхийлөгч асан Н.Багабанди, Н.Энхбаяр, С.Баяр нартай холбоотой зарим мэдээллийг “чулуудаж” эхэллээ.

Өөрөөр хэлбэл, Монголын нэр нөлөө бүхий томоохон улс төрчидтэй “МАК” компани хэрхэн холбогдсон хийгээд Ерөнхий сайд асан С.Баярын талаар зарим баримтыг дэлгэлээ. Гагцхүү тэрбээр хэлсэн үгэндээ эргэж ороогдох зүйл хийхээргүй нотолгоо, баримттай зүйл ярьж л байгаа бол ярьсан зүйлээ баталж хуулийн байгууллагад хүртэл шалгуулах хэрэгтэй юм шиг. Харин хуулийн байгууллагынхан түүний ярьж хэлээд буй хууль бус үйлдлүүдийн мөрөөр шалгалтын ажиллагааг явуулах ёстой гэдгийг иргэд ч шаардаад байна.  Уг нь хуулийн байгууллага хэвлэл мэдээллээр гарч буй гэмт хэргийн холбогдолтой мэдээ мэдээлэл, эх сурвалжийг үндэслэн шалгалт явуулах бүрэн эрхтэй байдаг.  Харин “Мунзуй” хочитийн хэлээд буй мэдээ мэдээллийг шалгаж байгаа эсэх нь тодорхойгүй байгаа юм.

 Хэрэв Г.Нямдоржийн  хэлж байгаа бүхэн үнэн бол  “овоо хараа”-нд нь өртсөн нөхөд ял шийтгэлээ, хүлээх хариуцлагаа ч бодитжуулж, харин тэрбээр ор үндэсгүй, нотолгоо баримтгүй зүйл ярьсан бол өөрөө хүн гүтгэсэн хэрэгт унах нь зүйн хэрэг билээ.

Түүний хэлж буйгаар С.Баяр Монголын алт /МАК/ грүппийг Сэргээн босголтын банкнаас 400 сая ам.долларын зээл авахад нь батлан даалт хийж байсан гэнэ. Тэрбээр энэ тухайгаа “С.Баяр гуай Европын Сэргээн босголтын банкнаас 400 сая ам.долларын зээл авахад нь батлан даалт хийж байлаа. “Пума” зочид буудалд уулзах гээд юу болж байлаа даа” гэв.
Тэгвэл Г.Нямдорж үүнийгээ хамгаалж чадах уу?. Эсвэл тогтоохгүй, нотлогдохгүй зүйл ярьж хүн гүтгэсэн хэрэгт унах уу?

Мөн түүний онцолж хэлээд буй тэр баталгаа нь ямар учиртай баталгаа юм. Юу барьцаалсан гэх зэрэг асуудлууд олныг гайхшруулаад байна.

Та бүхэн санаж байгаа бол ТӨХ-ний дарга асан  Д.Сугар Уулын баяжуулах “Эрдэнэт” үйлдвэрийг барьцаалж зээл авсан гэх Ш.Батхүүд  баталгаа гаргаж өгсөн байдаг. Улмаар энэ хэрэг өдгөө шалгагдаж байгаа. Тэгвэл “Мунзуй” Г.Нямдоржийн  хэлж буй мэдээллийн мөрөөр хуулийнхан С.Баярыг батлан даалтад гаргасан гэдгээр шалгаж чадах уу?

Ер нь С.Баярыг албан тушаалаасаа бууснаас хойш түүнтэй холбоотой хэл ам нэг бус удаа гарсан. Гэвч энэ бүхнийг холбогдох хууль хяналтын байгууллагынхан  үгүйсгэж, төдийлөн газар авалгүй шийдэгдчихдэг байсан.

Тэгвэл “Атман” гэдгээрээ алдар цуутай Г.Нямдорж С.Баярын талаар үг унагасан нь хэрхэн шийдэгдэх бол. Эсвэл тэр дуугарч, бид сонсоод л өнгөрчих үү?