Улсын Дээд шүүхийн хяналтын шатны захиргааны хэргийн шүүх хуралдаанаар “Хүчит шонхор” ХХК-ийн нэхэмжлэлтэй, Шударга өрсөлдөөн, хэрэглэгчийн төлөө газрын улсын ахлах байцаагч Г.Энхманлайд холбогдох захиргааны хэргийг хариуцагч, түүний итгэмжлэгдсэн төлөөлөгч нарын гаргасан гомдлын дагуу уржигдар хянан хэлэлцлээ.

“Хүчит шонхор” ХХК-аас “Шонхор” хүнсний захын павилонуудын түрээсийн төлбөрийг ялгавартай хэмжээгээр тогтоосон нь хууль тогтоомжид нийцэж байгаа эсэх асуудлаар ШӨХТГ-ын улсын ахлах байцаагч Г.Энхманлай, улсын байцаагч Ж.Очирхуяг нар шалгалт хийж,

ялгавартай төлбөр тогтоосон нь Өрсөлдөөний тухай хуулийн 7 дугаар зүйлийн 7.1.3-т “...зах зээлд ижил төрлийн бараа бүтээгдэхүүнийг ялгавартай үнээр борлуулах, үндэслэлгүйгээр борлуулалт хийхээс татгалзах”-ыг хориглоно гэсэн заалтыг зөрчсөн гэх дүгнэлт хийн 2013 оны 6 дугаар сарын 3-ны өдрийн “Зөрчил арилгуулах тухай” 5/137 дугаар албан тоотоор “ижил хэмжээ бүхий талбайтай объектод ялгавартай түрээсийн төлбөр тогтоохгүй байх” шаардлага хүргүүлжээ.

ШӨХТГ-ын улсын байцаагчийн 2013 оны 7 дугаар сарын 15-ны өдрийн 0000109 дугаар шийтгэврээр “...улсын байцаагчийн албан шаардлага биелүүлээгүй” гэх үндэслэлээр “Хүчит шонхор” ХХК-д 110 сая 646 850 төгрөгийн торгууль ногдуулсан, торгуулийн хэмжээг тогтоохдоо “...компанийн түрээсийн үйлчилгээний борлуулалтын орлогыг тодорхойлох боломжгүй” гэх үндэслэлээр Өрсөлдөөний тухай хуулийн 27 дугаар зүйлийн 27.2-т заасан“…/компанийн/ өөрийн хөрөнгийн 5 хүртэл хувьтай тэнцэх хэмжээний төгрөгөөр торгох” гэснийг баримталсан байна.

“Хүчит шонхор” ХХК уг шийдвэрийг хууль бус гэж шүүхэд хандсан, илт хууль бус болохыг тогтоож, хүчингүй болгуулах нэхэмжлэлийн шаардлага гаргасан үндэслэлдээ “...түрээсийн төлбөрийг ижил хэмжээтэй болгох компанийн саналыг түрээслэгч нар зөвшөөрөөгүй, ...түрээсийн гэрээгээр тохиролцсон төлбөрийн хэмжээг компани дангаараа өөрчлөх боломжгүй”, “...түрээсийн орлогыг тодорхойлох боломжтой байсан” гэжээ.

Захиргааны хэргийн анхан шатны 20 дугаар шүүх дээрх хэргийг 2014 оны 1 дүгээр сарын 6-ны өдөр хянан хэлэлцээд “...түрээсийн гэрээг “харилцан тохиролцож хийх” Иргэний хуулийн заалтыг баримталсан байна, ... “Хүчит шонхор” ХХК нь Өрсөлдөөний тухай хуулийн 7.1.3-т заасан ноёлох үйл ажиллагаа явуулах зорилгоор лангууны түрээсийн төлбөрийг ялгавартай тогтоосон гэж үзэхгүй”,“...Өрсөлдөөний тухай хуулийн 27 дугаар зүйлийн 27.2-ыг баримталж торгууль ногдуулсан нь үндэслэлгүй” гэж дүгнэн ШӨХТГ-ын улсын байцаагчийн 2013 оны 7 дугаар сарын 15-ны өдрийн 0000109 дүгээр шийтгэврийг хүчингүй болгож шийдвэрлэсэн байна.

Захиргааны хэргийн давж заалдах шатны шүүх 2014 оны 4 дүгээр сарын 9-ний өдөр хариуцагчийн давж заалдах гомдлоор хэргийг хянан хэлэлцээд анхан шатны шүүхийн шийдвэрийг хэвээр үлдээжээ.

Хариуцагчийн хяналтын журмаар гаргасан гомдлоор Улсын Дээд шүүхийн хяналтын шатны захиргааны хэргийн 2014 оны 6 дугаар сарын 16-ны өдрийн шүүх хуралдаанаар дээрх хэргийг хянан хэлэлцээд шүүх бүрэлдэхүүний олонхийн саналаар анхан болон давж заалдах шатны шүүхийн шийдвэрүүдийг хэвээр үлдээлээ.

Санал хураах явцад шүүгчийн тусгай санал гарсан тул Монгол Улсын шүүхийн тухай хуулийн 31 дүгээр зүйлийн 31.5-д заасны дагуу шүүгчийн тусгай саналыг хяналтын шатны шүүх хуралдааны тогтоолд хавсаргах талаар шүүх хуралдаанд оролцогчдод мэдэгдсэн байна.