Сүүлийн хэд хоног улс төрийн мэдэгдэлүүдээр дүүрэн болж өнгөрлөө. Учир нь МАХН гурван удаа мэдэгдэл гаргацгаалаа. АН-ын хэсэг гишүүд, дэмжигчид бас дуугүй суусангүй мэдэгдэл гаргаж 1996-2000 он давтагдах гэж байна шүү дээ хэмээн удирдлагууддаа  сануулав. Парламентад  суудалгүй  улс  төрийн  намууд  хоёр  ч  удаа  Ерөнхий  сайдыг  огцрохыг шаардаж албан тоот илгээн мэдэгдэж, хэвлэлийн бага хурал хийв.

ИЗНН-аас сонгогдсон УИХ-ын  гишүүн  С.Дэмбэрэл,  ИЗНН-д  байсан  М.Зоригт  нар  УИХ-ын  ээлжит  бус чуулганыг яаралтай хуралдахыг шаардаж мэдэгдэл гаргав. Хамгийн сүүлд МАН өчигдөр орой бас мэдэгдэл гаргалаа. Үндсэндээ мэдэгдэл гаргаагүй нам гэж үлдсэнгүй. Ямар нэгэн хэмжээгээр л мэдэгдэлд орооцолдцгоов. Ийн Монголын улс төрийн бүх нам, улс төр эхлэх болоогүй налгар тайван намраар ямар нэгэн байдлаар хөдөлцгөөж эхэлсэн нь анхаарал татах боллоо. Монголын улс төрийн түүхэнд  ийм  налгар  тайван  намар  цагаар  бүх  намууд  ээлж  дараалан  мэдэгдэл  гаргаж байсан түүх үгүй. Харин энэ жил бүгд л дуугарч байна.

Гэхдээ МАН-аас бусад нь бүгд л улс төрийн дотоод тэмцлийнхээ талаар тунхаглаж бие биесээ хэмлэх боллоо. МАХН гэж ээлж дараалан бие биесийнхээ эсрэг мэдэгдэл гаргадаг хүчин бий боллоо.

Тэд хоёр асуудлаар эрүү үүсгүүлсэн Н.Энхбаяр даргыгаа өмөөрсөн, одоогийн  зарим  удирдлагаа  огцрохыг  шаардсан,  дотроосоо  буруутан  хайсан,  засагт хамтарч байгаа АН-аа гутаасан өнгө аяс дээр л тоглоцгоож байна. АН-ынхан  дотоод эв  нэгдлээ  л  ярьж  байна.  Цагдаа,  тагнуул,  АТГ гээд  энэ  намынхан сүүлийн үед хүчний байгууллагыг л тойрч хэрүүл тэмцэл хийдэг  боллоо.

Учир нь тэд хүчний байгууллагаар дамжуулан эсвэл хүчний байгууллага дахь нөлөөллөө хадгалах гэж л авалцаж эхлэв. Бас Засгийн газраа огцруулах, огцруулахгүйн төлөө тулалдаж байна. Ийм асуудалтай байгаа  эрх баригчдын эсрэг  парламентын гадна  байгаа  10  гаруй намынхан нэгдэв. Тэд АН-ын дарга, Ерөнхий сайд Н.Алтанхуягийг огцрохыг шаардаж "БНХАУ-ын даргатай хэлэлцээрт орох чадваргүй" мэтээр хандах болов.

Харин энэ бүхний эсрэг МАН-ынхан зогсож байна. МАН-ынхан тулхтай, туршлагатай хүчний хувьд эв нэгдлийг эрхэмлэх болсон нь анхаарал татлаа. Уг нь Засгийн газрыг огцрох ёстой гээд жижиг намуудтай нийлээд орилж явах ёстой улс төрийн хүчин огт өөр манлайлал, дүр төрхийг бүрдүүлэх боллоо. МАН-ынхан парламентын гаднах жижиг намуудтай нийлж Засгийн газрыг муулсангүй. Харин ч жижиг намуудыг, эрх баригчдыг хоёр том хөршийн удирдлагуудын айлчлалын өмнө эв нэгдэлтэй байхыг уриалж, үлгэр дууриал үзүүлэх болов. Өөрөөр хэлбэл МАН-ынхан БНХАУ-ын дарга Ши Жинпин, ОХУ-ын Ерөнхийлөгч В.Путины айлчлалд ач холбогдол өгч, үр дүнтэй болгохын төлөө санаачилга гаргав. МАН-ын бүлгийнхэн мэдэгдэлдээ "Монгол Ардын Нам улс орныхоо тусгаар тогтнол, хөгжил дэвшил, хүн ардынхаа сайн сайхны төлөө нэгэн үзүүрт сэтгэлээр хандаж ирсний хувьд хоёр хөршийн төрийн тэргүүнүүдийн айлчлалыг чухалчлан үзэж, хувийн болон нам, бүлэглэлийн эрх ашгаас илүүтэйгээр улс үндэстнийхээ эрх ашгийг эрхэмлэн дор бүрнээ эв нэгдэлтэй байхыг улс төрийн бүхий л намууд, төрийн бус байгууллагуудад уриалж байна. Үндэсний аюулгүй байдлын үзэл баримтлал, гадаад бодлогын асуудлуудаар улс төрийн бүхий л намууд нэгдмэл байж, улс эх орныхоо эрх ашгийг тэргүүн эгнээнд тавьж ажиллана гэдэгт итгэж байна" хэмээн уриалав.

МАН-ынхан БНХАУ, ОХУ-ын төрийн тэргүүнүүдийн айлчлалыг уналтад орсон эдийн засгаа сэргээх, гадаадын хөрөнгө оруулалтыг нэмэгдүүлэх, томоохон төслүүд дээр хамтран ажиллах түүхэн боломж хэмээн тодотгож байна. Тийм өнцөгөөр харж байна. Ийм цонхоор харцгаа гэж бусдыгаа уриалав. Гэхдээ "хоёр хөршийн төрийн тэргүүнүүдийн айлчлалын үеэр хэлэлцэх эдийн засгийн асуудлуудыг ил тод, нээлттэй байдлаар шийдвэрлэх ёстой" гэж эрх баригч нарт сануулахаа мартсангүй.

Ерөнхийд нь дүгнэж үзвэл ах намынхан хоёр хөршийнхөө айлчлалыг боломж, ховор түүхэн тохиол, түүнийг ашиглах ёстой гэж буурь зааж байна. Ийм чухал айлчлалын өмнө ч, айлчлалын үеэр ч улс төржиж улсаа нураах хэрэггүй. Гадаад ертөнц рүү нэг бодлогоор, нэг цонхоор харцгаая гэж бусдыгаа уриалав. Харин дотоод асуудал, хүндрэлээ дотроо ярилцацгаая. Айлчлалын дараа хэлэлцэцгээе гэж хойшлуулж байна. МАН-ын бүлгийн энэ санаачилга олон нийтэд таалагдаж байна. Харин улс төрийн бусад намууд хэрхэн хүлээн авч, тайлбар хийхийг хэлж мэдэхгүй юм.

Энэ байдлаас дүгнэж үзвэл МАН-ын бүлгийнхэн хоёр хөршийн айлчлалын өмнө Засгийн газрыг хөдөлгөх ямар нэгэн акци хийхээргүй шийдсэн бололтой. Харин ч шүүмжлээд байсан Засгийнхаа гадаад бодлогыг дэмжих бололтой болоод явчихлаа хэмээн ажиглагчид дүгнэж байна.