МАХН-аас энэ жилийг Намын анхан шатны байгууллагуудыг бэхжүүлэх жил болгон зарласан. Энэ дагуу тус намаас Шударга ёсны хуралдай, бүсчилсэн зөвлөлгөөнийг хийж байна. Өнгөрсөн хугацаанд хангайн болон төвийн бүсийн зөвлөлгөөнийг хийсэн бол энэ удаад баруун бүсийн зөвлөлгөөнийг Увс аймгийн Хяргас нуурын хөвөөнд хийлээ. Зөвлөлгөөнд Увс, Завхан, Баян-Өлгий, Ховд, Говь-Алтай аймгийн МАХН-ын анхан шатны байгууллагын идэвхтэн сонгуультан, гишүүд дэмжигчид оролцлоо. Нийтдээ баруун таван аймгийн 200 гаруй гишүүд дэмжигчдийг хамруулсан энэ удаагийн зөвлөлгөөнд МАХН-ын даргын ажлын алба хариуцсан Нарийн бичгийн дарга
П.Цогтбаатар, Нийслэл хариуцсан Нарийн бичгийн дарга Г.Бямбасүрэн, Сургалт судалгаа, гадаад харилцаа хариуцсан Нарийн бичгийн дарга З.Батбаяр нар байлцаж, алслагдал аймгийн гишүүд дэмжигчдээ чадавхижуулах, намаас барьж буй бодлого, гарч буй шийдвэр, цаашид авч хэрэгжүүлэх арга хэмжээний талаар мэдээлэл өгсөн юм.
Аливаа улс төрийн хүчний амин сүнс нь анхан шатны байгууллага, тэдгээрийн чадавхийн асуудал байдаг. Тийм учраас МАХН-ын зүгээс анхан шатны байгууллага, салбар хороодын үйл ажиллагааг жигдрүүлэх, аймаг аймгийн намын хороодын арга туршлагыг өвөр зуур нь солилцуулах, тэднийг нэгтгэх зорилгоор энэ удаагийн зөвлөлгөөнийг зохион байгуулж байна.
Увс аймгийн Хяргас нуур нь монголын гуравдагч том нуур. Тиймээс ч энэ удаагийн зөвлөлгөөнийг улс төрийн гуравдагч хүчин МАХН Хяргас нуурыг сонгож зөвлөлгөөнөө хийсэн нь зүгээр нэг тохиол биш гэдгийг Увс аймгийн МАХН-ын хорооны дарга С.Амараа хэлж байсан.
Хяргас нуурын хөвөөнд чуулсан МАХН-ын гишүүд дэмжигчид хий улс төржих, хэт нэг талыг барьсан шүүмжлэл өрнүүлэхээс илүүтэй баруун хязгаарын ард иргэдийн амьдралын бодит үнэн, тулгамдаад буй асуудлуудыг өвөр зуураа хэлэлцэхийг илүүд үзэж байлаа. Тэд МАХН-ыг ямар нэг эрх ашгийг харж, хэн нэгэн даргаас албан тушаал гуйх гэж биш зөвхөн өөрсдийн итгэл үнэмшлээр сонгож, өөрсдийн үйл хэрэг болгон явдгаа илэрхийлж байснаас харвал энэ удаагийн зөвлөлгөөнөөс энгийн амьдралын бодит үнэнд тулгуурласан, хэрэгжүүлэх арга зам нь тодорхой шийдвэр гарсан гэхэд болно. Нэг үгээр хэлбэл итгэл, сэтгэл, зүтгэлээрээ нэгдсэн гишүүд энэ удаагийн зөвлөлгөөнд хамрагдлаа. МАХН-ын гишүүд баруун аймгуудыг холбосон авто замын сүлжээг яаралтай барьж дуусгах, байгаль орчны өмнө нүүрлээд буй бодит аюулаас урьдчилан сэргийлэх, бүсийн нэмэгдэл гэж ярьсаар удаж буй асуудлыг бодитоор ажил хэрэг болгох талаар тэд өөрсдийн санаа бодлоо илэрхийлж байсан. Нийслэлээс алслагдмал эдгээр аймгуудад бүсийн нэмэгдлийг олгоё гэхээр бусад бүс нь барьцчихдаг. Тиймээс баруун бүсд нэмэгдлийг олгохдоо хүйтний нэмэгдэл гэдэг нэр томъёогоор оруулах нь оновчтой гэдгийг ч хэлж байв.
Нөгөө талаар жилээс жилд байгаль орчны доройтол газар авч байгаа энэ цаг үед байгалиа унаган төрхөөр нь хамгаалж үлдэхийг баруун аймгийн иргэд хүсч байна. Хөгжүүлэх шаардлагагүй зүйл бол байгаль. Түүнийг хамгаалах нь өөрөө хөгжлийн том түшиц гэдгийг МАХН-ын гишүүд дэмжигчид хэлж байна. Мөн уул уурхайн олборлолттой холбоотой санал шүүмжлэл гарч байв. Тэд нэгэнт эдийн засгийн нэг хөдөлгүүр болсон уул ууршхайг ашиглахыг эсэргүүцэхгүй байгаа ч нэгэнт ашигласан талбайг нөхөн сэргээж унаган төрхөнд нь оруулахад онцгой анхаарахыг сануулж байсан.
МАХН-ын гишүүд дэмжичгдийн дунд томоохон хүлээлт үүсгээд байгаа өөр нэг асуудал нь МАХН-ын дарга Н.Энхбаяр хэзээ эх орондоо ирж, ажил хэргээ явуулах вэ гэдэг асуулт байв. Энэ асуултад МАХН-ын Нарийн бичгийн дарга П.Цогтбаатар хариулахдаа, “Биеийн байдал бүрэн гүйцэт эдгэрч, тэнхэрсэний дараа эх орондоо ирэх болно. Тэр цаг ойрхон байгаа. Түүнээс биш зарим нэг хэвлэлээр гараад байгаа шиг Н.Энхбаяр даргад эрүүгийн хэрэг үүсгэсэн, МАХН-ын байрыг лацдаж битүүмжилсэн асуудал байхгүй” гэв. Баруун бүсийнхний хувьд ч энэ тал дээр санал нэг байсан бөгөөд хэвлэл мэдээллийн хэрэгслээр цацагдаж буй гүжир гүтгэлгийн шинжтэй мэдээллүүдэд МАХН-ын удирдлагуудын зүгээс няцаалт хийх, нөгөө талаар МАХН, тус намын дарга Н.Энхбаярын нэр хүнд өрдөөс өдөрт өсч буй энэ цаг үед энэ мэт дайралтуудад итгэхгүй байхыг нэг нэгэндээ сануулж байсан юм.
Баруун бүсийнхний зөвлөлгөөн спортын арга хэмжээгээр үргэлжилж, гар бөмбөг, сумо бөхийн барилдаан, хөл бөмбөг, олс таталтын төрөл тус бүрт аваргуудаа шалгаруулснаар өндөрлөсөн.
МАХН-аас зохион байгуулж байгаа зөвлөлгөөний удаах нь зүүн, говийн бүсүүдэд бол болон нийслэлд болохоор төлөвлөгдсөн байна. Эдгээр зөвлөлгөөнийг зохион байгуулсаны дараагаар тус намаас эх орны дөрвөн зүг найман зовхист байгаа гишүүд дэмжичгдийнхээ санал шүүмжлэлийг нэгтгэн бодлогын томоохон барим бичиг гаргахаар төлөвлөсөн байна. Энэ баримт бичиг нь цаашид тус намын нэн тэргүүнд хэрэгжүүлэх зорилт болж явах аж.