Ц.Оюунгэрэл сайд дүү Ц.Батаасаа болоод  “Шүгэл үлээгчдийн эрхийг хамгаалах хууль” гээчийг өргөн барихаар шийджээ. Энэ хууль нь Ардчилсан гэх тодотголтой бүх орнуудад үйлчилдэг гэнэ.

Түүний хэлж буйгаар энэ хуулийг санаачлан өргөн барьж, цаашлаад дэмжигдэж хэрэгжиж эхэлснээр хэн нэгнийг шүүмжилсэн иргэн хуулиар хамгаалагддаг болох  аж.

Түүнийхээр бол дүү нь хуульгүй ертөнцөд, хамгаалалтгүй ардчиллын хохирогч болсон. Тиймээс ч дүүгийнхээ болоод дүүтэйгээ адилхан ял хүртэж болох хүмүүсийн төлөө ийн хууль санаачилж байгаагаа онцоллоо.

Гэвч сайдын энэ саналыг хүлээж авахгүй, дэмжиж сайшаахгүй иргэд цөөнгүй байна. Учир нь зарим хүмүүс хууль санаачлагч, өргөн баригчид хэн нэгэн хамаатан садан, анд нөхөр нь ял зэмлэл хүртэхээр л гэнэт ухаан орсон аятай аашлаад байгаа нь зүй бус хэрэг гэж үзэж байгаа юм.

Одоогоос яг жилийн өмнө Ж.Батзандан гишүүн Ц.Оюунгэрэл сайдад дургүйцлээ илэрхийлж, сөргөөцөлдөөд төрийн өндөр албан тушаал хашиж байгаа хэн боловч гадаадын хар, шар нөхдүүдтэй дэр нэгтгэж  болохгүй гэх утгатай хууль санаачилж байсан. Энэ бол яалтачгүй цэвэр улс орны эрх ашиг, хууль эрхзүйн хэрэгцээ гэхээсээ  хувь хүний үзэмжээр санаачлагдсан хууль.

Тиймээс ч  тухайн үед хүмүүсийн шүүмжлэлийг дагуулж, хэл амыг багагүй дагуулсаар алга болсон. Өөрөөр хэлбэл, дэмжигдээгүй.

Тэгвэл Ц.Оюунгэрэл сайд  дүүгийнхээ эрхийг хамгаалж “Шүгэл үлээгчийн эрхийг хамгаалах хууль” санаачилж байгаа нь хэр зохимжтой вэ?. Эсвэл эрх баригчдын ах дүү, хамаатан садан хэн нэгэнд заавал нэг зүйл тохиолдсоны дараа тэд амьдралд хэрэгтэй хууль санаачилдаг, иргэдийг хамгаалдаг, ойлгодог “баатар” болоод хувирчихдаг юм уу?

Ардчилалын төлөө тууштай зүтгэсэн гэж ярьсаар ирсэн энэ хатагтай өмнө нь олон арван сэтгүүлч,  санаа бодлоо илэрхийлэгчид ийн  хэлмэгдэж, хоригдож байхад тэгвэл юу хийж өгсөн юм бэ?

Гэтэл дүү нь хоригдоод хэд ч хоноогүй  байхад дуу хоолойгоо чөлөөтэй илэрхийлсэн ард иргэдийг, хэвлэн нийтлэх эрх чөлөөгөө хасуулж болох сэтгүүлчдийг хамгаална гэдгээ зарлаад эхлэх юм.

Ер нь энэ мэтээр манай хууль тогтоогчид нэгэнтэйгээ тэрсэлдэж, хэн нэг хамаатныхаа төлөө хууль санаачилж явсаар байвал  хууль тогтоох байгууллага дампуурч дуусах биш үү. Хууль тогтоож байгаа арга барил нь эрх зүйн шаардлага гэхээсээ илүү тухайн хүнд тулгамдсан асуудлаар үргэлжилдэг цагаандаа гарсан энэ байдлыг хэрхэх вэ?

Энэ тал дээр төр засаг барьж байгаа АН-ын удирдлагууд шийдвэр гаргаж, үг унагах хэрэгтэй бус уу?
Энэ мэтээр хуулийг тоглоом  болгож, 76 гишүүн таалагдсан зүйлийнхээ төлөө болон таалагдаагүй зүйлийнхээ төлөө хууль санаачлаад байвал улс орон юу болж хувирах юм бэ?

Ер нь цаашлаад АН засаг барьж байх үед Монгол Улс хэвлэлийн эрх чөлөөгөөр ухарч, авлигаар урагшилж байна гэх хардлагатай ард иргэдийн үзэл бодол ч хоосонгүй болоод явчихаж байгаа юм биш үү дээ.

Харин А.Гансүх сайдын хувьд Ц.Батыг шүүмжилснийх нь хариуд  цалинг нь хасч, тушаал дэвшүүлэхгүй, эцэст нь бүр ажлаас халах хүртэл арга хэмжээ авч байжээ. Улмаар энэ асуудал нь даамжирсаар цагдаа, шүүхийн байгууллагаар хэлэлцүүлэхэд хүргэснийг Ц.Оюунгэрэл сайд онцолжээ.