Австралийн “Рио Тинто” компани Оюутолгойн ордын 66 хувийг эзэмшдэг "Айвенхоу Майнз" компаний хяналтын багцыг авч, цаашлаад бүх хувьцааг нь худалдаж авах болсон талаар өнгөрсөн долоо хоногт мэдээлсэн. Тиймээс дэлхийн зах зээл дээр “Айвенхоу Майнз” компаний хувьцааны ханш тогтворгүй болж унаж эхэлсэн. Энэ долоо хоногт ч уналт үргэлжилсээр байгаа бөгөөд өчигдрийн хаалтаар 4.98 хувиар доошилж, нэгж хувьцаа нь 16.23 ам.доллар боллоо. "Рио Тинто" тус компаний 51 хувийг худалдаж авах үед буюу яг долоо хоногийн өмнө "Айвенхоу Майнз"-ын нэг ширхэг хувьцаа Торонтогийн биржид 4.2 хувиар буурч, 17.53 долларт хүрч байсан юм.
  “Айвенхоу Майнз”-ын 15.1 сая ширхэг хувьцааг нэгж бүрийг нь 20 канад доллараар худалдаж авсан “Рио”-гийнхон ойрын үед нэмж хувьцааг нь авахаар төлөвлөгөөгүй байгаагаа мэдэгдсэн. Гэсэн ч цаашид үнэ нь буурсаар байвал хямд үнээр Айвенхоу, түүний мэдэлд буй Оюутолгойг бүрэн эзэмших  цаг ойрхон болоод байна.