Яахаараа бид Монголын мах идэж болдоггүй юм? Энэ үгийг Эрхүү мужийн захирагч Дмитрий Мезенцев хэлжээ. Өчигдөр болсон Эрхүү мужийн Засгийн газрын хуралдаан дээр тус бүс нутгийн махны хангамжийн талаар хэлэлцсэн байна.
Яахаараа бид Монголын мах идэж болдоггүй юм? Энэ үгийг Эрхүү мужийн захирагч Дмитрий Мезенцев хэлжээ. Өчигдөр болсон Эрхүү мужийн Засгийн газрын хуралдаан дээр тус бүс нутгийн махны хангамжийн талаар хэлэлцсэн байна. Мал эмнэлгийн газрын дарга Б.Балыбердин “Монголд шүрхий намжсан болохоор манай нутаг дэвсгэрийн хорио цээрийн нөхцөл байдал харьцангуй тайван болсон” гэж мэдээлсний дараа мужийн захирагч удирдлагад нь байдаг хүмүүсээ чанга дуугаар зэмлэж эхэлсэн байна.-Хэдэн жил хөлдүү хадгалсныг нь хэн ч мэдэхгүй, бидний хоол болтлоо ертөнцийн хагасыг туулж ирдэг Бразили, Аргентины мах худалдаж аваад байдгийн учрыг надад тайлбарлах хүн байна уу? Хажууханд махны томоохон нийлүүлэгч Монгол гээд хөрш маань байж байхад одоо болтол манайх хөрөнгө оруулалт хийчихдэггүй юм уу? Махаа ч аваад, чанарыг нь ч хянаад байж болмоор юм. Яагаад одоо болтол энэ талаар юу ч хийгээгүй байдаг билээ хэмээн Д.Мезенцев бууж гарчээ.
Үнэхээр ч Эрхүү мужийн махны хэрэгцээний дийлэнхийг гаднаас хангадаг. Жил бүр энэ муж 30 мянган тонн мах гадаадаас авдаг бол 80 мянган тонныг Оросын бусад мужаас нийлүүлдэг юм.
Даргынхаа уурссан асуултын хариуд Монголоос мах авч чадахгүй байгаа шалтгаанаа Эрхүүгийн түшмэд ингэж тайлбарлажээ.
- Монголд шүлхий дэгдсэнээс болж хэдэн жил махны нийлүүлт зогсоод байсан. Одоо өвчний тархалт буурч, байдал ерөнхийдөө сайжирсан. Зөвлөлтийн үеийн хэмжээнд хүртэл Монголын мал эмнэлгийг өөд нь татахын тулд зөндөө ажил хийх хэрэгтэй. Одоогоор энэ чиглэлээр Эрхүүд Монголын зургаан мэргэжилтэнг сургаж байгаа. Манай мал эмнэлгийнхэн ч газар дээр нь очиж Монголын мэргэжилтнүүдэд тусладаг. Хөрөнгө оруулалтын тухайд манай нэг томоохон үйлдвэрлэгч Улаанбаатарт махны үйлдвэр барихаар монголын талтай хэлэлцээ хийж байгаа. Гэхдээ Монголын зах зээл рүү гадныхан их хошуурч байгаа болохоор хэлэлцээр хийхэд амаргүй байна гэж хариулжээ.
Харин Эрхүү мужийн захирагч “Хэдэн жилийн дараа мах боловсруулах салбарыг өөд нь татах механизмаа өнөөдөр бий болгох ёстой. Өөрсдөө ч малаа өсгөе” гэж зааварчилсан байна.
