Энэ өдрүүдэд бенди буюу бөмбөгтэй хоккейн дэлхийн аварга шалгаруулах тэмцээн энүүхэн Казахстаны Алматыд болж байна. Дэлхийн тэмцээний ”С” группт Монголын шигшээ багийн нэр зоолттой байгаа ч ноднин жилийн Азийн тоглолтын мөнгөн медальтнууд ирсэнгүй. Шалтгаан нь мөнөөх л мөнгө.Казахстаны Хоккейн холбооны ерөнхий нарийн бичгийн дарга Владимир Савченко “2006 оноос эхлэн Монгол дахь Оросын үнэн алдартны сүм энэ улсын үндэсний шигшээ багийг ивээн тэтгэх болсон. Гэвч тэд энэ удаа ДАШТ-д тамирчдаа авчрах мөнгө олж чадсангүй. Бас өөр нэг холбоо Монголд байгуулагдаад хоорондоо асуудалтай байх шиг байна. Монголын баг ирээгүй нь үнэхээр харамсалтай хэрэг” гэжээ.
Багийн бас өвлийн спортоор Азийн тоглолтын цорын ганц мөнгөн медаль эх орондоо авчирсан Монголын бендичид ДАШТ-д оролцохоор бэлтгэлээ эрчимтэй базааж байгаа тухай оны өмнөхөн манай хэвлэлүүд мэдээлж байлаа. “Казахстаны Астана хотноо зохиогдсон Азийн өвлийн спортын долоодугаар их наадамд амжилттай өрсөлдөж, Монголынхоо түүхэнд Азийн өвлийн спортын наадмын анхны мөнгөн медалийг Монголын бөмбөгтэй хоккейн үндэсний шигшээ баг авчирлаа” гэж 2011 оны спортын онцлох үйл явдлаар ч нэрлэжээ.
-Бэлтгэл сайн байгаа учир "Алматы-2012"-аас медаль авах боломжтой гэж Монголын бэндийн холбооныхон “Өдрийн сонин”-д ярьж байлаа. Монголын Бөмбөгтэй Хоккейн Холбооны /МБХХ/ерөнхийлөгчөөр Ж.Гүррагчаа, дэд ерөнхийлөгчөөр Ч. Баасандаваа ажилладаг юм. МБХХ 2002 онд байгуулагдаж, баг тамирчид 2006 онд Шведэд болсон ДАШТ-нд анх удаа оролцсон байна.
Гэвч Монголд бендиг хөгжүүлэх гэж хөрөнгө, цагаа үрж, үнэн сэтгэлээсээ зүтгэж явдаг хүн бол монгол бус орос, тэр тусмаа лам хүн байдаг. Энэ хүн бол Улаанбаатар дахь үнэн алдартны Гэгээн Троицийн сүмийн лам Алексей Трубач. Төр засаг, олон нийтийн ямар ч дэмжлэггүй, бор зүрхээрээ, -20 хэмийн хүйтэнд мэргэжлийн дасгалжуулагчгүй, сонирхож ирсэн монгол хүүхдүүдтэй хичээллэдэг энэ хүнтэй Монголын бендигийн амжилт холбоотой юм. Ламтан Алексей Трубач хэвлэлд өгсөн ярилцлагадаа:
-Монгол улсад байнга оршин суудаг эцэг, эхийн аль нэг нь орос, монгол үндэстэн, орос нэртэй гурван хүүхэд байна. Үлдсэн тамирчид Улаанбаатар хотын Баянзүрх дүүргийн уугуул оршин суугчид улс орныхоо нэр хүндийг өргөж байна даа. Санхүүгийн бэрхшээлийн улмаас манай багт байнгын дасгалжуулагч алга. Хүүхдүүд өөрсдөө бэлтгэл хийдэг. Бидэнд хийх зүйл их байна. Сүмийн дэргэд бөмбөгтэй хоккейн клуб байгуулахад би хөндлөнгөөс хараад сууж чадаагүй. Тэмцээний үеэр би Монголын шигшээ багийн цамц өмсөж байгаадаа бахархдаг. Монголын ард түмэнд ямар нэг байдлаар хамаатай, ойр хүн болсон санагдаж байна. Орос хоккей монголд төдий л дэлгэрээгүй, гэхдээ дэлхийн аварга шалгаруулах тэмцээнд Монгол улсаас оролцож байгаа цорын ганц багийн спорт юм. Өөр хаана Монгол-АНУ, Монгол-Канад гэсэн тоглолт үздэг билээ дээ гэж хоёр жилийн өмнө дурдаж байжээ.
2010 онд Монголын шигшээ багийн хаалгач М.Баярсайханыг Шведийн нэгдүгээр дивизионы мэргэжлийн клубт урьж, Орос, Казахстаны нэгдүгээр лигийн клубууд мөн дөрвөн ч тоглогчийг урих саналаа ирүүлж байв. Гэвч дан ганц халуун сэтгэлтэй гадны хүний дэмжлэгээр жилийн хагас нь жавар тачигнадаг Монголд бөмбөгтэй хоккей явах аргагүй нь ойлголмжтой. “Саяхан Ирландад болсон тэмцээний үеэр багийн тэргvvлэх зургаан хоккейч зугтаад үлдчихжээ. Баг шилдэг тоглогчидгvй хоцорсон нь бага хэрэг. Гэтэл энэхүү зургаан урвагч Ирландад амьдарч байхдаа ч багийн коллективт муугаар нөлөөлөх болсон байна. Тэд бусад хоккейчид руугаа байнга утасдаж тэднийг Ирланд руу дуудан “Энд хараар ажил хийгээд гайхалтай сайхан амьдарч байна” хэмээн амар заяа үзүүлэхээ больжээ” гэж 2008 онд гадны хэвлэлд манай багийн тухай бичиж байжээ.Ямартай ч Алматы дахь2012 оны дэлхийн аваргын тэмцээн 2011 оны Азийн тоглолтын мөнгөн медальт баггүйгээр үргэлжилж байна. ДАШТ-ий түүхийг сөхвөл Шведийн шигшээ 2009, 2010 онд аваргалсан бол оросууд ноднин нутгийнхаа мөсөн талбайд түрүүлсэн билээ.
24tsag.mn
