Валентино брэндийн шинэ загварууд

Парис хотын “Саломон де Ротсчил” Зочид буудлын танхимд Валентино брэндийн загвар зохион бүтээгчид шинэ коллекцоо танилцууллаа. Хатан хаан Мария-Антунеттагийн гарал угсаа, тосгоны энгийн дүр төрхийг гаргаж ирсэн загварууд нь коллекцийн гол дүр төрх байна. Хөвөн даавуун материал дээр сүүдэрлэн хээ гаргаж, цайвар дэвсгэр дээр эртний тансаг чимэглэлүүдээр гоёжээ. Бэлхүүс барьсан бөмбөгөр даашинзны чимэглэл, урт хормойг гоёход хэдэн зуун цаг зарцуулсан байна.

Эми Уайнхаусын хүндэтгэлд зориулсан коллекц

Загвар зохион бүтээгч Жан-Поль Готьегийн загварын шоунд жүжигчин Катрин Денёв, Дита фон Тиз мөн дуучин Бет Дитто нар хүрэлцэн ирсэн байна. Тэрбээр уг шоугаа дуучин Эми Уайнхаусын дурсгалд зориулжээ. 

Яриа: Жан-Поль Готье, Загвар зохион бүтээгч

“Энэ шоу Эми Уайнхаусын хүндэтгэлд зориулагдсан юм. Эми Уайнхаус өнөөг хүртэл бидний дунд оршсоор байгаа. Миний шоунаас түүний дуу хөгжим, хэв маяг гээд бүхнийг харж болно.”

 Түүний хит дууны хэмнэл дээр Эми Уайнхаустай адил үсээ янзалж, нүүрээ будсан, загвар өмсөгчид тайзнаа гарч ирлээ. Гар аргаар оёсон богино хүрэм, сүлжмэл поло даашинз, шотланд хээтэй хөхний даруулга, дэрвэгэр банзал зэрэг загваруудыг эндээс харж болно. Бүх загваруудад сүлжмэл хээ, эмжээрүүдийг оруулж өгсөн байна.

Максим Симоенсийн Япон загварууд

 Парисын загварын долоо хоногийн бас нэгэн шинэ коллекц бол загвар зохион бүтээгч Максим Симоенсийн загварууд юм. Тэрбээр загваруудаа Аргентины кино найруулагч Гаспар Ноэгийн “Хоосон орон зайд нэвтрэхүй” киноноос сэдэвлэн бүтээсэн бөгөөд Японы уламжлалт, орчин үеийн дүр төрхийг хослуулан бүтээжээ.

 Максим Симоенс, Загвар зохион бүтээгч

“Би загваруудаа Гаспар Ноэгийн “Хоосон орон зайд нэвтрэхүй” киноноос сэдэвлэн бүтээсэн юм. Энэ кинонд Японд ирсэн хоёр Австрали залуу Японы уламжлалт байдал мөн хэт орчин үеийн мэт тэр эсрэг тэсрэг орчинтой таарч байгаа тухай гардаг. Би энэ түүхийг өгүүлэхийг үнэхээр их хүссэн.”

Энэ бол Симоенсийн хувьд материал, хэмжигдэхүүн дээр ажилласан өргөн хүрээтэй судалгаа байсан юм. Киманоны материалаар хийсэн өндөр мөртэй, хувцаснуудын металь чимэглэлүүд нь илүү секси харагдуулж байна. Нугалсан хантааз, тууз, уран хатгамалаар чимэглэсэн даашинзуудыг уралжээ. Тайзнаас жинхэнэ орчин үеийн Самурай эмэгтэйчүүдийг харж болно.

 Шанелийн цэнхэр загварууд

Парисын загварын долоо хоногийн үеэр Шанель брэнд бодит хэмжээтэй нисэх онгоц бүхий тайзнаа хаврын шинэ загваруудаа танилцууллаа. Онгоцны үйлчлэгчид суудлын хоорондын зайнд алхан, загварын нисэх онгоцонд хөл тавьсан зорчигчдод оргилуун дарс санал болгосон юм. Шанелийн эхний загвар өмсөгч цэнхэр өнгийн богино ханцуйтай, өвдөгний дээгүүр татсан, гүн халаастай даашинз өмсөн гарч ирлээ. Үсийг нь залаа мэт дээшээ самнан, урт ээмэгнээс өөр гоёл зүүгээгүй байна. Дараа дараачийн загваруудад сүлжмэл хээ, усан цэргийн цэнхэр, эзэн хааны цэнхэр, цайвар цэнхэр зэрэг өнгөнүүдийг гаргажээ. Мөн даашинзуудыг чимэглэлүүдээр баяжуулан үдшийн даашинзуудыг бүтээсэн байна. Загварын шоуны төгсгөлийн гурван загвар хуримын даашинзууд байсөн бөгөөд бүхэлд нь сүлжмэл гялалзсан чимэглэлээр уралжээ. Цэнхэр хивсэн дээрх улаан хивсний ёслолын дараа хар хослол өмссөн, мөнгөлөг үстэй загвар зохион бүтээгч Карл Лагерфельд сурвалжлагчдад ярилцлага өгсөн байна. Тэрбээр “Би онгоцонд явах дуртай. Онгоцноос өөр тайван амарч болох газар хаана ч байхгүй” хэмээн хошигнон ярьжээ. Лагерфельд бэлхүүсээрээ сул загвартай, хүрээлсэн захтай, хуниастай сул даашинз зэрэг 154 гаруй төрлийн цэнхэр өнгийг уусгаж гаргасан хувцаснуудыг уралжээ.    

Загварын долоо хоногийн бичлэгийг энд дарж үзнэ үү