Монгол улсыннийтиргэд, Монгол Ардын Намын гишүүд, дэмжигчиддээ улс төрийн ууган хүчин Монгол Ардын Нам байгуулагдсаны 91 жилийн ой, Эх орончдын өдрийн мэндийг айлтган мэндчилье.
Энэ өдөр бол гадаадын харгис түрэмгийлэгчдээс улс орноо чөлөөлж, хүн ардынхаа эрх чөлөө, улс эх орныхоо тусгаар тогтнолыг байлдан олохоор Монгол Ардын Нам байгуулагдаж байсан, цогтой эх орончдын өдөр билээ.
Ардын Намын анхны долоо буюу Солийн Данзан, Догсомын Бодоо, Дамдины Сүхбаатар, Хорлоогийн Чойбалсан, Дансранбилэгийн Догсом, Дамбын Чагдаржав, Дарвзавын Лосол нар нийтийн зорилгын төлөө “амь бие, эд зоорио огоортол зүтгэсүгэй” хэмээн андгайлж, журмын нөхдөө удирдан манлайлсан эх орончид байлаа. Тэд тангарагийн бичигтээ “Монгол Ардын Намын зорилт нь: шашин үндсэнд харшлах харгис дайсныг цэвэрлэж, алдагдсан эрхийг эргүүлэн аваад, төр шашныг үнэн сэтгэлээр сайжруулан засамжилж, ядуу доод ард түмний тусыг туйлаар бодох ба дотоод хэргийг өнө үүрд сахиж, дарлах дарлагдахын зовлонгуй аж төрөхийг чухал болгоно.” гэж зааж байв. Энэ эрхэм зорилт нь он цагийн явцад огтхон ч элэгдэж хуучралгүй, өнөөдөр ч манай намын эрхэм зорилго, чиг шугам байсаар байна. Манай нам Бага хурлын хуралдаанаараа улс орноо ирэх 20 жилд хөгжүүлэх “Ард түмний хөгжлийн хөтөлбөр”-ийг боловсруулан баталлаа. Уг хөтөлбөрийн гол зорилт чухамхүү Анхны долоогийн анхлан хэлсэн эл бодлого, үзэл санаан дээр зангидагдаж байгаа нь манай нам уламжлал, шинэчлэлийн жинхэнэ түүчээ, зуун дамжсан үзэл санааны манлайлагч мөн болохыг илтгэж байна.
Өнөөдрийн байдлаар манай нам нийтдээ 220 гаруй мянган гишүүнтэй болжээ. Тэр дундаа Ардын нам гэсэн анхны нэрээ сэргээснээс хойш 53000 хүн манай намд шинээр элслээ. 8 жилийн өмнө гишүүдийн маань дундаж нас 41,8 байсан бол эдүгээ энэ тоо 34,6 болж багассан байна. Өөрөөр хэлбэл гишүүдийн маань нас ихээхэн залуужиж байна. Нийт намын гишүүдийн 60,2 хувь нь 18-45 насны залуучууд байна. Энэ нь МАН-ын бодлого, үйл ажиллагаа цаг үетэйгээ нийцэн, ирж буй цагийг зөв хөтлөн манлайлж буйг нотолж буй хэрэг мөн.
Манай нам, намын гишүүд улс орныхоо хөгжил дэвшил, тусгаар тогтнолын ачааны хүндийг үүрч, түүнийг бадрааж ирсэн түүхтэй. 1939 оны Халх голын , 1945 оны чөлөөлөх дайн, их бүтээн байгуулалт, аж үйлдвэрийн хувьсгал, нэгдэлжих хөдөлгөөн, атар газрыг эзэмших аяныг санаачлагч, түүнийг гардан зохион байгуулагч, хэрэгжүүлэгч нь ард түмэн, манлайлагч нь манай намынхан байв. Ардчилсан хувьсгалыг тайван замаар хэрэгжүүлж, шинэ Үндсэн хуулийг батлалцсан АИХ-ын депутатуудын 80 гаруй хувь нь мөн л манай намын тэргүүний гишүүд байлаа. Өнөөдөр ч Монгол Ардын нам хэцүү бэрхшээлийг тоочиж, бусдаас өө эрж бурууг хайлгүй, ачааны хүндийг үүрч улс орноо жолоодож байна.
Түүхийн хөгжлийн бүхий л үед манай намын гишүүд Ардын намын гишүүн байхыгаа эрх ямба, шагнал урамшуулал гэж хүлээж авч байсангүй. Харин ачаа үүрэх хариуцлага гэж хүлээж авч байлаа. Манай нам ачаа үүрэхээс зугтааж, залхуурч хойш сууж байсангүй. Бас эрдэж бярдахыг ямагт цээрлэж ирлээ. Түүхээ мэдэж, дурсах нь өнөөгийн үеийнхний бахархал. Гэвч өнөөгийн түүхийг нэр төртэй авч явж, хойч үедээ хөтөлж золгуулах нь түүнээс ч дутахгүй үүрэг хариуцлага мөн.
Монголчууд унаж яваа хүлгээ урагшилж байхад нь ороолгож ташуурддаггүй. Харин ч уухайлан дэм өгч урагшилдаг. Манай намд ард иргэд, гишүүдийн маань үнэн, шударга үгс ямагт “ташуур” болж байдаг. Манай намаас зохион байгуулсан Ард түмнээ сонсоё аяны үеэр иргэдийн маань санал, санаачлага өнөөдөр Ард түмний хөгжлийн хөтөлбөр, улс орны маань хөгжлийн чиглүүлэгч үзэл баримтлал болоод байна.
Та бүхэндээ МАН байгуулагдсаны 91 жилийн ой, Эх орончдын өдрийн мэндийг дахин хүргэж, цогтой золбоотой эх орончдын тайван уужуу ухаан бодлыг тэгш дүүрэн хослуулж, түвшин жаргалтай байхын ерөөлийг өргөе.
