НАТО-гийн Умард Атлантын зөвлөл “Монгол Улс, НАТО хоорондын түншлэл, хамтын ажиллагааны тусгай хөтөлбөр”-ийг энэ сарын 19-ний өдөр баталснаар манай улс Австрали, БНСУ, Япон, Шинэ Зеланд зэрэг улс орны адил НАТО-гийн түнш орны статустай боллоо.Энэхүү түншлэл нь энх тайван, ардчилал, хүний эрх, хууль ёс, олон улсын аюулгүй байдлыг бэхжүүлэх нийтлэг эрмэлзэлд үндэслэн, хоёр талын ашиг сонирхлын хүрээнд зөвлөлдөх, хамтран ажиллах замаар харилцан ойлголцлыг гүнзгийрүүлэх зорилготой аж.
Өнгөрсөн оны дөрөв дүгээр сард Берлин хотноо болсон НАТО-гийн гишүүн орнуудын Гадаад хэргийн сайд нарын уулзалтаар НАТО-гийн түншлэлийн шинэ үзэл баримтлалыг баталсан. Монгол Улс, НАТО-гийн түншлэл, хамтын ажиллагааны хөтөлбөр нь энэхүү шинэ үзэл баримтлалын хүрээнд байгуулсан анхны түншлэл, хамтын ажиллагааны хөтөлбөр болсноороо онцлог юм байна.
Уг хөтөлбөрийн хүрээнд Монгол Улсад тулгарч буй болон шинээр үүсч буй аюулгүй байдлын нийтлэг сорилтуудыг даван туулах, хямралаас урьдчилан сэргийлэх, тэдгээрийг зохицуулах механизмыг бий болгох, мэргэжилтэн солилцох, боловсрол, сургалт, дадлага зохион байгуулах чиглэлээр НАТО-той хамтран ажиллах боломж бүрдэж байна.
