-
2016 оны 10 сарын 19
Өнөөдөр улс орон даяар сум, дүүргийн ИТХ-ын 2016 оны ээлжит сонгуулийн санал хураалт явагдаж байна. Санал хураалт өглөөний 07:00 цагаас эхэлж бөгөөд оройн 22:00 цаг хүртэл үргэлжилнэ. Энэ удаагийн сонгуулиар 21 аймгийн 1613 баг,нийслэлийн есөн дүүргийн 152 хорооноос нийт 7282 төлөөлөгч сонгогдох юм. Сонгууль зохион байгуулахаар 1765 тойргийн хороо, 2082 хэсгийн хороо ажиллаж байна.
2016 оны УИХ-ын сонгуулийн ирцийн мэдээллийг Сонгуулийн ерөнхий хорооноос тухайлсан цагуудад тогтмол мэдээлж байсан. Харин орон нутгийн сонгуулийн үеэр дүүргүүдийн мэдээг нэгтгэх замаар Нийслэлийн сонгуулийн хороо 12:30 цагт ирцийн мэдээлэл хийх юм байна. Одоогийн байдлаар Нийслэлийн сонгуулийн хороонд дүүргүүдийн ирцийн мэдээлэл ирээгүй байгаа аж. Аймгуудын тухайд сумдын мэдээллээ нэгтгэж, сонгуулийн хорооноос нь мэдээлэхээр зохицуулалт хийгдэж байгаа аж.
-
2016 оны 10 сарын 19
Сум, дүүргийн Иргэдийн төлөөлөгчдийн хурлын ээлжит сонгууль өнөөдөр 22.00 цаг хүртэл үргэлжилнэ.
-
2016 оны 10 сарын 19
Сум, дүүргийн ИТХ-ын 2016 оны сонгуулийн санал өгөх өдөр өнөөдөр болно. Монгол Улсын Ерөнхийлөгч Ц.Элбэгдорж 11.30 цагт Сүхбаатар дүүргийн гуравдугаар хороо Орос, Монголын хамтарсан гуравдугаар сургуулийн байранд очиж саналаа өгөх аж.
-
2016 оны 10 сарын 19
Сум дүүргийн өөрөө удирдах ёсны байгууллага ИТХ-ыг сонгох сонгууль өглөөний 07,00 цагаас орон даяар эхэллээ.
-
2016 оны 10 сарын 18
Монгол Улсын хүн амын өсөлт, төрөлтийг дэмжих бодлогын хүрээнд Эхэд тэтгэмж, хөнгөлөлт олгох тухай хуулийн төслийн үзэл баримтлалын төслийг хэлэлцэн хуулийн төслийг боловсруулан Засгийн газрын хуралдаанаар хэлэлцүүлэхийг даалгав.
-
2016 оны 10 сарын 18
Монгол Улсын Ерөнхийлөгч Ц.Элбэгдорж Хойд Америк-Монголын бизнесийн зөвлөлийн ерөнхийлөгч Стив Сандерс тэргүүүтэй төлөөлөгчдийг өнөөдөр хүлээн авч уулзлаа.
Уулзалтын үеэр Монгол Улс, Хойд Америкийн хамтын ажиллагаа, харилцааг өргөжүүлэн хөгжүүлэх, цаашдын үйл ажиллагааны чиглэл, хандлагын талаар санал солилцон ярилцлаа.
1990 оноос хойш үйл ажиллагаагаа явуулж эхэлсэн Хойд Америк-Монголын бизнесийн Зөвлөл нь Монгол Улсыг Хойд Америктай холбосон хамгийн анхны бизнесийн байгууллага бөгөөд Монголын гадаад худалдааг нэмэгдүүлэх, хөрөнгө оруулалтыг татахад чухал үүрэг гүйцэтгэж ирсэн байна.
Тус байгууллага нь Монгол Улс, АНУ болон Монгол Улс, Канадын худалдаа, хөрөнгө оруулалт, эдийн засгийн хамтын ажиллагааг дэмжин ажиллах зорилготой юм.
-
2016 оны 10 сарын 18
Монгол Улсын Ерөнхийлөгчийн Тамгын газрын дарга Ц.Баярсайхан өнөөдөр Шилэн дансны хөтлөлтийн талаар холбогдох албаны хүмүүстэй уулзаж ярилцав.
Уулзалтад Засгийн газрын Хэрэг эрхлэх газрын дэд дарга Б.Даажамба, Улсын Ерөнхий аудитор А.Зангад, Сангийн яамны Төсвийн хяналт, эрсдлийн удирдлагын газрын мэргэжилтэн Батзориг, Сангийн яамны Төрийн сангийн газрын ахлах мэргэжилтэн Наранчимэг нар оролцлоо.
УИХ-ын 2016 оны сонгуулийн дараа Засгийн газар шинээр бүрдэж, төрийн болон төсвийн санхүүжилт бүхий олон газрын төсвийн ерөнхийлөн захирагч, яамдын Төрийн нарийн бичгийн дарга нар шинээр томилогдсоны улмаас сүүлийн саруудад шилэн дансны хөтлөлт тааруу байгаа болон шилэн дансны хөтлөлтийг яаралтай хэвийн байдалд оруулах талаар энэ үеэр санал солилцон ярилцлаа.
Монгол Улсын Ерөнхийлөгчийн Тамгын газрын дарга Ц.Баярсайхан уулзалтын эхэнд хэлэхдээ “Шилэн дансны хууль хэрэгжээд хоёр жил гаруй болж байна. Сүүлийн үед Шилэн дансны хуулийн хэрэгжилт саарч байна гэсэн мэдээлэл олон нийтийн зүгээс гарч байгаа. Хамгийн гол зүйл бол одоо нэгдүгээрт, хуулийн хэрэгжилтдээ анхааръя.
Шилэн дансны хууль хэрэгжсэнээр төрийн албаны үйл ажиллагаа, төсвийн хөрөнгийн зарцуулалт олон түмэнд нээлттэй хүрч байгаа. Олон нийтийн анхаарлыг нэлээд татдаг асуудал. Төсөв тунгалаг, зарцуулалт нь ил тод байх нь иргэд, татвар төлөгчдөд таатай уур амьсгал үүсгэдэг. Зарим яамд дээр гарч байгаа асуудлыг хурдан засах хэрэгтэй.
Хоёрт, Шинээр томилогдсон хүмүүст богино хугацаанд сургалт хийх нь зүйтэй. Энэ сургалтад шинээр томилогдсон Төрийн нарийн бичгийн дарга нар, холбогдох хүмүүсийг оролцуулах нь зөв байх.
Монгол Улсын 2017 оны төсөв ирэх 11 дүгээр сарын 15 гэхэд батлагдах байх. Орон нутаг 12 дугаар сарын 15 гэхэд батална. Энэ хооронд шилэн данс хөтлөх холбогдох хүмүүсээ сургаж, гарын авлага, материалаар хангах шаардлага байна. Энэ талын ажлыг эрчимжүүлэх хэрэгтэй.
Гуравт, Шилэн дансны хууль бол Монгол Улсын Ерөнхийлөгчийн зүгээс анхаарч, санаачилсан хууль. Тийм учраас 2017 оны 1 дүгээр сард Шилэн дансны хуулийн хэрэгжилтийн талаар хэлэлцүүлэг, сонсгол хийхээр төлөвлөж байна. Түүгээр хуулийн хэрэгжилтэд гарч байгаа бэрхшээл, мөрдөж байгаа дүрэм, журмаа шинэчлэх шаардлага байгаа эсэх талаар ярилцана. Түүн дээр Улсын Ерөнхий аудитор илтгэл тавина. Сангийн яам мэдээлэл өгнө. Засгийн газар төрийн яамд, орон нутгийн байгууллага ямар түвшинд оролцохыг хариуцна. Энэ чиглэлээр та бүхэнтэй албан ёсоор уулзаж байна” гэлээ.
Одоогийн байдлаар Шилэн дансны мэдээлэл хөтөлдөг байгууллагын 70 хувь бүрэн хөтөлж байгаа бөгөөд 30 хувьд нь анхаарах шаардлагатай байгаа юм байна. Хөдөө орон нутгийн хувьд Завхан аймгийн найман сумаас бусад сумд цахим сүлжээнд хамрагджээ. Одоо сумдыг шилэн кабельд холбож интернэтийн хурдыг сайжруулах шаардлагатай байгааг Сангийн яамны ахлах мэргэжилтэн Наранчимэг хэллээ.
Шилэн дансны нэгдсэн мэдээлэл хөтөлдөг орон тооны хүнгүй тул ажлын хажуугаар хийдэг. Ингэлээ гээд энэ ажлыг цалгардуулж байгаагүй. Боловсон хүчин, төсөв, хөрөнгийн дутагдалтай байдаг. Хөрөнгө мөнгөний дутагдлыг төслийн хөрөнгө зэргээс нөхөж ирсэн гэдгийг тэрээр мөн хэлж байлаа.
Мөн Шилэн дансны тухай хуульд холбогдох нэмэлт, өөрчлөлт оруулах, хууль эрх зүйн орчинг тогтвортой хөгжүүлэх шаардлага байгааг уулзалтад оролцогчид хэлж байсан юм.
-
2016 оны 10 сарын 18
УИХ-ын дарга М.Энхболд маргааш Сум, дүүргийн ИТХ-ийн сонгуулийг Чингэлтэй дүүргийн сонгуулийн 1 дүгээр тойрог 2036 дугаар хэсгийн санал авах байранд очиж саналаа өгнө.
-
2016 оны 10 сарын 18
Эрүүл мэндийн байдлаас шалтгаалан санал авах байранд хүрэлцэн ирж чадахгүй, дайчилгааны тухай хуулийн дагуу нийтийн дайчилгаанд хамрагдан ажиллаж байгаа иргэд болон захиргааны зөрчлийн улмаас баривчлагдсан, албадан саатуулагдаж, таслан сэргийлэх арга хэмжээ авагдсан, цагдан хоригдсон иргэд битүүмжилсэн хайрцгаар саналаа өгдөг билээ.
Тэгвэл үүний дагуу өнөө өглөө 09 цагаас зөөврийн битүүмжилсэн хайрцгаар санал авч эхэллээ. Мөн сонгуулийн санал авах ажиллагааг зохион байгуулж байгаа сонгуулийн хэсгийн хорооны ажилтан, цагдаа, иргэний бүртгэлийн итгэмжлэгдсэн төлөөлөгч, мэдээллийн технологийн даамлууд өнөөдөр саналаа өгөх юм.
Зөөврийн битүүмжилсэн хайрцгаар санал авах хугацаа өнөө орой 20 цаг хүртэл үргэлжилжлэх аж.
-
2016 оны 10 сарын 18
Мэргэжлийн Засгийн газар байгуулагдсаны 100 дахь хоног ирэх сарын эхээр тохионо. Энэ хугацаанд тус Засгийн газрыг хэрхэн ажилласан, чухам юу хийж бүтээсэн талаар намууд болон иргэний нийгмийн байгууллагууд байр сууриа илэрхийлж буй. Өнгөрсөн долоо хоногт АН-аас мэдээлэл хийж, Мэргэжлийн Засгийн газрыг “Мэргэжлийн бус”, өмнөх Засгийн газраас муу ажилласан гэж дүгнэсэн. Тэгвэл өчигдөр МАХН-ынхан Ж.Эрдэнэбатын танхимыг мөн л муу ажилласан гэж дүгнэсэн гэдгээ уламжлав. Тэгвэл 100 хоногтойгоо золгож буй Мэргэжлийн Засгийн газрыг намууд хэрхэн дүгнэснийг сонирхуулья.
-
2016 оны 10 сарын 18
Засгийн газрын ээлжит хуралдаан өнөөдөр 15.00 цагт Засгийн газрын хуралдааны танхимд болно. Хуралдаанаар сайд нар ДОЛООН асуудал хэлэлцэж, нэг танилцуулгыг сонсох юм байна.
Хуралдаанаар хэлэлцэх асуудлыг хүснэгтээр хүргэж байна.
-
2016 оны 10 сарын 17
Улсын Их Хурлын гишүүн О.Баасанхүү өнөөдөр /2016.10.17/ хэвлэлийн хурал зохион байгуулж, “Эрдэнэт” үйлдвэрийн асуудлаар сэтгүүлчдэд мэдээлэл хийлээ.
Тэрбээр “Эрдэнэт” үйлдвэрийн 49 хувийн хувьцааг Монголын талд шилжүүлсэнтэй холбоотойгоор олон хардлага иргэдийн дунд бий болсон учраас холбогдох байгууллагууд энэ асуудалд анхаарлаа хандуулж ажиллах ёстойг онцлов.
Улсын Их Хурлын гишүүн О.Баасанхүү Улсын Их Хурлын дарга болон Улсын ерөнхий прокурор, Авлигатай тэмцэх газарт хандан дөрвөн шаардлага тавьж буйгаа энэ үеэр мэдээлсэн юм. Тодруулбал, Улсын Их Хурлаас Ажлын хэсэг байгуулж, Засгийн газарт чиглэл өгсөн Улсын Их Хурлын тогтоолыг батлах, 1990 оноос хойш өнөөг хүртэл “Эрдэнэт” үйлдвэрийг удирдаж байсан үе үеийн удирдлагуудыг хууль, хяналтын байгууллагуудаас шалгах, хуучин авч байсан зээлүүдийг хариуцаж төлөх асуудлыг тодорхой болгож шийдэх, “Стандарт” банктай холбогдон нэр дурдагдаад буй гадаад, дотоодын иргэдийг шалгаж, олон нийтийн дунд хардлага төрүүлээд байгаа асуудлын үнэн худлыг тогтоох нь зүйтэй хэмээн үзэж байгаагаа илэрхийлсэн юм.
Мөн “Эрдэнэтийн хөгжлийн сан”-г байгуулж, тус үйлдвэрийн улсын төсөвт өгдөг татвараас тодорхой хувийг төвлөрүүлэх хэрэгтэй. Ингэснээр Орхон аймгийн иргэд аливаа эрсдэлээс хамгаалагдах боломжтой болохыг Улсын Их Хурлын гишүүн О.Баасанхүү хэллээ гэж Улсын Их Хурлын Тамгын газрын Хэвлэл мэдээлэл, олон нийттэй харилцах хэлтсээс мэдээлэв.
-
2016 оны 10 сарын 17
УИХ-ын чуулганы энэ сарын 21-ний өдрийн нэгдсэн хуралдаанд Ерөнхий сайд Ж.Эрдэнэбат мэдээлэл хийх юм байна
-
2016 оны 10 сарын 17
Монгол Улсын Ерөнхий сайд Ж.Эрдэнэбат өчигдөр Чингэлтэй дүүрэгт ажиллалаа. Тэрээр тус дүүргийн 124 дүгээр цэцэрлэгийн нэмэлт бүлэг, Эрүүл мэндийн төвийн үйл ажиллагаатай танилцаж, иргэдтэй уулзлаа. Орон нутгийн хөгжлийн сангийн хөрөнгө оруулалтаар 124 дүгээр цэцэрлэг нэмэлт бүлэг байгуулж, 50 хүүхдийг сургуулийн өмнөх боловсролд хамруулж байгаа хэдий ч дэд бүтцийн хувьд тулгамдсан асуудал байгааг ирэх жилийн төсөвт тусган шийдвэрлэнэ гэж Ерөнхий сайд хэллээ.
Чингэлтэй дүүргийн Эрүүл мэндийн төв эмнэлэг зориулалтын бус байранд үйл ажиллагаагаа явуулж байна. Ерөнхий сайд Ж.Эрдэнэбат улсын төсөв болон олон улсын байгууллагын төсөл, хөтөлбөрийн хүрээнд тус эмнэлгийн байрны асуудлыг шийдвэрлэнэ гэдгээ эмнэлгийн үйл ажиллагаатай танилцах үеэрээ илэрхийллээ.
Монгол Улсын Ерөнхий сайд Ж.Эрдэнэбат, Хөдөлмөр, нийгмийн хамгааллын сайд Н.Номтойбаяр, Эрүүл мэндийн сайд А.Цогцэцэг, Нийслэлийн Засаг дарга бөгөөд Улаанбаатар хотын захирагч С.Батболд болон УИХ-ын гишүүн Ө.Энхтүвшин, М.Оюунчимэг, Д.Ганболд, Т.Аюурсайхан нар Чингэлтэй дүүргийн иргэдтэй СУИС-ийн “Оюутан” театрт уулзалт хийлээ.
Ерөнхий сайд Ж.Эрдэнэбат:
2016 оны УИХ-ын сонгуулийн дүнд шинэ Засгийн газар байгуулагдаж, ирэх дөрвөн жилийн үйл ажиллагааныхаахөтөлбөрийг батлууллаа. Засгийн газрын үйл ажиллагааны хөтөлбөр 5 бүлэг 381 зорилт, заалттай. Эдийн засгийн хүндрэлийг даван туулах онцгой хөтөлбөрийг Засгийн газар анх удаа үйл ажиллагааныхаа хөтөлбөрт тусгаснаараа онцлог. Эдийн засаг хүнд байна гээд үйл ажиллагааныхаа хөтөлбөрийг хэрэгжүүлэхгүй байна гэж байхгүй. Эхлээд эдийн засгийн хямралаа давна. Эхний 100 хоногтоо багтаан зарим зорилт, арга хэмжээгээ хэрэгжүүлж эхэлсэн. Манай Засгийн газар бол алдах, алгуурлах эрхгүй Засгийн газар.
Сургалтын төлбөрийн асуудлыг шийдвэрлэхээр Оюутны зээлийн санг байгуулсан, ахмадууддаа ирэх оноос эхлэн хагас жил тутамд “Насны хишиг” олгоно. Насны хишиг бол тэтгэвэр биш өндөр насалсных нь төлөө төр засгаас өгч буй дэмжлэг юм.
Эдийн засгийн хүндрэлээс гарахын тулд үндэсний үйлдвэрлэлээ дэмжих нь чухал. Худалдааны орноос үйлдвэрлэгч орон руу шилжих хэрэгтэй байна. Газар зүйн байршлын хувьд далайд гарцгүй, хоёр том гүрний дунд оршдог ч үүнийгээ давуу тал гэж харвал хоёр том зах зээл бидэнд байна. Түүхий эдээ дэвшилтэт технологи ашиглан боловсруулж, нэмүү өртөг шингээсэн бүтээгдэхүүн үйлдвэрлэх бололцоотой.
Би Япон улсад айлчлал хийгээд өчигдөр ирлээ. Миний айлчлалын гол зорилго хөнгөлөлттэй зээл, буцалтгүй тусламж авах байгаагүй. Монгол-Японы бизнес эрхлэгчдийн харилцаа, хамтын ажиллагааг сайжруулах, хоёр талын хөрөнгө оруулалтыг нэмэгдүүлэх чиглэлээр байлаа. Японы Ерөнхий сайдтай хэлэлцээ хийх үеэрээ ч дотоодын түүхий эдээ танай технологийг ашиглан боловсруулж, нэмүү өртөг шингээсэн бүтээгдэхүүн үйлдвэрлэх хүсэлтэй байгаагаа илэрхийлсэн. Мөн Монголын 50, Японы 200 гаруй бизнес эрхлэгчид оролцсон бизнесийн форумд оролцож, хөрөнгө оруулалтыг татах, эрх зүйн орчныг сайжруулах талаар ярилцсан. Гадаад харилцааг цаашид Монгол Улсад үйлдвэрлэлийг бий болгоход чиглүүлнэ.
Статистикийн мэдээллээр манай улсад 130 мянган үндэсний үйлдвэрлэгч байгаа ч 60 мянган аж ахуйн нэгж хэвийн үйл ажиллагаа явуулж байна. Үндэсний үйлдвэрлэлээ хөгжүүлэхгүйгээр иргэдийнхээ ажил, орлогыг нэмэгдүүлэх боломж байхгүй. Найдваргүй зээлийн хэмжээ 17 хувьд хүрсэн байна. Гаднын орнуудын хувьд энэ хэмжээ 5 хувьд хүрэхэд л тусгай бодлого боловсруулж, хэрэгжүүлдэг. Найдваргүй зээлийн хэмжээг бууруулахын тулд тусгай бодлого боловсруулж байна. Аливаа бодлогыг боловсруулахад иргэдийн санал санаачлага, эрдэмтэн, мэргэжилтнүүдийн саналыг сонсох нь чухал. Засгийн газар өнгөрсөн хугацаанд бүх салбарын төлөөлөлтэй уулзсан. Ийм уулзалтыг жил бүр уламжлал болгон зохион байгуулна. Ийм тооцоо, судалгааны үндсэн дээр Засгийн газар хийх ажлаа хийж, шийдвэрээ гаргадаг. Шийдвэрийг бусад нь дэмждэг байх хэрэгтэй.
Эдийн засгийн хүндрэлээс гарахын тулд Засгийн газрын зүгээс уриалга гаргасан. Иргэн бүр худалдан авалт хийхдээ дотооддоо үйлдвэрлэгдсэн бүтээгдэхүүнийг худалдан авах, цаашлаад төсвийн байгууллагууд ч Монголд үйлдвэрлэсэн бараа, бүтээгдэхүүнийг худалдан авах чиглэл баримтална.
Дотоодын хэрэгцээг бүрэн хангах хэмжээний үйлдвэрлэл явуулж байгаа салбарыг Засгийн газрын зүгээс дэмжихгүй. Нэгэнт одоогийн хүчин чадлаараа ажиллаад дотоодын хэрэгцээгээ бүрэн хангахуйц байхад ижил төрлийн үйлдвэр байгуулах шаардлагагүй юм. Нэг жишээ хэлэхэд 2012 онд барилга угсралтын тусгай зөвшөөрөлтэй 1800 аж ахуйн нэгж байсан бол өнөөдөр ийм тусгай зөвшөөрөлтэй 4600 аж ахуйн нэгж байна. Монгол Улсын эдийн засагт 4600 аж ахуйн нэгжийн бүтээн байгуулалтыг хүлээн авах боломж алга. Бэлэн байгаа 8000, заслын ажил хийгдэж байгаа 25000, нийт 33 мянган орон сууц зах зээлд бэлэн байна. Эдийн засгаа төрөлжүүлж, энэ бодлогыг залруулах хэрэгтэй.
Манай Засгийн газар ярьдаг биш, хийдэг Засгийн газар байна. Эрчим хүчний салбарт л гэхэд хэрэгжүүлэхээр яригдсан 68 төсөл байна. Эдгээр төсөл бүгд хэрэгжвэл Монгол Улсын эрчим хүчний хэрэглээг 20 дахин нугалах хэмжээний эрчим хүч үйлдвэрлэх юм байна. Одоо эндээс таван төслийг л хэрэгжүүлнэ. Таван төсөл л хэрэгжүүлэхэд дотоодын хэрэгцээгээ бүрэн хангаад экспортлох хэмжээнд хүрнэ. Сайд нарт ч мөн дахин төсөл нэмэхгүй, үр дүнг нь үзэх цөөн төсөл сонгон хэрэгжүүлэхийг үүрэг болгосон. Салбарын яам бүрт үйлдвэржилтийн бодлогыг хариуцсан хэлтэс, газар байгуулагдсан. Боловсролын яам хэвлэх үйлдвэрийн, Эрүүл мэндийн яам нь эмийн үйлдвэрээ гээд яам бүр үйлдвэржилтийн бодлогоо боловсруулж, Үндэсний хөгжлийн газар уялдааг нь зохицуулж ажиллана. Өмнөх Засгийн газарт Аж үйлдвэрийн яам нь нэг бодлого оруулж ирдэг, салбарын яам нь түүнийг нь дэмждэггүй асуудал үүсч байсан. Одоо тийм асуудал үүсэхгүй.
Би 7 аймагт ажиллаж, иргэдтэй уулзсан. Аймаг, дүүрэгтээ байгаа асуудлыг тэнд амьдардаг иргэд нь илүү мэднэ. Эмнэлэг, сургууль, цэцэрлэг гээд яг хэрэгцээтэй байгаа асуудлаа тодорхойлно. Үүний дараа тийшээ чиглэсэн оновчтой бодлого боловсруулна гэж харж байна.
Өнөөдөр Чингэлтэй дүүрэгт ажиллалаа. Эмнэлэг, цэцэрлэгийн үйл ажиллагаатай танилцлаа. Өөрсдийн нөөц бололцоогоор, улсын төсвийг харж суулгүй, орон нутгийн хөгжлийн сангаас санхүүжилтээ шийдээд нэмэлт бүлэг байгуулсан байна. Орон нутгийн удирдлагууд ч ийм төсөл боловсруулахад анхаарч ажиллах хэрэгтэй.
Байгууллагын цэцэрлэгүүд ч нээгдэж байна. Гадаад харилцааны яам цэцэрлэгээ нээсэн бол Хөдөлмөр, нийгмийн хамгааллын яам, Тагнуулын ерөнхий газар мөн дэргэдээ цэцэрлэг нээхэд бэлэн болсон. Цаашид баригдаж байгаа барилгуудад цэцэрлэгтэй байх стандарт мөрдүүлнэ. Хүүхэд харах үйлчилгээний хувьд тогтоосон стандарт алга. Сайдын тогтоосон журам мөрдөгдөж байна. Нэгэнт хүүхэд хүмүүжиж буй орчин учраас эрүүл ахуйн орчин нөхцөл маш сайн байх ёстой. Стандарт мөрдөгдөх ёстой.
Эрүүл мэндийн сайд А.Цогцэцэг
Эрүүл мэндийн салбарын тулгамдаж байгаа асуудлуудын нэг бол диализтай холбоотой асуудал байна. Энэ асуудлыг Засгийн газар бүрэн шийдвэрлэсэн. 2017 оны нэгдүгээр сарын нэгнээс диализд ордог хүмүүс төр хувийн хэвшлийн ямар ч эмнэлэгт очсон үнэ төлбөргүй хамрагдах боломжтой боллоо.
Азийн хөгжлийн банкны Монгол Улсад хэрэгжүүлж байгаа Эрүүл мэндийн 6 дахь төсөл хэрэгжих гэж байна. Энэ төслийн хүрээнд Чингэлтэй дүүргийн эмнэлгийг загвар эмнэлэг болгохоор төлөвлөсөн. 2017 онд Азийн хөгжлийн банктай хамтран энэ төслийг хэрэгжүүлэх боломжтой болж байгаа юм. Бусад бүх эмнэлгүүд, тэр дундаа алслагдсан өрхийн эмнэлгийг сайжруулах талаар үйл ажиллагаа явуулж байна. Иргэн үйлчилгээ авсан тэр цэгээсээ эмнэлгийн бүхий л тусламж үйлчилгээг авах боломжтой байх. Халдварт, нэгдүгээр эмнэлэгт очиж шинжилгээ өгөхгүйгээр сорьцыг нь тээвэрлээд тэр лабораторын шинжилгээг халдвар, хавдар дээр эрүүл мэндийн даатгалаар хийх боломжтой болж байгаа. Жишээлбэл, С вирусийн шинжилгээг аль ч эмнэлэгт өгөөд, хариугаа цахим хэлбэрээр авчих боломжтой болж байгаа юм. Иргэн өөрөө эрүүл мэндийн даатгалаа төлсөн байх шаардлагатай. Ингээд 3 сарын даатгалын мөнгөөр С вирусийн тооллогод үнэгүй хамрагдах боломжтой. Ганцхан С вирусийн биш, бүх төрлийн тусламж үйлчилгээг авах боломжтой. Чингэлтэй дүүргийн хувьд диализын аппарат байхгүй байгаа. Богино хугацаанд энэ төхөөрөмжөөр хангах шаардлагатай байна.
Хөдөлмөр, нийгмийн хамгааллын сайд Н.Номтойбаяр:
Маш бага зардлаар нэг хүнийг ядуурлаас гаргах хэмнэлтийн горим руу шилжиж байна. Ялангуяа сая зургадугаар сард амьжиргааны доод түвшинг улсын хэмжээнд тогтоосон. Нийслэл, Чингэлтэй дүүрэгт 183.700 төгрөгөөр тогтоосон байна. Амьжиргааны түвшинг үнэлэх 0-1000 хүртэлх оноо байгаа. Хүүхдийн мөнгө олгох асуудал 503 гэдэг оноогоор зааглагдаж байна. Халамжийн бодлогоо оновчтой болгох үүднээс бүх асуудлыг эргэн харах, судалгааны хэсэг байгуулсан. Хөдөлмөр, нийгэм хамгааллын яамны хажууд Хөдөлмөр, нийгэм хамгааллын институт байгуулагдан ажлын гараагаа эхэлсэн. Өмнөх Засгийн газрын үед Хөдөлмөр, нийгмийн хамгааллын яамыг тусад нь байгуулснаас үндсэн бодлого алдагдсан. Үүнээс болж халамж хавтгайрсан.
Хүүхэд харах үйлчилгээ явуулж буй газруудад стандарт байхгүй байна гэдэгтэй Нэгдсэн үндэсний байгууллагын эрх бүхий хүмүүс 100 хувь санал нийлж байгаа. Би ирэх долоо хоногт хүүхэд харах үйлчилгээний зарим төвүүдээр явна. Стандарт байхгүй гэдэг дүр зураг харагдаж байсан. Эхэд тэтгэмж, хөнгөлөлт олгох тухай хуулийн төслийг боловсруулж байна. Хуульд эхэд хамааралтай бүх тэтгэмж, хөнгөлөлтийг багтаасан байгаа. Ирэх долоо хоногийн хурлаар энэ асуудлыг хэлэлцэнэ. Сүүлийн жил гаруйн хугацаанд төрийн албаны талаар ярьсан. Төрийн албаны асуудлыг МАН онцгойлон авч үзэж байгаа. Залуучуудын хөгжлийн тухай хуулийн хувьд гадаад, дотоодын байгууллагуудад үзэл баримтлал, танилцуулгыг хүргүүлээд байна.
Уулзалтын үеэр иргэд нийслэлийг утааг бууруулах, “Эрдэнэт” үйлдвэрийн талаар Ерөнхий сайдаас асууж байлаа. Утааны асуудлыг шийдэх төгс арга бол орон сууцжуулах. АСЕМ-ын үеэр БНХАУ-аас 50 сая ам.долларын асуудал яригдсан. Энэ мөнгийг утааг бууруулахад зарцуулна. Гэхдээ зуух, нүүрс тараахгүй, цөөн айлыг ч болов орон сууцжуулна.
“Эрдэнэт” үйлдвэрийн 49 хувийн арилжааг Ажлын хэсэг шалгасан. Төр 51 хувийн эрхээ “Эрдэнэт” үйлдвэр дээр эргэж эдэлнэ. Компанийн удирдлагыг ч төрөөс томилно. 49 хувийн арилжаа тойрсон асуудлыг судлаад зарим хууль бус шийдвэрийг цуцалсан. Тийм шийдвэр гаргасан төрийн өндөр албан тушаал хашиж байсан албан тушаалтнуудыг хуулийн байгууллагад хандан шалгуулна гэж Ерөнхий сайд хариуллаа.
-
2016 оны 10 сарын 17
МАН-ын Засгийн газар “60 тэрбумын” томилгоогоо хийж буй нь тодорхой хэмээн улс төр судлаачид хэлж байна. Сайд нараа бүрдүүлж дууссан МАН ирэх долоо хоногт агентлагийн дарга нараа томиллохоор тохироонуудаа хийгээд дуусч байгаа аж.
-
2016 оны 10 сарын 14
Япон Улсад айлчилж буй Монгол Улсын Ерөнхий сайд Ж.Эрдэнэбат тус улсын Ерөнхий сайд Ш.Абэтэй уулзаж албан ёсны хэлэлцээ хийлээ. Хэлэлцээний дараа Ерөнхий сайд нар хамтарсан мэдэгдэл хийв.
Монгол Улсын Ерөнхий сайд Ж.Эрдэнэбат:
“Монгол Улсын Ерөнхий сайдын анхны гадаад айлчлал манай улсын ойрын түнш Япон Улсаас эхэлж, Ерөнхий сайд Ш.Абэтэй албан ёсны хэлэлцээ хийлээ. Хэлэлцээ харилцан ойлголцсон, итгэлцсэн, найрсаг уур амьсгалд боллоо. Нэгдмэл үнэт зүйлтэй, нэг бүс нутаг бүхий бидний дотны түнш Япон Улстай стратегийн түншлэлийн харилцаагаа хөгжүүлэхэд Монгол Улс тэргүүлэх ач холбогдол өгч байгаа.
Хоёр орны харилцааг шинэ шатанд гаргаж итгэлцлийг бэхжүүлэн, улс төр, эдийн засаг, соёл, боловсрол, хүмүүнлэгийн өргөн хүрээтэй салбарт хамтын ажиллагаагаа эхлүүлэхээр тогтлоо. Манай хоёр улсын хооронд өндөр, дээд түвшний айлчлалын давтамж ойртож, харилцан итгэлцэл бэхэжсээр байна. Энэ харилцаан дээрээ суурилж, харилцааг дараагийн үе рүү оруулж, хоёр орны ард түмнүүдийн хэлхээ холбоог зузаатган, хувийн хэвшлийн хамтын ажиллагааг тэлэх зорилго бидний өмнө тавигдаж байна. Миний айлчлалын зорилго ч үүнд чиглэсэн.
Ерөнхий сайд Ш.Абэ Япон Улсын гадаад бодлого дахь Монгол Улсын ач холбогдлыг үнэлж, манай улсын дунд болон урт хугацааны хөгжлийн зорилтыг хэрэгжүүлэхэд сэтгэл харамгүй дэмжлэг үзүүлж, хамтран ажиллахаа илэрхийлсэнд талархаж байна. Бид Монгол, Японы стратегийн түншлэлийг 2017-2021 онд хөгжүүлэх зорилготой дунд хугацааны шинэ хөтөлбөр байгуулахаар тохирч, ирэх дөрвөн жилд хэрэгжүүлэх гол ажлаа хөтөлбөрт тусгахаар ярилцлаа. Монгол Улсад ардчиллыг бэхжүүлж, зах зээлийн эдийн засгийн тогтолцоог бүрдүүлэх, орчин үеийн хөгжлийн суурийг тавихад нэн чухал дэмжлэг үзүүлж ирсэн Япон Улстай монголчууд бид цаашид харилцаа, хамтын ажиллагаагаа зузаатгаж, хоёр талын хүрээнд болон олон улс, бүс нутгийн хэмжээнд харилцан дэмжиж, хамтран ажиллах болно” гэлээ.
Япон Улсын Ерөнхий сайд Ш.Абэ:
“Монгол Улсын Ерөнхий сайд Ж.Эрдэнэбат анхны айлчлалаа Япон Улсаас эхэлж байгаа нь манай хоёр улс халуун дотно, нягт сайн харилцаатайн илэрхийлэл гэж үзэж байна. Бид өнгөрсөн долоодугаар сард Улаанбаатарт болсон АСЕМ-ийн уулзалтаас хойш гурван сарын дараа дахин уулзаж байгаадаа баяртай байна.
Монгол Улс ардчилал, эрх чөлөө, хүний эрх чөлөөг үнэт зүйлээ болгон дээдэлдэг учраас Япон Улс стратегийн түншээ гэж чухалчлан үздэг. Миний бие Монгол Улсад гурван удаа айлчилсны үндсэн санаа ч энэ юм. Өнөөдрийн уулзалтаар Ерөнхий сайд Ж.Эрдэнэбаттай маш үр дүнтэй, ач холбогдол өндөртэй яриа хэлэлцээ өрнүүлж чадлаа. Өнгөрсөн оны долоодугаар сард уулзахдаа хоёр орны харилцааны шинэ хөтөлбөрийг боловсруулах талаар санал нэгдсэн юм. Энэ нь хоёр орны хамтын ажиллагааны чиглэлийг заасан “Google map” буюу “Замын зураглал”-ын үүрэг гүйцэтгэх юм. Өнөөдрийн уулзалтаар энэ хөтөлбөрийг боловсруулах ажлаа түргэтгэх талаар санал нэгдлээ. Энэ хөтөлбөрийн хүрээнд хоёр улсын харилцаа улам өргөн хүрээнд хөгжинө гэдэгт итгэлтэй байна” гэлээ.
Ерөнхий сайд мөн өдөр Япон Улсын Сангийн сайд Асоо Тароотой уулзлаа.
-
2016 оны 10 сарын 14
УИХ-ын дарга М.Энхболдод ЗГХЭГ-ын дарга З.Мөнхбат албан бичиг хүргүүлжээ. Тус албан бичигт “Ерөнхий сайд Ж.Эрдэнэбат УИХ-ын 2016 оны 10 дугаар сарын 21-ний өдрийн Чуулганы нэгдсэн хуралдаанд Төрийн өмчийн болон өмчийн бус сургууль, цэцэрлэгийн өнөөгийн байдал, цэцэрлэгийн болон сургуулийн насны хүүхдийд бүрэн хамрагдах боломжийг сайжруулах чиглэлээр авч хэрэгжүүлж буй арга хэмжээний талаар мэдээлэл хийх болсныг уламжилж байна” хэмээжээ.
-
2016 оны 10 сарын 14
Монгол Улсын Ерөнхийлөгчийн 2016 оны 8 дугаар сарын 9-ний өдөр гаргасан Уран дархны урлагийг дэмжих тухай 115 дугаар зарлигийг гардуулах ёслол өнөөдөр Ерөнхийлөгчийн дэргэдэх Иргэний танхимд боллоо.
Монгол Улсын Ерөнхийлөгчийн Тамгын газрын дарга Ц.Баярсайхан уг зарлигийг БСШУС-ын сайд Ж.Батсуурь, МҮОНТ-ийн захирал Ц.Оюундарь, Монгол дархны “Түмэн эрдэнэс” холбооны тэргүүн С.Батзоригт нарт гардуулан өгөв.
Зарлиг гардуулах ёслолын үеэр Монгол Улсын Ерөнхийлөгчийн Тамгын газрын дарга Ц.Баярсайхан хэлсэн үгэндээ “Та бүхний энэ өдрийн амгаланг айлтгая. Монгол Улсын Ерөнхийлөгчийн мөрийн хөтөлбөрт үндэсний хэл, соёл, заншил, түүхээ эрхэмлэн дээдлэх чиглэлийн олон үйл ажиллагаа явуулахаар багтаасан.
Энэ хүрээнд монгол үндэсний сонгодог өв болох уран дархны урлагийг өвлөн уламжлах, хадгалан хамгаалах, олон нийтэд сурталчлан таниулах чиглэлээр үйл ажиллагаа явуулахад дэмжлэг үзүүлэх зорилгоор Монгол Улсын Ерөнхийлөгчийн 2016 оны 8 дугаар сард зарлиг гаргасан.
Энэ зарлигийн дагуу Монгол Улсын Ерөнхийлөгчийн ивээл дор “Монгол дархан” үзэсгэлэнг 3 жилд нэг удаа, 7 дугаар сарын эхний 15 хоногт багтаан зохион байгуулж байхаар Монгол Улсын Ерөнхийлөгчийн Тамгын газар, Соёлын асуудал эрхэлсэн төрийн захиргааны төв байгууллага, холбогдох төрийн бус байгууллагад үүрэг болгосон. Энэ чиглэлийн үзэсгэлэнгүүдийг тодорхой хэмжээнд зохион байгуулж ирлээ.
Өнөөдөр Монгол Улсын Ерөнхийлөгчийн зарлигийг цаашид хамтран ажиллах тодорхой зорилготойгоор холбогдох байгууллагуудад албан ёсоор гардуулж байна” гэлээ.
Монгол Улсын Ерөнхийлөгчийн 2016 оны 8 дугаар сарын 9-ний өдөр гаргасан Уран дархны урлагийг дэмжих тухай 115 дугаар зарлигт “Монгол Улсын Үндсэн хуулийн Гучин дөрөвдүгээр зүйлийн 1, Монгол Улсын Ерөнхийлөгчийн тухай хуулийн есдүгээр зүйлийн 1, Соёлын тухай хуулийн 18 дугаар зүйлийн 2 дахь хэсгийг тус тус үндэслэн зарлиг болгох нь:
1. Монгол Улсын Ерөнхийлөгчийн ивээл дор “Монгол дархан” үзэсгэлэнг 3 жил тутамд нэг удаа, долдугаар сарын эхний 15 хоногт зохион байгуулж байхыг Монгол Улсын Ерөнхийлөгчийн Тамгын газар, Соёлын асуудал эрхэлсэн төрийн захиргааны төв байгууллага, холбогдох төрийн бус байгууллагад даалгасугай.
2. Монгол үндэстний сонгодог өв-уран дархны урлагийг өвлөн уламжлах, хадгалан хамгаалах, олон нийтэд сурталчлан таниулах чиглэлээр үндэсний хөтөлбөр боловсруулан хэрэгжүүлэх; уг салбарт идэвхтэй ажиллаж буй иргэдийг хөхиүлэн дэмжиж байхыг холбогдох төрийн байгууллагад даалгасугай.
3. Монгол уран дархны урлагийг өвлөн уламжлах, хадгалан хамгаалах, судлан шинжлэх үйлсэд идэвх, санаачилгатай ажиллахыг шинжлэх ухаан, хэвлэл мэдээллийн байгууллага, гадаад, дотоодын эрдэмтэн судлаачид, иргэд, төрийн болон төрийн бус байгууллагад уриалсугай” гэжээ.
-
2016 оны 10 сарын 14
М.Энхболд Си Зиньпинтэй уулзна
БНХАУ-ын нийслэл Бээжинд улс төрийн намуудын олон улсын чуулга уулзалт болж байна. Энэ сарын 14-17-ны өдрүүдэд үргэлжлэх уг чуулганд Манай улсаас УИХ, МАН-ын дарга М.Энхболд оролцохоор тус улсыг өчигдөр зорьсон билээ.
Тэрбээр энэхүү чуулга уулзалтад оролцох далимд БНХАУ-ын Ерөнхийлөгч Си Зиньпин болон Бүх Хятадын Ардын төлөөлөгчдийн Их Хурлын байнгын хорооны дарга Жан Дөзян нартай уулзалт хийх ажээ.
Айлчлалын бүрэлдэхүүнд Сангийн сайд Б.Чойжилсүрэн тэргүүтэй төлөөлөгчид багтаж буй юм.
Б.Цэцэг
-
2016 оны 10 сарын 14
Нийслэлийн Засаг дарга бөгөөд Улаанбаатар хотын Захирагч С.Батболдын 100 хоногт хийсэн ажлын талаар НИТХ дахь Ардчилсан намын бүлгээс хэвлэлийн бага хурал хийлээ. Хуралд НИТХ дахь Ардчилсан намын бүлгийн дарга Ц.Баатархүү, НИТХ-ын төлөөлөгч Ц.Одонтунгалаг, М.Тулгат нар оролцлоо.
НИЙСЛЭЛИЙН ЗАСАГ ДАРГА С.БАТБОЛДЫН
100 ХОНОГТ ХИЙСЭН АЖЛЫН ТАЛААР НИТХ ДАХЬ
АРДЧИЛСАН НАМЫН БҮЛГИЙН ДҮГНЭЛТ
Нийслэлийн засаг дарга бөгөөд Улаанбаатар хотын захирагч С.Батболд нь үүрэгт ажилдаа томилогдсоноос хойш 100 хоног өнгөрлөө. Энэхүү эхний зуун хоногийн хийсэн ажилд НИТХ-д суудалтай намын бүлгүүд болон Засаг дарга өөрөө үнэлэлт дүгнэлт өгч, иргэд шүүн тунгаадаг уламжлал тогтсон билээ.
Өмнөх Нийслэлийн Засаг дарга томилогдоод 100 хоногт тээврийн хэрэгслийг улсын дугаараар ялган замын хөдөлгөөнд оролцуулж, төв замын нэгдүгээр эгнээг автобусанд чөлөөлөн өгч, замын түгжрэлийг бууруулах, иргэдийг нийтийн тээврээр шуурхай үйлчлүүлэх нөхцөл бүрдүүлэв. Хууль зөрчсөн газар олголтыг таслан зогсоох, зөрчилтэй барилга байгууламжийн үйл ажиллагааг зогсоож, цэгцлэх ажлыг эхлүүлсэн. ЕБС-ын хүүдүүдийг зам тээврийн ослоос урьдчилан сэргийлэх зорилгоор гэрэл ойлгогч цацруулагчтай цүнхний ууттай болгож, зүүж хэвшүүлэн, алслагдсан дүүргийн сурагчдыг сургуулийн автобусаар явуулах гэх зэрэг олон ажлуудыг хийж гүйцэтгэсэн билээ.
Тэгвэл шинэ Засаг даргын 100 хоног нь бүхэлдээ тайван налгар, шинэ санал санаачлага багатай, хойрго өнгөрлөө. Өмнөх Засаг дарга Э.Бат-Үүл эхний 100 хоногт 218 “А” захирамж гаргаж үүнээс ажил сайжруулах, удирдлага, зохион байгуулалтын чиглэлээр 65 захирамж гаргаж байсан бол С.Батболд нийт 101 “А” захирамж гаргаснаас ажил сайжруулах, удирдлага, зохион байгуулалтын чиглэлээр 24 захирамж гаргасан нь үүний нэг жишээ. Засаг дарга С.Батболдын хийсэн голлох ажлуудыг дараах 7 хэсэгт ангилан дүгнэж болохоор байна.
1. Нэр хаяг өөрчилсөн 100 хоног
Чингисийн талбайг Сүхбаатарын талбай болгох шийдвэр гаргаж, 152 хороонд хэрэгжиж эхэлсэн бичил бизнесийн хөтөлбөрийг Итгэлийн зээл, “Найрсаг Улаанбаатар” хөтөлбөрийг “Урлагийн хот Улаанбаатар” болгон өөрчлөв. Нийслэлчүүдэд өнөөдөр өмнөх удирдлагын хийсэн ажлыг үгүйсгэх, нэр хаягийг өөрчлөх нь ач холбогдолтой бус, бодит ажил, үр дүн чухал байна.
2. Дарга төв рүү шилжсэн 100 хоног
Нийслэлийн шинэ Засаг дарга С.Батболд ажлаа хүлээн аваад нэн түрүүнд Засаг даргын өрөөг томсгон, том албан тасалгаанд нүүн орж, үнэтэй засвар хийж тохижуулав.
Өмнөх Засаг дарга Э.Бат-Үүл нэн түрүүнд нийслэлийг нээлттэй, иргэдээ сонсдог болгож, “Улаанбаатар сонсч байна” нийслэлийн лавлагаа мэдээллийн төвийг байгуулж байсан бол шинэ Засаг дарга иргэддээ сурталчилгаа хийдэг “Нийслэлийн мэдээллийн төв”-ийг байгуулав. Иргэдээ сонсдог төр засаг байсан бол өөрсдийгөө сурталчилдаг төр засаг болон хувирлаа.
3. Халаа сэлгээ эхлүүлсэн 100 хоног
Нийслэлийн харьяа агентлаг, ОНӨААТҮГ-ын дарга нарыг сольж, бүтцийн өөрчлөлт хийхэд голлон анхаарч, 2012 оноос хойш ажил, албан тушаалд орсон хүмүүсийг судлах даалгавар өгөв. Одоогийн байдлаар нийслэлд 330 орчим төрийн албан хаагч ажлаас чөлөөлөгдөөд байна.
4. Хаалгаа хаасан 100 хоног
Нийслэлийн ЗДТГ төсөв, хөрөнгө зарцуулалтын талаарх мэдээллээ Шилэн дансанд оруулах нь багасч, оруулсан зарим шийдвэрүүдээ буцаан авч, хөрөнгө, санхүү болон хууль бус томилгоонуудынхаа захирамжуудыг www.ulaanbaatar.mn сайтад байршуулахгүй болов. Шилэн бус “ширмэн” дансаар олон нийтийн хараа хяналтаас далд хууль зөрчин зарцуулалт хийх боломжийг өөрсдөдөө бүрдүүлж өглөө.
Мөн Засаг дарга С.Батболд ажлаа хүлээн авснаас хойш 137 ширхэг ”Б” захирамж буюу ажлаас чөлөөлсөн, томилсон захирамж гаргаснаас 42-г нь тус сайтад байршуулсан бөгөөд үлдэх 107 захирамжаар хэдэн хүнийг ажлаас чөлөөлж, хэдэн хүнийг хууль бус албан тушаалын томилгоо хийсэн нь нууц байна. Үүгээр зогсохгүй 2016.10.11-ны өдөр www.ulaanbaatar.mn сайтад байршуулсан байсан 42 захирамжийнхаа 37-г нь буцаан авч 15 хан захирамжийг үлдээсэн байна.
5. Амлалтаасаа ухарч эхэлсэн 100 хоног
Нийслэлийн Засаг даргын үйл ажиллагааны хөтөлбөрийг батлахдаа сонгуулиар амалсан “Аз жаргалтай хот” мөрийн хөтөлбөрөөс 25 зүйл зорилтыг гээв. Тухайлбал, нийслэлийн өрх бүрийг байртай болгох “Нэг өрх нэг орон сууц”, Залуучууд, залуу гэр бүлд зориулан “Бүх талбайг ашиглах” төлөвлөлт-хэрэгжилт бүхий нэг өрөө орон сууцны барилга барих, хямралын улмаас зогссон үйлдвэрлэл үйлчилгээг сэргээж ажлын байр бий болгоход хувийн хэвшилтэй нягт хамтран ажиллах зэрэг төсөл хөтөлбөр үйл ажиллагааг 2016-2020 оны үйл ажиллагааны төлөвлөгөөндөө тусгалгүй амлалтаасаа ухарч, иргэд сонгогчдоо хуурлаа.
6. Налгар 100 хоног
Засаг дарга энэ 100 хоногт нийслэлийн иргэдийг ажил орлоготой болгож амьжиргааг нь дээшлүүлэх, эдийн засгийн хүндрэл, нийгэмд тулгамдаад байгаа асуудлуудыг шийдвэрлэх, хөрөнгө оруулалт, бүтээн байгуулалтыг нэмэгдүүлэх талаар дорвитой ажил зохион байгуулж, шинийг санаачилсангүй. Харин цаг хугацаатай уралдан явж байсан зам, гудамжны засвар, бүтээн байгуулалтын ажлуудыг тодорхойгүй хугацаагаар зогсоов.
Нийслэлийн эдийн засгийн нөхцөл байдал хүнд байгааг удаа дараа мэдэгдэж байсан ч “Улаанбаатарын намар” арга хэмжээг Сүхбаатарын талбайд 100 гаруй сая төгрөгөөр зохион байгуулж, “Face of beauty international” олон улсын миссийн тэмцээнийг Нийслэлийн Засаг даргын нөөц хөрөнгөөс 20 сая төгрөг гарган ивээн тэтгэлээ.
7. Хойшоо тэмүүлсэн 100 хоног
Эрх баригчид НИТХ-ын Тэргүүлэгчдийн хуралдаанаараа “Гэр хорооллыг орон сууцжуулах төсөл” ОНӨТҮГ, Эдийн засгийн хөгжлийн газар, Нийтлэг үйлчилгээний Улаанбаатар нэгтгэл, Улаанбаатар хотын Захирагчийн ажлын албаны гэр хороолол дахь албадыг татан буулгаж, Улаанбаатар хотын тохижилт, ногоон байгууламжийг эзэнгүй болголоо.
Мөн нийслэлийн иргэдийн дэмжлэгийг хүлээж байсан бага сургууль цэцэрлэгийн цогцолбор, “Монгол наадам цогцолбор” түрээсийн орон сууц, ахмадын орон сууц, цахим газар өмчлөл зэрэг томоохон төсөл, хөтөлбөрүүдийг үргэлжлүүлэх эсэх нь тодорхойгүй байна.
Ийнхүү төрийн бодлогын залгамж чанар алдагдаж, эрх баригчид бүрэн эрхийнхээ хугацаанд хэрэгжүүлэх суурь шинэчлэлийн бодлого, зорилгоо тодорхойлоогүй, хүрэх үр дүн, хэмжих нэгж нь ойлгомжгүй, шинэ санал санаачлагагүй ажиллаж байна. Улаанбаатар хотын ирээдүй бүрхэг байна.
Нийслэлийн Иргэдийн Төлөөлөгчдийн Хурал дахь
Ардчилсан намын бүлэг
НИЙСЛЭЛИЙН ЗАСАГ ДАРГА НАРЫН 100 ХОНОГТ
ХИЙСЭН АЖЛЫН ХАРЬЦУУЛАЛТ
Засаг дарга Э.Бат-Үүл ажлын 100 хоног 2012.08.06-2012.11.14
/Ардчилсан нам олонхи/
Засаг дарга С.Батболдын ажлын 100 хоног 2016.07.06-2016.10.14
/МАН олонхи/
Нийтийн тээврийн үйлчилгээний автобус, троллейбусыг төв замуудаар зорчих хэсгийн нэгдүгээр эгнээгээр явуулахаар шийдвэрлэж, иргэдийг нийтийн тээврээр түргэн шуурхай үйлчлүүлэх нөхцөл бүрдүүлэв. 2012.08.24 1. Авто тээврийн шалган бүртгэх товчоодыг түшиглэн хамтарсан хяналтын хөдөлгөөнт эргүүл, ариутгал халдваргүйжүүлэлтийн ажлыг зохион байгуулав. 2016.07.28
Тээврийн хэрэгслийн улсын дугаараар ялган замын хөдөлгөөнд оролцуулж хотын замын хэт ачааллаас урьдчилан сэргийлэв. 2012.08.22
Иргэдийн аюулгүй амгалан тайван байдлыг хангах, барилгын осол, гэмт хэрэг зөрчлөөс урьдчилан сэргийлж барилга байгууламжийн ажил шинээр эхлүүлэх, өргөтгөхгүй байхаар тогтов. 2016.09.11
Алслагдсан дүүргийн сурагчдад Сурагчийн автобус явуулдаг болов. 2012.10.28
ЕБС-ын хүүхүүдийг зам тээврийн ослоос урьдчилан сэргийлэх зорилгоор гэрэл ойлгогч цацруулагчтай цүнхний ууттай болгож, зүүж хэвшүүлэв. 2012.11.02 2. Албан өрөөгөө томруулан НЗДТГазрын 12 ажилтан бүхий Стратеги бодлого төлөвлөлтийн хэлтсийн өрөөг чөлөөлж, тансаг зэрэглэлийн тохижилт хийв. 2016.08.22
Төрийн болон үйлчилгээний байгууллагуудын гаднах авто зогсоолын талбайд үйлчлүүлэгч иргэдийн автомашиныг зогсоох нөхцөл бүрдүүлэв. 2012.08.29
Иргэдээс ирүүлсэн санал, хүсэлтийн дагуу зарим худалдааны төв, зах зам дагуу байрлах худалдаа үйлчилгээний газруудын цагийн хуваарьт өөрчлөлт оруулав. 2012.09.18
Гудамж замын хөдөлгөөний аюулгүй байдлыг хангах замын хөдөлгөөнийг зохицуулах ажилд иргэд олон нийтийн байгууллагын оролцоог нэмэгдүүлж туслах ажилтныг ажиллуулав. 2012.09.18 3. Нийслэлийн Засаг дарга С.Батболд 137 ширхэг ”Б” захирамж буюу ажлаас чөлөөлсөн, томилсон захирамж гаргаснаас 15ыг нь www.ulaanbaatar.mn сайтад байршуулсан Одоогоор 122 захирамжаар хэдэн хүнийг ажлаас чөлөөлж, хэдэн хууль бус албан тушаалын томилгоо хийсэн нь нууц байна. Мөн 2012 оноос хойш ажил, албан тушаалд орсон хүмүүсийг судлах даалгавар өгөв
Сургуулийн ойролцоо зам талбайд хурд сааруулагч, тэмдэг тэмдэглэл нэмж хийв 2012.09.11
Барилгын ажил шинээр эхлэх, өргөтгөхтэй холбоотой гарч буй зөрчлийг шуурхай, нэн даруй таслан зогсоох, шийдвэрлэх, захиргааны арга хэмжээ авч ажиллав. 2012.09.27
Хотын суурьшлын бүсийн инженерийн шугам, сүлжээнд холбогдох болон шугам сүлжээнд холбогдохоор төлөвлөгдсөн газруудад дүүргийн Засаг дарга нарын хууль зөрчиж олгосон захирамжуудыг судлан үзэж хүчингүй болгох тогтоол гаргав. 2012.09.27 4. Төв аймгийн Баян, Баянжаргалан сумдын нутаг дэвсгэрт малын гоц халдварт шүлхий өвчин гарсантай холбогдуулан арга хэмжээ авах захирамж гаргав. 2016.08.30
Барилга угсралтын ажил эхлэх, үргэлжлүүлэх зөвшөөрөл олгогдоогүй барилга объектыг ус, дулаан, цахилгаанаар хангахгүй байх асуудлаар холбогдох мэргэжлийн байгууллагуудад үүрэг өгч, хамтран ажиллахаар болов. 2012.09.27 5. Нийслэлийн шинэ удирдлага үйл ажиллагаагаа сурталчлах “Хэвлэл мэдээллийн төв”-ийг Хангарьд ордонд байгуулав. 2016.09.22
Хууль тогтоомж зөрчсөн иргэн, аж ахуйн нэгж байгууллагад барилгын ажил эхлүүлэх болон үргэлжлүүлэх зөвшөөрөл олгохгүй байх, зураг төсөл, техникийн баримт бичгийг батлахгүй байх зэрэг үүрэг даалгавруудыг өгч хэрэгжүүлэн ажиллав. 2012.09.27
6. Гэр хорооллын дахин төлөвлөлтийн төсөлтэй холбоотойгоор цаашид авах арга хэмжээний тухай санал боловсруулах ажлын хэсэг байгуулав. 2016.09.23
Нийслэлийн гэр хорооллын айл өрх, аж ахуй нэгж байгууллагаас гарч буй хог хаягдлыг цуглуулж тээвэрлэх, үүсмэл хогийн цэгийг бүрэн арилгахаар журам боловсруулж батлав. 2012.10.10
Улаанбаатар хотын захирагчийн гэр хороолол дахь ажлын албыг байгуулав. 2012.10.10 7. Талбай дээр Камертон, Никитон хамтлагуудын тоглолт бүхий “Улаанбаатарын намар” үдшийн цэнгүүн зохион байгуулж 100 гаран сая төгрөг зарцуулав. (шилэн данс хэрэгжихгүй байгаагаас үүдэн зардлын хэмжээ маргаантай) “Face of beauty international” миссийн тэмцээнийг 20 сая төгрөгөөр ивээн тэтгэв. 2016.09.30
Улаанбаатар сонсож байна 1200, 1234 нийслэлийн лавлагаа мэдээллийн төв байгуулав. 2012.10.08
Нийтийн тээврийн автобус болон эцсийн зогсоолуудыг камержуулах арга хэмжээ авав. 2016.10.25
Албан байгууллагуудын дэргэд хүүхдийн цэцэрлэг байгуулах, бага сургуулийн тоог нэмэгдүүлэх арга хэмжээ авав. -2016.10.25
