-
2016 оны 5 сарын 17
Өнгөрсөн гуравдугаар сарын 20-ны өдөр НӨАТ-ын урамшуулалын долоо дахь удаагийн сугалааны тохирол болж 400 саяын нэг азтанг тодруулсан билээ. Гэвч азтан сугалааны баримтаа бүртгүүлээгүй нэг сар гаруй болсон билээ. Удалгүй А.Цэенпил, Алтанзул гэх хоёр эмэгтэй өөрсдийгөө 400 саяын азтан хэмээн мэдээлж эхэлсэн. Гэсэн ч дээрх хоёр эмэгтэйн хэн нь жинхэнэ азтан болох нь тодорхойгүй нөхцөл байдал үүсээд байсан. Харин Гааль, Татварын Ерөнхий газраас “400 саяын жинхэнэ азтан тодроогүй байгаа” гэх тайлбарыг хийсээр байгаа билээ.
Өөрийгөө азтан гэж буй А.Цэенпилийн хувьд Нийтийн эрх ашгийг хамгаалах нийгэмлэгт хандаад байсан юм. Тэгвэл өнөөдөр А.Цэенпилийг Эрүүгийн цагдаагийн газраас хуурамч бичиг баримт үйлдсэн сэжигтнээр татан байцааж эхэлсэн байна. Түүний өнөөдөр өглөө Гааль, Татварын Ерөнхий газраас өргөдлийнхөө асуудлаар ирж уулзах шаардлагатай хэмээн дууджээ. Энэ талаар А.Цэенпилийн эгч А.Баяржаргал ярихдаа “Гааль, Татварын Ерөнхий газарт ирэхэд нэг давхарт хүлээж бай. Тэнд уулзалт хийнэ гэж хэлсэн. Тэнд сууж байхад Эрүүгийн цагдаагийн ахлах дэслэгч залуу орж ирээд “Сугалааны хонжворын мөнгөө авч чадаагүй юм байна” энэ талаар чинь ярих гээд оффис руу гаа аваад явсан. Эрүүгийн цагдаагийн газарт ирээд дүүгээ цагдаагийн өрөө рүү оруулчихаад би нилээн хүлээсэн. Ингээд үүдээр нь шагайгаар харсан чинь манай дүү уйлаад байх шиг байсан. Өмгөөлөгч рүү нь залгаад дуудсан” гэв.
Харин А.Цэенпилийн өмгөөлөгч Г.Атармаа “А.Цэенпилийн хувьд бол Оргил худалдааны төвөөр үйлчлүүлээд 19000 төгрөгөөр худалдан авалт хийгээд азтан болсон. Баримтаа зохих журмынх нь дагуу аваачиж өгсөн. Өнөөдрийн хувьд баримт бичиг хуурамч байна гэсэн шалтгаанаар тайлбар авч байгаа юм байна. А.Цэенпилийн хувьд би хуурамчаар үйлдээгүй гэж байгаа. Гааль, татварын газар сугалаат хонжвор зарлачихаад иргэнээ эрүүгийн гэмт хэрэгтэн болгохоор улайрч байна уу гэж харж байна” гэлээ.
Гааль, татварын Ерөнхий газраас А.Цэенпилийг хуурамчаар бичиг, баримт үйлдсэн байж болзошгүй. Шалгаж өгнө үү гэсэн хүсэлтийг ЦЕГ-т гаргажээ.
-
2016 оны 5 сарын 17
Моссак Фонсека хуулийн фирмээс алдагдсан 11.5 сая нууц материал олон нийтэд дэлгэгдэж, дэлхий нийтийн анхаарлыг энэ зүг рүү хандуулсан.
-
2016 оны 5 сарын 17
АСЕМ-ийн дээд хэмжээний уулзалтын үеэр үйлчлэх тээврийн хэрэгслийн жолооч нарын бүрдүүлэх материалыг Автотээврийн үндэсний төвд авч эхэлжээ. Материалыг маргааш 12.00 цагаас өмнө хүлээж авах юм байна.
Ингэхдээ жолооч нар дараах шаардлагыг хангасан байх ёстойг анхаарна уу.
Тээврийн боловсролтой, 28 наснаас дээш, туршлага 10–аас дээш жил, Д ангиллаар 5-аас дээш жил ажилласан тус ангиллаар мэргэшсэн жолооч байх
2015 оны нэгдүгээр сарын 01-ний өдрөөс хойш зам тээврийн осол зөрчил гаргаж байгаагүй зөрчлийн оноо бүрэн байх
Гадаад хэлний зохих түвшиний мэдлэгтэй байх
Эрүүл мэндийн үзлэгт бүрэн хамрагдсан байх
Байгууллагын тодорхойлолт
Бүрдүүлэх материалын тухайд:
Ажилд орохыг хүссэн анкет 1 дүгээр маягт 1 %
Иргэний үнэмлэх хуулбар
Жолоочийн үнэмлэхийн хуулбар
Мэргэшсэн жолоочийн үнэмлэхийн хуулбар
Авто үйлчилгээ мэргэшсэн жолоочийн сургалт хариуцсан хэлтэст “Замын хөдөлгөөний дүрэм”-ийн шалгалт өгөх /Шалгалтын хураамж 9900 төгрөг төлөх/
Дашрамд дурдахад, Дээрх шаардлагыг хангасан жолооч нар Сүхбаатар дүүрэг Хоёрдугаар хороо, Засгийн газрын 13 дугаар байрны залгаа, Автотээврийн үндэсний төв, хоёр давхар 202 тоотод материалаа өгөх юм байна.
-
2016 оны 5 сарын 17
”Босоо хөх Монгол” ТББ-ын удирдах зөвлөлийн дөрвөн гишүүнийг цагдаагийн байгууллагаас хорьсон гэх мэдээлэл байна. Одоогоор ямар шалтгаанаар хорьсон эсэх нь тодорхойгүй байна.
-
2016 оны 5 сарын 17
Монгол Улсын Засгийн газрын тогтоолоор Өмнөговь аймгийн Цогтцэций суманд Гал түймэр унтраах, аврах III зэрэглэлийн 44 дүгээр ангийг байгуулахаар болсон.
-
2016 оны 5 сарын 17
“МӨРӨӨДЛИЙН ХОТ” хүүхдийн гар зургийн уралдааныг 3 дахь жилдээ зарлалаа
-
2016 оны 5 сарын 17
Хар тамхины хэрэгт холбогдсон Тээврийн прокурорын газрын хяналтын прокурор Х.Тамир нарын дөрвөн хүнд холбогдох шүүх хурал өнөө өглөө 09 цагаас Баянгол, Сүхбаатар, Хан-Уул дүүргийн Эрүүгийн хэргийг шүүх танхимд эхэлсэн ч нэг өмгөөлөгч нь хуралтай гэсэн шалтгаанаар шүүх хурлыг хойшлуулжээ.
-
2016 оны 5 сарын 17
Нийслэлийн Засаг Даргын Тамгын газар, Азийн хөгжлийн банктай хамтран тусгай замын автобусны үйлчилгээг Улаанбаатар хотод нэвтрүүлэхээр “BRT төсөл”-ийг эхлүүлсэн. Төслийн хүрээнд нийслэлийн иргэдийн зорчилтын тоог бодитоор гаргаж, 2017 онд үйлчилгээнд нэвтрүүлэх тусгай замын автобусны маршрутыг оновчтой төлөвлөх зорилгоор Азийн хөгжлийн банкны санхүүжилтээр анх удаа Улаанбаатар хотын иргэдийн дунд зорчилтын судалгааг явуулахаар боллоо. Өнөөдөр энэ тухай мэдээлэл өгөхөөр Нийслэлийн Засаг даргын Зам тээвэр, дэд бүтцийн асуудал хариуцсан орлогч Н.Гантөмөр болон Азийн хөгжлийн банкны ”Улаанбаатар хотын тээврийн чадавхийг бэхжүүлэх техникийн туслалцааны баг”-аас хэвлэлийн бага хурал хийлээ. Төслийн багийхан өнөөдрөөс эхлэн долоо хоногийн хугацаанд иргэдийн гар утсаар дамжуулан зорчилтын судлагаа явуулж байгааг хэлээд, энэ судалгаа нь Улаанбаатар хотын замын хөдөлгөөний ачааллыг бууруулах, аюулгүй байдлыг сайжруулах, нийтийн тээврийн үйлчилгээний хүрэлцээг нэмэгдүүлэх, тусгай замын автобусны үйлчилгээг оновчтой төлөвлөх, хөрөнгө оруулалтыг аль төсөлд, хэрхэн зарцуулах талаар шийдвэр гаргахад бодит дэмжлэг болно гэдгийг онцоллоо.
Судалгааг иргэдэд аль болох хүндрэлгүй, хурдан, шуурхай, бодитой явуулах зорилгоор иргэдийн гар утсаар дамжуулан авахаар төлөвлөөд байгаа юм байна. Ингэхдээ оршин суудаг байрлалаас хамааруулан цахим оноолтоор судалгаанд оролцогчдыг сонгох бөгөөд ойролцгоор 8 000 гаруй иргэнийг хамруулахыг зорьж байгаагаа хэллээ. Энэ нь Улаанбаатар хотын нийт хүн амын 0,5 хувийг учраас судалгааны дүн илүү бодитой гарна гэж зохион байгуулагчид үзжээ. Иргэдийн судалгааны бүх мэдээлэл өндөр нууцлалын зэрэглэлтэй байна гэдгийг зохион байгуулагчид хэлж байна. Энэхүү судалгааг 2016 оны 05 дугаар сарын 17-ны өдрөөс эхлүүлэн 5 дугаар сарын 21-ний өдрийн 09:00-21:00 цагийн хороонд явуулах бөгөөд судалгаанд оролцогчдын цаг завыг хүндэтгэн үзэж Азийн хөгжлийн банкнаас бага хэмжээний нэгж бэлэглэх юм байна. Тиймээс энэ тухай мэдээллийг олон нийтэд үнэн зөвөөр мэдээлж, хамтран ажиллахыг төслийн багийнхан хүсэж байлаа. Мөн нийслэлийн иргэдийг Улаанбаатар хотын хөгжил цэцэглэлт, нийтийн тээврийн хөгжлийн төлөө судалгаанд идэвхтэй оролцохыг уриаллаа.
Хэрэв таны гар утас руу хотын нийтийн тээврийн хөгжлийн талаарх судалгаанд оролцохыг хүссэн зурвас ирвэл та зааврын дагуу хариу бичин судалгаанд оролцох боломжтой юм байна гэж Нийслэлийн ЗДТГ-ын Хэвлэл мэдээлэл, олон нийттэй харилцах хэлтсээс мэдээллээ.
-
2016 оны 5 сарын 17
Улаан бурхан өвчний байдал, түүний тархалтыг бууруулах чиглэлээр хэрэгжүүлсэн арга хэмжээний талаар Эрүүл мэнд, спортын сайдын үүрэг хариуцагч бөгөөд Шадар сайд Ц.Оюунбаатар танилцууллаа. Өмнөх 7 хоногтой харьцуулахад уг өвчний тархалт саарах хандлагатай байгаа ба Засгийн газраас зохих хөрөнгийн эх үүсвэрийг шийдвэрлэснээр улаанбурхан өвчний эсрэг нэмэлт дархлаажуулалтыг эхлүүлж 5 дугаар сарын 15-ны байдлаар улсын хэмжээнд 624000 хүн хамрагдахаас 139538 хүн хамрагдаж, хамралт 22.4 хувьтай байна.
Энэ ажилд тусгайлан бэлтгэгдсэн 1200 эмч, 350 сувилагч оролцож байгаагийн зэрэгцээ АШУҮС-ийн 550 оюутан, Зоонозын өвчин судлалын үндэсний төвөөс эмч нарыг татан ажиллуулж байгаа юм байна. Нэмэлт дархлаажуулалтын эрчийг бууруулахгүй ажиллахыг Ерөнхий сайд холбогдох албан тушаалтнуудад үүрэг болголоо.
-
2016 оны 5 сарын 17
Нэмэгдсэн өртгийн албан татварын тухай хуульд нэмэлт, өөрчлөлт оруулах тухай хуулийн төсөл, Улсын Их Хурлын 2015 оны 108 дугаар тогтоолд нэмэлт оруулах тухай УИХ-ын тогтоолын төслийг хэлэлцээд хуралдаан дээр Засгийн газрын гишүүдээс гаргасан саналыг тусган УИХ-д өргөн мэдүүлэхээр тогтлоо.
Энэхүү хуулийн төсөл батлагдсанаар НӨАТ-ын буцаан олголтоо иргэд улирал тутам буцаан авах боломж бүрдэнэ. Одоо хүчин төгөлдөр мөрдөгдөж байгаа хуулийн дагуу НӨАТ-ын буцаан олголтыг дараа оны 1 дүгээр сард олгохоор зохицуулсныг Засгийн газар төсвийн боломжтой уялдуулан улирал тутам олгуулах эрх зүйн нөхцөл бүрдүүлэхээр ийнхүү холбогдох төслүүдийг УИХ-д өргөн мэдүүлэхээр боллоо.
2016 оны 1 дүгээр улирлын байдлаар Татварын албаны цахим төлбөрийн системд 31758 аж ахуйн нэгж, иргэн бүртгүүлсэн, үйлчилгээний газруудад 38 сая 310 мянга гаруй баримт хэвлэгдсэн, 15 сая 771 мянга гаруй баримт баталгаажсан үзүүлэлттэй байна. Нийт 5216 албан татвар төлөгч иргэн, НӨАТ суутган төлөгч аж ахуйн нэгжээс 385 тэрбум төгрөгийн худалдан авалт хийснээс НӨАТ-ын 20 хүртэлх хувийн буцаан олголтоор 5.8 тэрбум төгрөг авах тооцоотой байна.
-
2016 оны 5 сарын 17
Хорт хавдар үүсгэгч хуванцар савнаас татгалзахыг оюутан залуус уриллаа. Өнөөдөн тэд хэвлэлийн хурал хийж, чимээгүй тахал гэгдээд буй хуванцар савны хор хөнөөлийн талаар мэдээллээ. Оюутан залуус “Хорт хавдар өвчин үүсгэгч хуванцар савны хэрэглээнээс татгалзаж, зохистой хэрэглээг дэмжье” хэмээн уриалж байна.
-
2016 оны 5 сарын 17
Чингэлтэйн гудамжны авто замын өргөтгөл шинэчлэлтийн ажлын хүрээнд Камел дэлгүүрээс Хайлааст руу салах уулзвар хүртэлх 0,7 км авто замын хөдөлгөөнийг 2016 оны 05 дугаар сарын 18-ны 06:00 цагаас 2016 оны 05 дугаар сарын 22-ны 06:00 цаг хүртэл хөдөлгөөнийг хааж хязгаарлахтай холбогдуулан нийтийн тээврийн үйлчилгээний Ч:23 “Чингэлтэй-Зүрх уул-МУБИС-Цэцэг төв” чиглэлийн замналыг дараах байдлаар өөрчилнө.
-
2016 оны 5 сарын 17
Тулгар төрийн 2225, Их Монгол Улсын 810 жил, Ардын хувьсгалын 95 жилийн ойн баярыг зохион байгуулах Үндэсний хорооны энэ жилийн эхний хурал өнгөрсөн дөрөвдүгээр сард болж, салбар хороодын бүрэлдэхүүнийг баталсан байгаа билээ.
-
2016 оны 5 сарын 17
Авто тээврийн болон өөрөө явагч хэрэгслийн албан татвар, агаарын бохирдол, авто зам ашигласны төлбөр авах хуулийн хугацаа энэ сарын 31 -нд дуусна.
-
2016 оны 5 сарын 17
Авлигын эсрэг зохицуулалтын олон улсын төв байгуулахыг дэмжихээ Интерпол мэдэгдэв
-
2016 оны 5 сарын 17
ХӨСҮТ-өөс гаргасан мэдээлэлд 2015 оны байдлаар Монгол Улсад 5,777 хүн хорт хавдраар өвчилж, түүнээс 3,999 нь хорвоогийн мөнх бусыг үзсэн байна.
-
2016 оны 5 сарын 17
СХД-ийн 30-р хороо ”Чулуутын ... тоотоос түлэгдсэн хүүхэд ГССҮТ-д ирж хэвтлээ” гэсэн мэдээлэл өчигдөр цагдаагийн байгууллагад иржээ. Мэдээллийн дагуу цагдаагийн алба хаагчид очиж шалгахад тус тоотод суух Б /эр.1,7н/ нь халуун тогоотой буцалсан усанд унаж түлэгдэн тус төвийн эрчимт эмчилгээний тасагт хүргэгдэн эмчлүүлж байгааг СХДЦХ-3 шалгаж байна.
Мөн Архангай аймгийн ”Их тамир сумын нутаг Хөх нуур баг Цохио толгой гэх газар 2 настай эрэгтэй Э нь усанд живж нас барсан байна” гэх мэдээллийг 05-р сарын 16-нд авч шалгаж байна.
Эцэг, эх асран хамгаалаагчдын хайхрамжгүй байдлаас болж хүүхэд амь нас, эрүүл мэндээрээ хохирсоор байна. Ийм төрлийн дуудлага эрс нэмэгдсэн талаар цагдаагийн байгууллагаас мэдээллээ.
-
2016 оны 5 сарын 17
“Монгол цэргийн жавхаа-2016” уралдааны хоёрдугаар шатны шалгаруулалт Баасан гарагт болно
-
2016 оны 5 сарын 17
Нийслэлд ногоон төсөл хэрэгжүүлэгч аж ахуйн нэгжийг шалгаруулж, урамшуулдаг болно
-
2016 оны 5 сарын 17
“Ухаалаг Улаанбаатар” хөтөлбөрийн хүрээнд газрын харилцааны бүх төрлийн үйлчилгээг нэгтгэн, цахимжуулах зорилгоор ULAS системийг боловсруулан, нэвтрүүлж эхэллээ. Нийслэлийн Мэдээллийн технологийн газар, Өмчийн харилцааны газартай хамтран “Монгол Улсын иргэнд газар өмчлүүлэх тухай хууль”-ийг хэрэгжүүлж, нийслэлд бүртгэлтэй нийт иргэдэд газар өмчлүүлэх үндсэн зорилгын хүрээнд Нийслэлийн ИТХ-аас баталсан 52 байршилд газар өмчлүүлэх ажлыг цахим хэлбэрээр 2014 оноос хойш 5 удаа зохион байгуулаад байна. Энэхүү хугацаанд нийслэлд оршин суух бүртгэлтэй 650 мянган иргэн цахим бүртгэлд хандан нийт 923 168 хүсэлт ирүүлснээс 71 165 иргэн газар өмчилж авсан байна.
2003-2012 оныг хүртэлх 10 жилийн хугацаанд нийслэлийн хэмжээнд 91025 иргэнд газар өмчлүүлсэн бол 2013-2016 оныг хүртэлх хугацаанд 94385 иргэнд газар өмчлүүлсэн байна. Цахим системээр газар өмчлүүлэх ажил газрын харилцааны салбарт гарсан томоохон дэвшил болох нь эндээс харагдаж байна. Уг ажлын үргэлжлэл болгож нийслэлийн Мэдээллийн технологийн газраас Нийслэлийн ИТХ-аас 2015 онд баталсан 68 байршилд цахим газар өмчлөлийн ажлыг зохион байгуулахаар бэлтгэл ханган ажиллаж байна.
Нийслэлийн иргэн, хуулийн этгээдэд Хотын ногоон бүс дэх зуслангийн газруудыг өмчлүүлэх ажлыг олон жил хүлээсэн. Энэхүү ажлыг өнгөрсөн 4 дүгээр сард эхлүүлж, 26 байршилд 2000 гаруй иргэдийн зуслангийн газраа өмчлөх хүсэлтийг газрын харилцааны ULAS системээр дамжуулан хүлээн авч шийдвэрлэж байгаа юм.
ULAS системийн дараагийн шатны ажил болгож 10 байршилд газрын дуудлага худалдааг цахим хэлбэрээр зохион байгуулах газрын цахим биржийг бэлэн болголоо.
Цахим биржид бүртгүүлэхийн тулд иргэн хуулийн этгээд Газрын харилцааны www.land.ulaanbaatar.mn системд бүртгүүлэн орж цахим бирж хэсгээс оролцох газраа сонгож хүсэлтээ илгээнэ. Газар өмчлөлийн цахим системд бүртгэлтэй иргэд уг эрхээрээ www.land.ulaanbaatar.mn рүү орно.
Хүсэлтээ илгээсний дараа дэнчин төлсөн баримт болон бусад холбогдох баримтуудыг бүрдүүлэн Нийслэлийн үйлчилгээний нэгдсэн төвүүд дэх НӨХГ-ын мэргэжилтэнд хандаж дуудлага худалдаанд оролцох эрхээ авна.
Бүрдүүлэх материал
Дуудлага худалдаанд оролцохыг хүссэн этгээд дараах материалуудыг бүрдүүлэн Нийслэлийн үйлчилгээний төвүүдэд байрлах Нийслэлийн өмчийн харилцааны газрын мэргэжилтэнд хандана уу.
Үүнд:
Иргэний үнэмлэх, эсхүл түүнтэй адилтгах бичиг баримт, улсын бүртгэлийн гэрчилгээний хуулбар
Дэнчин төлсөн баримт
Дуудлага худалдаанд иргэнийг төлөөлж оролцох тохиолдолд тухайн иргэний олгосон нотариатаар гэрчлүүлсэн итгэмжлэл
Дуудлага худалдаанд аж ахуйн нэгж, байгууллагыг төлөөлж оролцох тохиолдолд тухайн аж ахуйн нэгж, байгууллагын олгосон итгэмжлэл байна гэж Нийслэлийн Мэдээллийн технологийн газраас мэдээллээ.
