-
2016 оны 2 сарын 16
09:30 цагт ОБЕГ-ын хурлын танхимд ХАХНХЯ,НҮБ, Онцгой байдлын ерөнхий газар хамтран зохион байгуулж буй Зудад нэрвэгдсэн хөдөөгийн малчдад зориулсан Ариун цэвэр, эрүүл ахуйн багцуудыг хүлээлгэж өгөх үйл ажиллагаа болно.
10:00 цагт энэ сарын 11-14-ний хооронд Туркийн Истанбул хотноо болсон ”Олон Улсын Тогооч нарын Холбооны 14-р их наадам”-аас Монголын мастер тогооч нар багийн болон Ази хоолны төрөлд нийт 6 мөнгөн медаль хүртсэн тогооч нар Чингис хаан ОУНБ-д газардана. 2010 оноос манай улсын тогооч нар ОУ-ын чанартай уралдаан тэмцээнүүдэд амжилттай оролцож, улсынхаа нэрийг дэлхийн хоол үйлдвэрлэлийн салбарт гаргасаар яваа юм.
11:00 цагт Засгийн газрын III байрны 320 тоотод /хуучнаар статистикийн хорооны байр/ Монгол Улсын нийгэм, эдийн засгийн байдлаарх хэвлэлийн бага хуралтай
11:00 цагт Зууны мэдээ сонины Үндэсний мэдээллийн төвд Хувьцаа эзэмшигч, хөрөнгө оруулагчдын эрхийг хамгаалах төвөөс Эрдэнэс тавантолгой ХК-ийн хувьцааг арилжаалах асуудлын тухай мэдээлэл хийнэ.
11:00 цагт 130-р бага сургууль /15-р хороо Рапид хорооллын зүүн талд/ ”Хүүхдэд ээлтэй Хан-Уул” хөтөлбөрийн хүрээнд өнгөрсөн 2015 онд ЕБС-ын 10 сургуульд ”Робот кабинет” байгуулж, сурагчдын техник сэтгэлгээг хөгжүүлэн, ирээдүйн инеженерүүдийг бэлтгэх болсон. Үүнээс үүдэн ХУД-ын ЗДТГ, Монголын Роботын боловсролын нийгэмлэгтэй хамтран дүүргийн аварга шалгаруулах ”Лего Робот” тэмцээн зохион байгуулагдах гэж байна.
12:00 цагт Уул уурхайн яамны хүндэтгэлийн танхимд Уул уурхайн яам Японы шинэ эрчим хүч, аж үйлдвэрийн байгууллагатай хамтран нүүрсийг хуурай аргаар баяжуулах туршилтийн төслийг хэрэгжүүлэх гэж байгаатай холбоотойгоор санамж бичиг байгуулна.
-
2016 оны 2 сарын 16
Төрийн албан хаагч болон төрийн өндөр дээд албан тушаалтнууд хөрөнгө, орлогын мэдүүлгээ Авлигатай тэмцэх газарт хүргүүлэх хуулийн хугацаа өчигдөр дуусгавар болсон бөгөөд өнөөдөр албан ёсоор мэдээлэл өгнө гэж байгаа юм. Өчигдрийн байдлаар нийт 38 мянга 906 албан хаагч мэдүүлгээ өгчээ. Ингэснээр ХОМ-ийн явц 98,5 хувьтай байгааг АТГ-аас мэдээлсэн билээ. Мөн 269 төрийн өндөр албан тушаалтан мэдүүлгээ өгсөн нь 100 хувийн биелэлттэй байгаа аж. Ирэх гуравдугаар сарын 1-нд орно нутгийн албан хаагчдын ХОМ-ийг нэгтгэж иргэдэд танилцуулна. Энэ хугацаанд мэдүүлэг өгөөгүй албан тушаалтнууд мэдүүлгээ өгвөл хугацаа хоцорсныг тэмдэглэж олон нийтэд мэдээлэх юм байна.
-
2016 оны 2 сарын 16
Нийслэлийн Засаг даргын Санхүү, эдийн засгийн асуудал хариуцсан орлогч Н.Батаа “Газар эзэмших эрх олгох тухай” А/106 дугаар захирамж гаргалаа. Захирамжаар 2015 оны 12 дугаар сарын 03-ны өдөр зохион байгуулсан газар эзэмших эрхийн төсөл сонгон шалгаруулалтад оролцож ялагчаар тодорсон Ж.Гадинжид, Б.Буядаа, Г.Анужин, Д.Цэцэгсүрэн, Б.Шижиртуяа, Б.Ариунаа, Г.Ганцолмон, Л.Алтангэрэл, Р.Батжаргал нарт Налайх дүүргийн 3 дугаар хорооны нутаг дэвсгэрт уурхайн урд талд мод үржүүлгийн зориулалтаар тус бүр 5 га газрыг 15 жилийн хугацаатай эзэмших эрх олгов.
Уг захирамж гарсантай холбогдуулан газар эзэмшүүлэх гэрээг байгуулж, гэрчилгээг олгон газрын улсын бүртгэлд бүртгэж, газрыг актаар хүлээлгэн өгөхийг нийслэлийн Өмчийн харилцааны газарт, газар ашиглалтад хяналт тавьж ажиллахыг Налайх дүүргийн Өмч, газрын харилцааны албанд тус тус үүрэг болголоо.
Захирамжийн хэрэгжилтэд хяналт тавьж ажиллахыг нийслэлийн Засаг даргын Хот байгуулалт, хөрөнгө оруулалтын асуудал хариуцсан орлогч С.Очирбатад даалгав гэж Нийслэлийн ЗДТГ-ын Хэвлэл мэдээлэл, олон нийттэй харилцах хэлтсээс мэдээллээ.
-
2016 оны 2 сарын 15
Үндсэн хуулийн Цэцийн дунд суудлын хуралдаан сая хуралдаж дууслаа. Цэцийн дунд суудлын хуралдаанаар УИХ-ын гишүүн Х.Тэмүүжингийн санаачлан боловсруулсан Үндсэн хуулийн Цэцийн тухай хуульд нэмэлт өөрчлөлт оруулах тухай хуулийн хэд хэдэн заалт Үндсэн хуулийг зөрчсөн гэж үзжээ. Ийнхүү хуульч, Хууль зүйн сайд асан Х.Тэмүүжин гишүүний санаачлаад Цэц дээр бүдэрсэн хуулийн тоо нэгээр нэмэгдлээ. Дашрамд дурьдахад дээрх асуудлыг маргааш Цэцийн их суудлын хуралдаанаар мөн хэлэлцэхээр товлоод байгаа талаар мэдээлэл цацагдаад байгаа юм.
-
2016 оны 2 сарын 15
Кристоф Раулт: “Франц улсад шүүгч, прокурор 2 адилхан зэрэг дэв, цалинтай байдаг”
IMG_6815
Улсын Ерөнхий прокурорын газрын Сургалтын төв, Францын магистратурын сургуулийн хамтын ажиллагааны хүрээнд Монгол Улсын Ерөнхий прокурорын газар зочилж байгаа Франц улсын хуульч Кристоф Раулттай Улсын Ерөнхий прокурорын туслах, Гадаад харилцаа эрх зүйн туслалцааны хэлтсийн дарга Г.Ганзориг ярилцлаа.
Монгол Улсад гурван долоо хоногийн хугацаанд ажиллаж Монгол Улсын хуулийн тогтолцоог нилээд үзэж судаллаа сэтгэгдэл ямар байна?
Анх удаагаа Монголд ирсэндээ туйлын баяртай байна. Монгол Улсын Ерөнхий прокурор намайг хүлээж авахыг зөвшөөрсөнд их баярлаж байгаагаа илэрхийлье. Энэ хугацаанд хэд хэдэн дүүргийн прокурорын газрын үйл ажиллагаатай танилцлаа. Тэд намайг их сайхан хүлээж авсанаас гадна прокурорын байгууллагын тохижилт нь үнэхээр их таалагдсан. Миний байсан хугацаанд Монголчуудын уламжлалт баяр “Цагаан сар” болж энэхүү баяр хэрхэн болж өнгөрдөг, ямар зан заншилтай байдгийг мэдэж авлаа. Мөн хөдөө явж монгол гэрт зочилж, цагаан сар тэмдэглэсэндээ баяртай байна. Хэдий хүйтэн цаг үе таарсан ч уул, ус нь үнэхээр сайхан юм. Энэ хүйтнийг тэсвэрлэх Монголчуудын онцлогтой танилцаж дасан зохицож байлаа. Монгол улсын эрх зүйн тогтолцоо, Франц улсын эрх зүйн тогтолцоонд зарим талаараа адил, зарим талаараа ялгаатай зүйл байна. Франц улсад бол шүүгч, прокурорыг хамт бэлддэг ба шүүгчээр ч томилогдож болдог, прокуророор ч томилогдож болдог. Монголд бол зөвхөн прокуророор томилж ажилуулдаг юм байна. Ер нь шүүгч прокурор хоёрын зэрэг дэв, түвшин адилхан. Монголд бол шүүгч, прокурорын зэрэг, дэв өөр байдаг юм байна. Жишээлбэл: Шүүх хуралдаан дээр суух суудлын байрлал, мэтгэлцэж байгаа мэтгэлцээний хэлбэр өөр өөр байдаг юм байна.
Монгол улсад прокурор болохын тулд сургууль төгсөөд 2 жил ажиллаж байгаад хуульчдийн холбооны шалгалт өгч шалгалтандаа тэнцвэл хуульчийн үнэмлэх авдаг журамтай. Францад харин ямар тогтолцоотой байдаг вэ?
Франц улсад таны хэлснээс арай өөр системтэй. Их сургуулийн түвшинд 4-5 жил сураад одоо миний суралцаж байгаа Франц Улсын Магистратурын үндэсний сургуульд конкурс өгөөд элсэж орох бүрэн боломжтой. Амжилттай элсэж орсон сонсогч нарыг шүүгч, прокуророор бэлтгэн гаргадаг. Тиймээс манай сургууль бол зөвхөн шүүгч прокурорыг бэлтгэн гаргадаг гэсэн үг юм. Дараагийн тодотгож хэлэх зүйл гэвэл Монгол улсад зайлшгүй 2 жил прокурор, шүүхийн байгууллагад туслахаар ажиллуулдаг юм байна. Тэгвэл Франц Улсад сургуульдаа 4-5 жил сураад конкурсаа амжилттай өгснөөр Магистрантурын сургуульд элсэн орох боломж бүрддэг. Ингээд Магистратурын сургуулиа төгссөнөөр шүүгч, прокуророор томилогдох боломж бүрддэг. Бид анх сургуульд орохдоо Францынхаа эрх зүйн тогтолцоо, шүүхийн системийг бүрэн гүйцэд таньж мэдээгүй байдаг. Тэгэхээр бидэнд сургалтын явцад шүүгч, прокуророор томилогдоод ажиллах, дасан зохицох, дадлагажих боломжийг сургууль олгодог бөгөөд сургалт нь онол, практик гэсэн хосолмол төрлөөр явагддаг.
Шүүгч, прокурор гэсэн мэргэжлийг нэг сургуульд ижил хугацаанд суралцаж төгсдөг юм байна. Харин ажлын талбар дээр гарахад зэрэг дэв цалин ямар байдаг вэ?
Шүүгч, прокурорын хувьд хийж байгаа ажлын чиг үүрэг нь өөр болохоос адилхан шүүх эрх мэдлийн түшмэдүүд, томилогдоод зэрэг дэв, цалин яг адилхан нэг түвшинд байдаг. Жишээлбэл: Миний тодотгож хэлэх зүйл бол анхан шатны шүүхийн удирдлагыг тухайн шүүхийн дэргэдэх Ерөнхий шүүгч юмуу шүүхийн дэргэдэх Ерөнхий прокурор хамтран удирддаг.
Шүүх хуралдаан явуулах зарчмыг би их ялгаатайгаар харж байгаа юм л даа. Монгол Улсад шүүх хуралд мэтгэлцээний зарчмаар явагддаг. Прокурор, яллагдагч, өмгөөлөгч нар Үндсэн хуулинд заасны дагуу тэгш эрхтэй байдаг. Харин Францад шүүгч, прокурор хоёр тэгш эрхтэй байдаг болохоор арай өөр тогтолцоотой юм байна. Энэ талаар дэлгэрэнгүй тайлбарлаж өгөөч?
Франц Улсад шүүх, прокурор хэдий цалин мэргэжлийн түвшин тэнцүү боловч чиг үүрэг нь өөр. Жишээлбэл: Шүүгч шүүх хуралдааныг удирдах, шүүх хуралдаанд шийдвэр гаргах нь шүүхийн эрх юм. Гэхдээ шүүх хуралдааны өмнө бол Франц улсын прокурор Монгол улсын прокуророос арай илүү эрх мэдэлтэй байдаг. Тэр нь альтернатив зарчмын хүрээнд прокурор хэргийг шийдвэрлэх өргөн боломжтой гэсэн үг юм. Мөн Франц Улс ардчилсан улс учир шүүхийн өмнө бүгд тэгш эрхтэй гэдэг үүднээсээ прокурор, шүүгч бүгд адил тэгш эрхтэй. Гэвч шүүгдэгч бол нэг л талын эрх ашиг юм. Прокурор нийтийн эрх ашгийг хамгаалж байгаа болохоор эрх ашгийн төлөөллийг адил тэнцүү тавьж үзэх боломжгүй талаараа ялгаатай байдаг.
Та Монгол Улсад 3 долоо хоног ажиллах хугацаанд нэлээд олон хуулийн байгууллагуудын үйл ажиллагаатай танилцлаа. Энэ үеэр танд хамгийн их сэтгэгдэл төрүүлсэн болон зарчмын ялгаатай зүйл нь юу байна?
Монгол Улсын прокурорын байгууллага болон түүний салбар нэгжүүдийн үйл ажиллагаатай танилцлаа. Танилцах явцад тухайн прокурорын ажиллаж байгаа орчин маш сайхан тохижилттой юм. Мөн 2 өөр эрх зүйн тогтолцооны ялгааг олж харлаа. Түүнчлэн дүүргийн прокурорууд ихэд элэгсэг дотноор хүлээн аваад Францын эрх зүйн тогтолцооны талаар их зүйл асууж байсан. Ер нь Монгол хүмүүс их сайхан элэгсэг дотно хүмүүс юм.
-
2016 оны 2 сарын 15
Газрын тос боловсруулах үйлдвэр барьснаар импортын хэмжээ 1.2 тэрбум ам.доллараар буурна
-
2016 оны 2 сарын 15
Өнөөдөр цагаан сарын шинийн 8-ны билэгт сайн өдөр тохиож байна. Эл өдөр Дээрхийн Гэгээнтэн IX Богд Жэвзүндамба Хутагтын “Лагшин эрдэнэ”-ийг хүндэтгэн залах ёслол ийнхүү Гандантэгчилэн хийдэд боллоо.
-
2016 оны 2 сарын 15
“Хөгжлийн хөтөлбөр нам”-ын дүрмийн нэмэлт өөрчлөлт болон намын лого, намын дарга өөрчлөгдсөнийг бүртгүүлэх тухай тус намаас гаргасан хүсэлтийг Улсын Дээд шүүх өнөөдөр хянан хэлэлцжээ.
-
2016 оны 2 сарын 15
Золголт хийхээр нийслэлээс Төв аймгийг зорьсон таван иргэн ор сураггүй болсон талаар бид мэдээлж байсан.
-
2016 оны 2 сарын 15
Нэр бүхий иргэд 2016 оны 1 дүгээр сарын 20-ны өдөр Үндсэн хуулийн цэцэд хандаж Улсын Их Хурлаас Монгол Улсын Үндсэн хуулийн цэцийн тухай хуульд өөрчлөлт оруулах тухай хууль, Монгол Улсын Их Хурлын чуулганы хуралдааны дэгийн тухай хуульд өөрчлөлт оруулах тухай хуулийг 2016 оны 1 дүгээр сарын 19-ний өдөр батлан гаргахдаа Үндсэн хуулийн цэцийн 2010 оны 02 дугаар тогтоолоор хүчингүй болгосон хуулийн заалтыг агуулгаар нь дахин сэргээж Үндсэн хуулийн холбогдох заалтыг зөрчсөн байна гэсэн мэдээлэл ирүүлжээ.
-
2016 оны 2 сарын 15
Нийслэлийн аялал жуулчлалын салбарыг хөгжүүлж, Улаанбаатар хот 2020 он гэхэд 2 сая жуулчин хүлээж авах зорилттой “Найрсаг Улаанбаатар” хөтөлбөрийг өнгөрсөн жилээс хэрэгжүүлж эхэлсэн.Хөтөлбөрийн хүрээнд энэ жил ямар ажлуудыг хэрхэн өрнүүлэх талаар хэвлэлийн бага хурал хийж, сэтгүүлчдэд мэдээлэл өглөө. Хэвлэлийн бага хуралд нийслэлийн Засаг даргын Нийгмийн хөгжлийн асуудал хариуцсан орлогч Ц.Энхцэнгэл, Аялал жуулчлалын газрын дарга Э.Баттулга нар оролцлоо.
НИТХ-ын 2014 оны 19/24 дүгээр тогтоолоор батлагдсан “Найрсаг Улаанбаатар” хөтөлбөрт 7 үндсэн зорилтыг тавьсан ба эдгээр зорилтын хүрээнд 2016 онд 25 багц ажлыг хэрэгжүүлэхээр төлөвлөжээ. Үүнд:
Нэгдүгээр зорилтын хүрээнд аялал жуулчлалын эдийн засгийн үр ашгийг нэмэгдүүлэх, бизнес эрхлэгчдийг дэмжих бодлого, зохицуулалтыг оновчтой болгох ажлууд хийгдэнэ. Үүнд зочид буудал, дэн буудлын стандартыг шинэчлэх, нийслэл хотын албан татварын тухай хууль батлагдсантай холбогдуулан жуулчдын тоог ор/хоногоор тооцох аргачлалд шилжих, төрийн байгууллагуудаас зохион байгуулдаг олон улсын хурал, зөвлөгөөн, арга хэмжээг аялал жуулчлалын бус улиралд зохион байгуулах зэрэг зохицуулалтын ажлууд багтаж байна.
Хоёрдугаар зорилтын хүрээнд гадаад дотоодын жуулчид Улаанбаатар хотод аюулгүй зорчих, шаардлагатай мэдээлэл, туслалцааг шуурхай авах нөхцөлийг бүрдүүлэх ажлууд байна. Эмнэлгийн яаралтай тусламж үйлчилгээг иргэний харьяалал харгалзахгүй үзүүлэх нөхцөлийг нийслэл, дүүргийн эмнэлгүүдэд бүрдүүлэх, Улаанбаатар хотын жуулчны мэдээллийн төвүүдийг тогтвортой ажиллуулах, “Жуулчны мэдээллийн лавлах утас”-ны үйлчилгээг технологийн дэвшилд тулгуурлан сайжруулах, Улаанбаатар хотын үйлчилгээний газруудын хаяг, байршлын мэдээллийг Гүүгл Мэпд 3D хэлбэрээр оруулж, иргэд жуулчид гар утас, ухаалаг төхөөрөмжөө ашиглан хялбар зорчих, ойр орчмын үйлчилгээний газруудынхаа мэдээллийг авах боломжийг бүрдүүлнэ. Нийслэлийн аялал жуулчлалын эрсдэлийн менежментийн төлөвлөгөөг хэрэгжүүлнэ.
Гуравдугаар зорилтын хүрээнд гадаад, дотоодын жуулчид, иргэдэд зориулсан амралт, аялал жуулчлалын төвүүдийг байгуулж, алжаал тайлах тав тухын орчныг бий болгох ажлууд хийгдэнэ. Тухайлбал хот орчмын явган аяллын нэг гол чиглэлийг олон улсын стандартын дагуу үлгэр жишээ тохижуулах, НИТХ-аас батлагдсан Улаанбаатар хотын аяллын гол маршрутын дагуу, гудамж талбайд хийгдэх тохижилтын ажлууд багтаж байна.
Дөрөвдүгээр зорилт буюу Улаанбаатар хотыг аялал жуулчлалын зорих газар болгон гадаадад сурталчлах ажлын хүрээнд ХБНГУ, ОХУ, БНХАУ, Япон, Хонгконг зэрэг орнуудад зохиогддог дэлхийд тэргүүлэх аялал жуулчлалын үзэсгэлэн, яармагуудад Улаанбаатар хотыг сурталчлан оролцох, олон улсын нэр хүндтэй сонин, сэтгүүл, хэвлэл мэдээллийн байгууллагатай хамтран Улаанбаатарын аялал жуулчлалын бүтээгдэхүүн, үзмэрүүдийг сурталчлах цогц ажлууд хийгдэнэ.
Тавдугаар зорилт буюу Улаанбаатар хотын онцлог, давуу талыг тусгасан, жуулчдын хэрэгцээнд нийцсэн аяллын бүтээгдэхүүн, шинэ үйлчилгээг гаргах ажлын хүрээнд Хүрэлтогоот дахь одон орон судлалын төвийг гадаад, дотоодын жуулчдад нээлттэй, аялал жуулчлалын төв болгох ажлыг эхлүүлэх, Улаанбаатар хотын нийтийн тээврээр зорчих, үзвэр, үйлчилгээний газруудад багцын үнээр үйлчлүүлэх боломжтой “Жуулчин” картыг үйлчилгээнд нэвтрүүлэх, агаарын такси үйлчилгээ нэвтрүүлэх эхний шатны ажлууд хийгдэнэ.
Зургаадугаар зорилтын хүрээнд жуулчдыг татах урлаг, спорт, олон нийтийн арга хэмжээг зохион байгуулах юм. Үндэсний их баяр наадмын үеэр жуулчдад зориулсан 7 томоохон олон нийтийг хамарсан соёл, урлагийн арга хэмжээ, бусад хугацаанд 21 соёл урлаг, спорт, аялал жуулчлалын арга хэмжээг зохион байгуулна. Эдгээрийн дотор “Даншиг наадам-Хүрээ цам”, Сонгодог урлагийн үдэш, төв талбайд зохиогддог цуврал фестивалиуд зэрэг 2015 оноос эхэлсэн жуулчдын сонирхлыг ихээр татаж буй арга хэмжээнүүд багтсан.
Долоодугаар зорилт буюу бүх төрлийн үйлчилгээнд найрсаг харилцаа, хандлагыг төлөвшүүлж хотын соёлыг дэлгэрүүлэх ажлын хүрээнд өндөр хөгжилтэй орны сургалтын хөтөлбөрөөр үйлчилгээний менежментийн сургалтууд явуулж, 2000 үйлчилгээний ажилтныг бэлтгэж мэргэшүүлнэ. Үйлчилгээний болон хотын соёлыг дэлгэрүүлэх “Инээмсэглэх Монгол”, “Найрсаг Улаанбаатар” зэрэг нийгмийн аяныг явуулна.
“Найрсаг Улаанбаатар” хөтөлбөрийг хэрэгжүүлснээр өнгөрсөн жил гадаадын жуулчдын тоо 6 хувь өссөн үзүүлэлттэй байгаа юм. Хөтөлбөрийн хэрэгжилтэд 3,4 тэрбум төгрөг зарцуулсан бол Нийслэлийн Татвар, Статистикийн газраас 20 гаруй тэрбум төгрөгийн ашигтай ажилласан гэсэн судалгааг гаргажээ гэж Нийслэлийн Аялал жуулчлалын газраас мэдээллээ.
-
2016 оны 2 сарын 15
2014 онд Эрүүл мэндийн даатгалын сангаас санхүүжилт авахаар гэрээ байгуулсан хувийн эмнэлгүүдийн жагсаалтыг ШӨХТГ-аас олон нийтэд мэдээллээ.
-
2016 оны 2 сарын 15
Дэлхийн Монгол ногоон нэгдэл ТББ-ын тэргүүн Х.Бээжин нар Засгийн газрыг шүүхэд өгөх болсноо мэдэгдлээ.
-
2016 оны 2 сарын 15
ЭЕШ-ын бүртгэл өнөөдөр өглөө 09:00 цагт орон даяар эхэллээ.
Энэ жилийн шалгалтын онцлог нь Засгийн газрын 37 дугаар тогтоолын дагуу ЕБС төгсөгч болон их, дээд сургууль, коллежид элсэгчдийн эх хэлний боловсролын чанар, хэрэглээ, иргэдийн харилцааны соёл, эх хэлний дархлааны түвшинг тогтоох, сайжруулах зорилготой элсэгчид монгол хэл, бичгийн шалгалтыг заавал өгнө. ЭЕШ-ын хариултын хуудасны загварыг өөрчилж байгаа бөгөөд хариултын хуудсыг бөглөхдөө балын харандаагаар бөглөх юм.
БСШУЯ-ны статистик мэдээллийг үндэслэн энэ жил 12 дугаар анги төгсөгчдийн мэдээллийг ЭЕШ-ын онлайн бүртгэлийн программд регистрийн дугаараар оруулсан байна. ЭЕШ-ын монгол хэл, англи хэл, орос хэлний шалгалтын агуулгад шалгуулагчдын сонсоод ойлгох чадварыг шалгах даалгавруудыг нэмж оруулна. Энэ онд төгссөн шалгуулагч төгсч буй сургуулийнхаа харьяа ЭЕШ-ын байранд шалгалт өгнө. Харин өмнөх онд төгссөн шалгуулагчид бүртгүүлэхдээ өөрийн сонгосон аймаг, хотын ЭЕШ-ын байранд шалгалт өгнө. Мөн хөгжлийн бэрхшээлтэй иргэд тусгайлан бэлтгэсэн танхимд шалгалт өгөх юм.
Шалгалтад http://eyesh.eec.mn/reg цахим хуудсаар бүртгүүлнэ. Шалгалт бүрт 5.800 төгрөг, батламж хуудас 700 төгрөг байх юм.
БСШУЯ-наас энэ сардаа багтаан нийслэлийн бүх ЕБС-иуд, зарим аймгийн ЕБС-ийн төгсөх ангийн сурагчидтай уулзаж заавар зөвлөмж өгөх ажлыг зохион байгуулах аж.
Түүнчлэн шалгалт өгөх ЭЕШ-ын байр, анги танхим, суудлын хуваарийг баталгаажуулсан хуудас зэргийг өөрийн бүртгэлийн дугаар болон нууц үгийг ашиглан 2016 оны 05 сарын 15-наас хойш www.eec.mn сайтаас хэвлэн авна.
Бүртгэл ирэх дөрөвдүгээр сарын 25-ны орой 18:00 цагт дуусах юм. Бүртгэлийн хугацаанд багтааж бүртгүүлэхийг БСШУЯ болон Боловсролын үнэлгээний төв /БҮТ/-өөс анхааруулж байна.
-
2016 оны 2 сарын 15
Нийслэлийн Онцгой байдлын газар сар шинийн баяр амралтын өдрүүдэд өндөржүүлсэн байдалд үүрэг гүйцэтгэв.
-
2016 оны 2 сарын 15
Мал амьтны гоц халдварт өвчин болох Галзуу өвчний тохиолдол гурван аймагт бүртгэгджээ.
-
2016 оны 2 сарын 15
УИХ-ын дарга З.Энхболд түүнийг хууль зөрчсөн хэмээн үзэж албан тушаалаас нь эгүүлэн татах албан тоотыг Улсын дээд шүүхэд хүргүүлсэн. Харин Улсын дээд шүүхээс түүнийг эгүүлэн татахыг зөвшөөрснөөр ийнхүү Улсын Их хурлаар хэлэлцэж эхлээд байгаа юм. Тэгвэл Ж.Амарсанаагийн хувьд “Намайг огцруулах асуудлыг УИХ-аар хэлэлцдэггүй юм. Намайг хууль зөрчсөн эсэхийг шүүх нотолно. Үнэхээр огцруулах, эгүүлэн татах асуудал яригдвал хуулийн дагуу эхлээд ҮХЦ дотроо хуралдсаны дараа Улсын Дээд шүүхэд асуудлыг хэлэлцэх ёстой” гэж хэлсэн байдаг. Тиймээс Үндсэн хуулийн цэц өнөөдөр эл асуудлаар хуралдаж байна. Цэцийн гадна Ж.Амарсанааг огцруулах ёстой гэсэн иргэд цөөнгүй байсан юм.
Ингээд иргэн Ш.Жаргалсайхантай уулзаж сэтгэгдлийг сонслоо. Тэрбээр “Ард түмний эсрэг хууль санаатайгаар гаргаж байна. УИХ-аар огцруулчихаад байхад би огцрохгүй гээд суугаад байдаг. Ийм болчимгүй үйл хийж болох уу. Түүнийг хуулийн сургууль төгссөн мэдлэг боловсролтой хүн бүр гайхаж байна. Өнөөдөр энд цуглаан болоогүй ч болоход тун ойрхон байна.Цэц нь ингээд байвал ард түмэн одоо хэнд нь итгэж явах юм бэ?. Тэд өнөөдөр арьсаа хамгаалаад байгаа юм уу. Уг нь өнөөдөр их хурал огцруулцна гэсэн биз дээ.Тэгсэн хирнээ эндээ байгаад л арьсаа хамгаалаад байх юм. Ер нь болохгүй бол үндсэн хуулийн цэцийг тэр чигт нь сольж болно шүү дээ. Үндсэн хуулийн цэцээ манах манаач нар нь ингээд ард түмний эсрэг хууль гаргаад байвал тэднийг гуйж байх алба байхгүй.
-
2016 оны 2 сарын 15
Ойрын өдрүүдэд хүйтэн байна
-
2016 оны 2 сарын 15
2016 оны 02 дугаар сарын 05-ны өдөр Канад сангийн ”орон нутгийн санаачлага” хөтөлбөрийн дэмжлэгээр тохижуулсан Төв аймаг дахь Цагдаагийн газрын уулзалт байцаалтын өрөөний нээлтийн ёслолын ажиллагаа боллоо. Нээлтийн үйл ажиллагаанд Цагдаагийн ерөнхий газрын дэд бөгөөд ДХАБГ-ын дарга, дэд комиссар Ц.Ням-Очир, Цагдаагийн ерөнхий газрын дэд бөгөөд Санхүү хангамжийн дэд дарга, дэд комиссар Д.Амарсайхан, МСТТ-н дарга, цагдаагийн хурандаа Х.Энхжаргал, Мөрдөн байцаах газрын дэд дарга, цагдаагийн хурандаа Э.Идэрцог, Аймгийн засаг дарга Д.Баярбат, аймгийн Прокурор С.Алимаа, аймгийн ШШГА-ны дарга хурандаа Ц.Алтантулга, Иргэний зөвлөлийн дарга н.Жаданбаа, ХЭҮК-ын Төв аймаг дахь ахлах мэргэжилтэн У.Чойжилсүрэн нар оролцов.
-
2016 оны 2 сарын 15
Улаанбаатар хотоос Төв аймгийн Алтанбулаг суманд золголт хийхээр явсан хүүхэд, том хүн нийлсэн 5 иргэн айлдаа очоогүй, сураггүй болсон тухай дуудлагыг өнөөдөр онцгой байдлын хэлтэс хүлээн авчээ.
Түүнчлэн тус сумын Засаг даргын Тамгын газрын даргаар ахлуулсан 3 албан хаагч, 1 автомашин, ар гэрийн 5 хүн 1 автомашин, нийт 8 хүн, 2 техник хэрэгсэлтэй эрэн хайх ажиллагааг зохион байгуулж байна.
Мөн Хан-Уул дүүргийн 11 дүгээр хороо, Богдхан уул Зайсангийн зүүн аманд ганц бие эмэгтэй төөрсөн, буцах замаа мэдэхгүй байна гэсэн дуудлагыг өчигдөр хүлээн авч нийслэлийн Аврах ангийн 6 албан хаагч, 1 техник хэрэгсэлтэй эрэн хайх ажиллагааг зохион байгуулж иргэн М /48 настай, эмэгтэй/-г Зайсангийн амны Дугуй цагаан гэдэг газраас эсэн мэнд олж ар гэрийн хүмүүст хүлээлгэн өгчээ.
