2025 оны 6 дугаар сарын 4-ний өдөр, Улаанбаатар — Монгол Улс дахь НҮБ-ын байранд Зүүн Хойд Азийн Залуучуудын Уур Амьсгалын Зөвлөлийг (Northeast Asian Youth Climate Council - NEAYCC) албан ёсоор байгуулж, нээлтийн арга хэмжээг амжилттай зохион байгууллаа.

Тус Зөвлөлийг байгуулах санаачилга нь НҮБ-ын Улс төр, энх тайвныг бэхжүүлэх газар (UNDPPA) 2021 оноос эхлэн хэрэгжүүлсэн “Futuring Peace in Northeast Asia” буюу Зүүн Хойд Азид Энх тайван ирээдүйг бүтээх тухай бүс нутгийн залуучуудын цуврал хэлэлцүүлэг, идэвхтэй оролцооны үр дүнд гарсан юм. НҮБ, Ханнс Зайделийн Сан, Монгол Улс дахь НҮБ-ын Нийгэмлэг нь Зөвлөлийг үүсгэн байгуулахад дэмжлэг үзүүлж байна. 

Нээлтийн арга хэмжээний үеэр Зөвлөлийн анхны гишүүд бүхий бүс нутгийн 10 залуу манлайлагч Улаанбаатарт цугларч, уур амьсгалын өөрчлөлтийн эсрэг бүс нутгийн залуучуудын хамтын оролцоо, шийдвэр гаргалтад дуу хоолойгоо нэгтгэх зорилготой Зөвлөлийг албан ёсоор байгуулж байгаагаа зарлаж, "Зүүн Хойд Азийн Залуучуудын Тунхаг"-ийг танилцууллаа. Энэхүү тунхаг бичиг нь бүс нутгийн уур амьсгалын тулгамдсан асуудлууд, залуучуудын оролцооны шаардлага болон цаашдын хамтын ажиллагааны чиглэлийг тодорхойлж байна.

Нээлтийн ажиллагаанд Монгол Улсын Гадаад харилцааны яамны COP17 бэлтгэл ажлын албаны дарга Тусгай үүрэг гүйцэтгэгч элчин сайд Н.Чимгүүндарь, НҮБ-ын Монгол дахь Суурин зохицуулагч Яаап ван Хийрден, Ханс Зайделийн Сангийн суурин төлөөлөгч Феликс Гленк, НҮБ-ын Улс төр, энх тайвныг бэхжүүлэх газрын Ази, Номхон далайн хэлтсийн захирал Петер Дю зэрэг хүндэт зочид оролцож, мэндчилгээ дэвшүүллээ.

Цаашид Зөвлөл нь бүс нутгийн уур амьсгалын бодлого, хамтын ажиллагаанд залуусын оролцоог нэмэгдүүлэх, туршлага солилцох, биологийн олон янз байдал, уур амьсгалын өөрчлөлт, эрчим хүчний хамтын ажиллагааны чиглэлээр залуусын санаачилгыг нэмэгдүүлэх үйл ажиллагаа өрнүүлэхээр төлөвлөж байна.

Л.Баяр