Азийн хөгжлийн банк (АХБ)-ны “Төрийн өмчийн компанийн шинэчлэл” төслийн хүрээнд “Эрдэнэс Монгол” нэгдлийн бүрэлдэхүүн компаниудын ТУЗ-ийн 70 гаруй гишүүн “Бүтээн байгуулалт: ТУЗ-ийн манлайлал-хараат бус хяналт-ил тод байдал” сэдэвт сургалтад хамрагдаж, компанийн засаглалын орчин үеийн чиг хандлага, ТӨХК-иудад түгээмэл тулгарч буй сорилт бэрхшээл, түүнийг даван туулах арга зам болон сайн засаглалыг нутагшуулах чиглэлээр мэдээлэл, арга зүйн зөвлөмж авлаа.

Тус сургалтын үеэр “Эрдэнэс Монгол” нэгдлийн гүйцэтгэх захирал С.Наранцогт хэлсэн үгэндээ, ТУЗ-ийн бие даасан, ил тод байдал, сайн засаглал нь компанийн үйл ажиллагааг сайжруулах хамгийн чухал үзүүлэлт болохыг онцлов. Түүнчлэн нэгдлийн хэмжээнд засаглалыг сайжруулах чиглэлд ТУЗ-ийн хараат бус гишүүдийн тоог нэмэгдүүлэн мэдлэг, туршлагатай ТУЗ-ийн гишүүдийг нээлттэй сонгон шалгаруулж, бүрдүүлсэн нь компанийн засаглалыг бэхжүүлэхэд эерэгээр нөлөөлж байгааг тодотголоо.

Мөн АХБ-ны төслийн зөвлөх Кристофер Рассел “Корпорацийн засаглалын чиг хандлага”, “Холдинг компаниуд-олон улсын сайн туршлага”, “ТУЗ-ийн удирдлага, хороодын эрх үүрэг, хариуцлага”, “ТУЗ-ийн гишүүдийн сонгон шалгаруулалт ба үнэлгээ” зэрэг сэдвийн хүрээнд танилцуулах илтгэл тавьж, ТУЗ-ийн гишүүдтэй нээлттэй ярилцаж, асуултад хариулав.

Компанийн сайн засаглалын гол тулгуур нь ТУЗ-ийг ур чадвар, мэдлэг, туршлагатай гишүүдээр бүрдүүлж, эдгээр гишүүд нь стратегийн зорилтуудыг хэрэгжүүлэхэд нээлттэй хамтран ажиллах, эргэх холбоо бүхий бат бөх тогтолцоог бий болгох юм гэдэгт оролцогчид санал нэгтэй байлаа.