УИХ-ын гишүүн Х.Баттулгад нэгэн хүндэтгэлтэй хүнээс талархлын захидал иржээ. Түүнийг улс төрчийнх нь хувьд биш харин шашин, буян номын үйлсэд оруулж байгаа хувь нэмрийг нь үнэлж, талархжээ.
   
   Х.Баттулга гишүүний тэргүүлдэг “Женко групп” дэлхийн дээд амжилтыг тогтоохуйц өндөр бөгөөд жуулчдын нүдийг хужирлах “Их майдар” цогцолбор байгуулахаар зэхэж байгаа юм. Төв аймгийн Сэргэлэн сумын нутагт Өгөөмөрийн аманд Богд хаан уулын энгэрт босох энэ цогцолборт Өндөр гэгээн Занбазарын бүтээсэн Майдар бурханыг 554 метр өндөртэйгээр бүтээх аж. Майдар бурхны ард дэлхийн аль ч өнцгөөс эрээд олохгүй хамгийн өндөр 108 метр цагаан гантигаар Гаадангийн суварга босгохоор төлөвлөж байгаа юм. Энэ цогцолбор хэдийгээр 2013 онд ашиглалтанд орох ч аль хэдийн бурхны шашинг хүндэтгэгчдийн анхаарлыг татаад эхэлсэн байна. Үүний нэг илрэл нь XIV Далай ламын Х.Баттулга гишүүнд хандаж бичсэн талархал юм.
    XIV Далай лам энэ цогцолборыг “ХХ зуунд Монгол, Түвдийн ард түмэн коммунист дарангуйллын дор зовж хэлмэгдэж байсан. Монгол улс энэ бурангуй үеэс салж, өөрийн шашин соёлыг сэргээн шинэчилж байгаа нь нэн талархууштай. Их Майдар төслийн үйл ажиллагааны гол хэсэг нь боловсролыг дэмижхэд чиглэсэн байна гэдгийг мэдэхэд таатай байна” хэмээн онцолжээ. Үнэхээр “Их майдар” цогцолбор нь  дэлхийн дээд амжилтыг эвдэх өндөр суваргаас гадна цэцэрлэгт хүрээлэн, сургалтын танхим, сүмтэй байх аж. Эдгээрийг хангах эрчим хүчийг нарны энергиэс авахаар ажиллаж байгаа нь бас нэгэн шинэ шийдэл болж байгаа юм.

   “Их Майдар” цогцолборын ажил өнөөдрийн байдлаар тун ахицтай явж байгаа бөгөөд Гаадангийн суварга дотор 108 мянган ширхэг алтадсан Майдар бурхан хийж, иргэдэд эзэмшүүлэх ажил ч урагштай байгаа гэнэ. Өмнө нь “Женко”-гийнхон Цонжин болдог цогцолборт өөрсдийнхөө төрхийг 10 мянган баатрын нэг болгох санал тавьж байсан. Тэгвэл энэ удаа дээрх 27 см хэмжээтэй алтадсан бурхныг хоёр хувь бүтээж нэгийг нь суварга дотор хадгалж, нөгөөг нь мөнгө төлсөн иргэдэд өгөх аж. Одоогоор хэдэн төрөгийн үнэтэй гэдэг нь тодорхойгүй байгаа юм.