Үндэсний соёл амралтын хүрээлэнг тохижуулах ажлыг удахгүй эхлүүлэх талаар мэдээлэл хийж байна. Энэ үеэр Нийслэлийн засаг даргын ахлах зөвлөх Д.Мөнх-Эрдэнэ мэдээлэл өглөө.

Тэрбээр “Үндэсний соёл амралтын хүрээлэнгийн бүтээн байгуулалтын ажлыг эрчимжүүлэх зорилгоор Нийслэлийн Засаг даргаас өргөн мэдүүлсэн саналыг Нийслэлийн иргэдийн төлөөлөгчдийн хурлаар хэлэлцэж дэмжиж, тогтоол гаргалаа. Өнгөрсөн хавар дөрөвдүгээр сард 10,2 га газар дээр хашаа буулгаж байсан. Энэ сул чөлөөтэй байгаа газраа нийслэл өөрийн мэдэлд авах шийдвэр гаргалаа. 10,2 га газар дээр нийслэлчүүдийн хүүхэд залуучууддаа зориулж ногоон байгууламж барих шийдвэр гарсан.

Мөн 2015 оноос энэ төслийн хөрөнгө оруулагчийн зүгээс нийслэлийн төсөвт жил болгон 698 сая төгрөг төвлөрүүлсэн. Олимпын гүүрний бүтээн байгуулалттай холбоотой зогссон байсан. Энэ жилээс эхлэн нийслэлийн төсөвт төвлөрүүлэх мөнгөн дүнг 800 сая төгрөг болгон нэмэгдүүлсэн. Үүнийг жил бүр төвлөрүүлнэ.

Мөн төслийн бүтээн байгуулалтын ажил өргөжиж, үйл ажиллагаа нь жигдэрсний дараа нийслэлийн төсөвт нэмэлт орлого төвлөрүүлэх ажлыг бүтээн байгуулагч талтай тохиролцож чадсан. Дараагийн чухал асуудал бол төслийн бүтээн байгуулалтын хүрээнд 2005 оноос хойш үйлчилгээний байгууллага, ногоон байгууламж баригдсан байгаа. Одоо хоёрдугаар шатны үйл ажиллагааг үргэлжлүүлэх буюу дараагийн ээлжийн ажлыг 2024 онд дуусгах чиглэлийг өглөө. Мөн бүтээн байгуулагч талтай харилцан тохиролцож чадлаа. Харилцан тохиролцсоноор тоглоомын төвүүд, үйлчилгээний байгууллага бий болох боломжтой болж байна. Хамгийн чухал шийдвэр бол хотын төвдөө 10,2 га газарт ногоон байгууламжтай болж байгаа нь маш чухал. Үүнийг Рио Тинто компанитай хамтран зохион байгуулна. Ингэхдээ Нийслэлээс төсвөөс мөнгө гарахгүй зохион байгуулахаар болсон нь чухал юм” гэв. 

Д.Батчулуун