Өнгөрөгч ням гарагт Үндэсний эрх чөлөө, тусгаар тогтнолоо сэргээн мандуулсны 113 жилийн ойд зориулсан, Ерөнхийлөгчийн цомын төлөөх барилдаан болж, Баянхонгор аймгийн Жинст сумын харьяат Улсын начин Э.Батмагнай түрүүлж, Баян-Өлгийн аймгийн Улаанхус сумын харьяат Улсын заан Б.Серик үзүүрлэв. Их шөвөгт Улсын арслан Ц.Бямба-Отгон, Улсын заан М.Лхагвагэрэл нар шалгарлаа. Бид та бүхэнд оны отгон барилдаанд түрүүлсэн Э.Батмагнайгийн энэ онд гаргасан амжилтуудыг танилцуулж байна.
Тэрбээр энэ онд хоёр түрүүлсэн.
- Үндэсний эрх чөлөө, тусгаар тогтнолоо сэргээн мандуулсны 113 жилийн ойд зориулсан, Ерөнхийлөгчийн цомын төлөөх барилдаан
- Булган аймгийн Орхон сумын харьяат, улсын заан Магсарын Гомбодоржийн нэрэмжит барилдаан
- Мөн "Хийморь" төслийн хүрээнд зохион байгуулж буй, Дэлхийн хүчтэнүүд Монгол үндэсний бөхөөрөө барилдах багийн халз барилдаанд зургаа барилдаж, зургаа давжээ.
Нэг удаа үзүүрлэсэн.
- Баянхонгор аймгийн Богд сумын 100 жилийн ойд зориулсан, Монгол Улсын улам нэмэх начин Чулууны Баасанхүүгийн нэрэмжит барилдаан
Нэг удаа их шөвөгт шалгарсан.
- Дорноговь аймгийн Мандах сумын 100 жилийн ойд зориулсан, улсын начин Алтангэрэлийн Хатансайханы нэрэмжит барилдаан
Таван удаа дөрөв давсан.
- Хилэнт эх хэмээх модон луу жилийн сар шинийн баярт зориулсан барилдаан
- Монгол улсад газрын харилцааны мэргэжлийн байгууллага үүсэж хөгжсөний 70 жилийн ойд зориулсан барилдаан
- Монгол улсад барилгын салбар үүсэж хөгжсөний 98 жилийн ойд зориулсан, "Нутгийн Буян" группийн нэрэмжит барилдаан
- Булган аймгийн Сайхан сумын 100 жилийн ойд зориулсан, тус сумаас төрөн гарсан аваргуудын нэрэмжит барилдаан
- Ардчилсан хувьсгалын 35 жил, Ардчиллын төлөөх намууд нэгдсэний 24 жилийн ойд зориулсан барилдаан
Түүний тухай баримт
Улсын начин Э.Батмагнай чөлөөт бөхийн төрлөөр чамлахааргүй амжилт гаргаж, өсвөр, залуучууд, элс, ази, армийн дэлхийн аваргын тавцанд зогссон нэгэн. Дурдахад, 2016 онд “Азийн хүүхдүүд” олон улсын хүүхдийн спортын наадмаас хүрэл медаль хүртэж байв. 2017 онд Өсвөр үеийн УАШТ болон “Монгол туургатан” хүүхдийн спортын наадмаас алт медаль хүртсэн байдаг.
2018 онд Роман Дмитриевийн нэрэмжит залуучуудын олон улсын тэмцээнээс хүрэл, Өсвөр үеийн УАШТ болон Залуучуудын УАШТ-ээс алт, Борис Будаевын нэрэмжит залуучуудын олон улсын тэмцээнээс мөнгө,
2019 онд Роман Дмитриевийн нэрэмжит залуучуудын олон улсын тэмцээн болон “Монголиа Опен” тэмцээнээс хүрэл, мөн Залуучуудын УАШТ-ий алт, 2020 онд Залуучуудын УАШТ-ий алт, О.Пүрэвбаатарын нэрэмжит тэмцээний алт, 2021 онд Залуучуудын УАШТ-ий алт, 2022 онд Азийн АШТ-ээс хүрэл, УАШТ-ээс мөнгөн медаль хүртжээ. Харин энэ онд чөлөөт бөхийн 37 дахь удаагийн цэрэг, армийн дэлхийн аварга шалгаруулах тэмцээний 125 кг-ийн жинд алтан медаль хүртсэн юм.
Тэрбээр 2001 оны нэгдүгээр сарын 12-нд Баянхонгор аймгийн Жинст суманд төрж өсжээ. Баянхонгор аймагтаа амьдарч, бэлтгэл сургуулилтаа базаадаг байв. Түүний анхны багш бол Байдрагийн хүчтэн чөлөөт бөхийн холбооны дасгалжуулагч С.Мөнхдуулах юм.
Тэрбээр, үндэсний бөхийн өсвөр үеийн УАШТ-д 16, 17, 18 насанд сүүлийн гурван жил дараалан түрүүлж ховорхон амжилтыг үзүүлж байлаа. Тухайлбал, 2017 онд 16 насны ангилалд 29 барилдаж 27 даваагаар, 2018 онд 17 насны ангилалд түрүүлэхдээ 29 барилдаж 28 даваагаар улсын хошой аварга болсон юм.
Мөн 18 насандаа Баянхонгор аймгийн баяр наадамд тав даван шөвгөрч аймгийн начин цол хүртэж байв. Үүнээс нэг жилийн дараа буюу 2020 онд Баянхонгор аймгийн баяр наадамд долоо давж үзүүрлэн Аймгийн заан цол хүртжээ.
Э.Батмагнай бөхийн өргөөнд анх 2020 онд бүх цэргийн наадмаар зодоглож, хоёрын даваанд тухайн үед аймгийн арслан цолтой байсан өдгөө улсын начин Ц.Сандагдоржид өвдөг шороодож байжээ. Ташрамд дурдахад, Э.Батмагнай нь улсын начин П.Нямжанцангийн удмын бөх юм.
Тэрбээр 2012 оноос чөлөөт бөхөөр хичээллэж эхэлсэн. Тулгар төрийн 2230, 2231, Их Монгол Улсын 815, 816, Үндэсний эрх чөлөө, тусгаар тогтнолоо сэргээн мандуулсны 110,111, Ардын хувьсгалын 100, 101 жилийн ой Үндэсний их баяр наадмын хүчит бөхийн барилдаанд Баянхонгор аймгийн Жинст сумын уугуул Энхтүвшингийн Батмагнай тав давж, Улсын начин цол хүртсэн билээ.
Л.Баяр
Сэтгэгдэл (8)