Хонконгийн тэргүүлэгч цахим төлбөрийн шийдэл нийлүүлэгч EFT Solutions Limited компани нь Монгол Улсын төлбөрийн үйлчилгээ үзүүлэгч “Бонум” ХХК болон Монголбанктай хамтран ажиллаж байгаагаа зарлаад байна. EFT Solutions компанийн eftPay төлбөр хүлээн авах үйлчилгээнд Монгол Улсын үндэсний төлбөрийн карт болох “₮” картыг холбож, ₮ картыг Хонконгийн зах зээлд нэвтрүүлэх ажлыг амжилттай хэрэгжүүллээ. Эхний ээлжинд ₮ картын лого бүхий Хонконгийн худалдаа, үйлчилгээний байгууллагуудад ₮ картыг ашиглан төлбөр хийж болно.
Монгол Улсад 2 сая гаруй “₮” карт эргэлтэд байгаа нь нийт төлбөрийн картын зах зээлийн 45 гаруй хувийг бүрдүүлж байна. Өмнө нь зөвхөн дотооддоо ашигладаг байсан “₮” картыг EFT Solutions нь “Бонум” ХХК-тай хамтран олон улсад ашиглах боломжтой болгох зорилгоор тусгайлан төлөвлөсөн цахим төлбөрийн терминалын шийдлийг боловсруулсан. Энэхүү шийдэл нь картыг төлбөрийн системд бүрэн нэгтгэж, олон төрлийн цахим төлбөрийн (EFT-POS) терминалтай холбогдох боломжийг бүрдүүлснээр хилийн чанадад ашиглах нөхцөлийг бүрдүүлжээ.
Хонконгт зорчиж буй монгол жуулчид уг картыг ашиглан төлбөр хийх боломжтой болсон нь тэдний худалдан авалтыг хялбаршуулж байна. Цаашид eftPay нь “₮” картыг Хонконгийн бусад худалдаа, үйлчилгээний байгууллагад үе шаттайгаар нэвтрүүлэхээр төлөвлөж байгаа бөгөөд энэ нь тус хотод ирэх монгол жуулчдын цахим төлбөрийн хэрэгцээг хангахад дэмжлэг үзүүлэх юм.
EFT Solutions компанийн ТУЗ-ийн дарга бөгөөд Гүйцэтгэх захирал ноён Эндрю Ло Чун-Кит хэлэхдээ: “Бид Монголбанктай цахим төлбөрийн технологийн чиглэлээр хамтран ажиллах Хонконгийн анхны түнш болсондоо баяртай байна. Энэ хамтын ажиллагаа нь Монгол Улсад дижитал шилжилтийг хурдасгах бөгөөд Хонконгийг ухаалаг хот болгох зорилтод хувь нэмэр оруулна. Мөн бид бүс нутгуудын цахим төлбөрийн системийн харилцан уялдааг сайжруулах Хонконгийн Засгийн газрын санаачилгыг дэмжиж байна. Цаашид бид олон улсын зах зээлийн боломжуудыг ашиглахын тулд гадаадын ухаалаг хотуудын төслүүдийг идэвхтэй судалж ажиллах болно” гэжээ.
“₮” картаас гадна, EFT групп нь олон улсын цар хүрээгээ тэлэхийн тулд өнгөрсөн жил Арабын Нэгдсэн Эмират улсын дижитал банктай хамтран ажиллах санамж бичиг байгуулсан бөгөөд ирээдүйд хамтын ажиллагааг өргөжүүлэхээр төлөвлөж байна.
Эх сурвалж: Financial Times
