Дэлхийн хотуудад цахилгаан скүүтэр, түрээсийн мопедын хэрэглээ нэмэгдэхийн хэрээр замын хөдөлгөөний аюулгүй байдалтай холбоотой асуудлууд гарсаар байна. Ялангуяа явган хүний зам дээрх мөргөлдөөн, анхааралгүй жолоодлогоос үүдсэн ослууд нь хотуудыг илүү хатуу зохицуулалт нэвтрүүлэхэд хүргэж эхэлсэн.
Парис хотод түрээсийн цахилгаан скүүтэртэй холбоотой нэгэн ноцтой осол гарсан. Тухайн үед скүүтэр явган хүний гарц орчимд хурдтай хөдөлж, явган зорчигчтой мөргөлдсөний улмаас хүнд гэмтэл үүссэн байна. Энэ мэт ослууд давтагдсаны дараа хотын захиргаа түрээсийн скүүтэрийн ашиглалтыг эрс хязгаарлах шийдвэр гаргажээ.
Францад ослын тоо нэмэгдэж, явган хүний аюулгүй байдалд эрсдэл үүссэнтэй холбоотойгоор дараах арга хэмжээг авч хэрэгжүүлсэн байна.
- Түрээсийн скүүтэрийн тоог хотын төвд бууруулах
- Явган хүний зам дээр хөдөлгөөн хийхийг хориглох
- Тодорхой бүсэд скүүтэрийн үйлчилгээг зогсоох
Харин Сингапур улсад түрээсийн скүүтэрийн асуудлыг хориглохын оронд технологиор хянах системээр шийдвэрлэсэн байна.
Тухайлбал, бүх скүүтэрийг GPS-ээр тоноглож бодит цагт байршлыг хянадаг болсон бөгөөд явган хүний зам, хориотой бүс рүү ороход систем автоматаар хурдыг бууруулж эсвэл төхөөрөмжийг зогсоодог байна. Мөн хэрэглэгчийг гар утасны апп-аар бүртгэж, хариуцлагатай ашиглалтыг хянадаг болсон.
Үүнээс гадна камер болон хиймэл оюун ухаанд суурилсан хяналтын сүлжээг өргөн ашиглаж, замын хөдөлгөөний зөрчлийг илүү хурдан илрүүлэх боломж бүрдүүлсэн байна.
Ийнхүү Франц болон Сингапурын туршлагаас харахад түрээсийн скүүтэрийн асуудлыг нэг нь хэрэглээг хязгаарлах, нөгөө нь технологиор хянах гэсэн хоёр өөр чиглэлээр шийдвэрлэж байна.
Эдгээртэй харьцуулахад манай улсад цахилгаан скүүтэрийн хэрэглээ хурдацтай нэмэгдэж байгаа ч зохицуулалтын тогтолцоо бүрэн төлөвшөөгүй, хяналтын технологи болон бүртгэлийн системийн хөгжил эхний шатандаа явж байна.
Иймээс цаашид Монгол Улсад олон улсын туршлагыг харгалзан үзэж, хяналтын технологийг нэвтрүүлэх, мөн хэрэглээний тодорхой дүрэм журам бий болгох шаардлага нэн шаардлагатай байна.
