Төв Лаосын Сайсомбун (Xaisomboun) мужид болсон агуйн осол олон улсын анхаарлын төвд байна. татсаар байна. Алт хайхаар орсон долоон иргэн хүчтэй бороо, хөрсний нуралтын улмаас үерт автсан агуйд гацсанаас хойш аврах ажиллагаа хэд хоногийн турш үргэлжилж байгаа юм.

Тэд тавдугаар сарын 20-нд уулын бүс дэх агуйд орсон ч гэнэтийн аадар бороо орж, агуйн гарц шавар, чулуугаар бөглөрөн усанд автжээ. Аврагчид тавдугаар сарын 27-нд долоон хүний тав нь амьд байгааг илрүүлсэн боловч үлдсэн хоёр хүн одоо хүртэл сураггүй хэвээр байна. Амьд олдсон хүмүүс агуйн аман хэсгээс ойролцоогоор 300 метрийн гүнд, уснаас арай өндөр хадархаг тавцан дээр бөөгнөрөн байжээ.

Аврах ажиллагаанд Лаос, Тайландын багууд төдийгүй Франц, Австрали, Индонез, Япон зэрэг орны мэргэжлийн агуйн шумбагчид нэгдсэн байна. Тэдний дунд 2018 онд Тайландад хөвгүүдийн хөлбөмбөгийн багийг агуйгаас аварсан ажиллагаанд оролцож байсан туршлагатай шумбагчид ч багтжээ.

Аврагчдын мэдээлснээр агуйн нөхцөл туйлын хүнд байгаа аж. Ус шавартай, харагдах орчин бараг байхгүй тул нэгэн шумбагч “кофен дотор шумбаж байгаа мэт” хэмээн дүрсэлсэн байна. Нарийн хонгил, тогтворгүй ханан бүтэц, хүчилтөрөгчийн хомсдол нь ажиллагааг улам эрсдэлтэй болгожээ. Иймээс аврагчид ус соруулах төхөөрөмж ажиллуулж, хүчилтөрөгчийн баллон дотогш зөөвөрлөн, аюулгүй гарц гаргахыг оролдож байна.

Тавдугаар сарын 29-нд аврагчид анхны хүнийг агуйгаас амжилттай гаргаж чадсан нь том ахиц болсон. Шаварт дарагдсан, туйлдсан байдалтай гарч ирсэн тэр хүнийг эмнэлгийн хяналтад шилжүүлжээ. Гэвч агуйн дотор дөрвөн хүн үлдсэн, мөн сураггүй хоёр хүнийг хайх ажиллагаа зэрэгцэн үргэлжилж байна. Ойрын өдрүүдэд дахин бороо орох төлөвтэй байгаа нь аврах ажиллагааг улам хүндрүүлэх эрсдэл дагуулж байгаа бөгөөд аврагчид цаг хугацаатай уралдан ажиллаж байна.

Л.Баяр