Монголын хөрөнгийн зах зээл дэх хөрвөх чадварыг нэмэгдүүлэх зорилготой тусгай хөтөлбөрийн хүрээнд МХБ өнөөдөр (2026.06.12) "Тэнгэр Капитал ҮЦК" ХХК-ийг зах зээл үүсгэгчээр бүртгэж, холбогдох хамтын ажиллагааны гэрээнд гарын үсэг зурлаа.
Зах зээл үүсгэгч нь үнэт цаасны арилжаанд худалдан авах, худалдах үнийн саналыг тогтмол байршуулж, арилжааны идэвхийг дэмжих, захиалгын биелэлтийг сайжруулах, зах зээлийн хөрвөх чадвар болон үнэ тогтоолтын үр ашгийг нэмэгдүүлэх чиг үүрэгтэй оролцогч юм.
Ингэснээр "Тэнгэр Капитал ҮЦК" ХХК нь энэхүү тогтолцоонд нэгдсэнээр зах зээл үүсгэгчийн үйл ажиллагааг өргөжүүлэх чиглэлийг нэг алхам урагшлуулж байна.
“Монголын хөрөнгийн бирж” ХК-иас хэрэгжүүлж буй "Хөрөнгийн зах зээлийн хөрвөх чадварыг нэмэгдүүлэх тусгай хөтөлбөр"-т зах зээл үүсгэгчийн тогтолцоог хөгжүүлэхээс гадна үнэт цаас зээлэх-зээлдүүлэх орчныг бүрдүүлэх, арилжааны өртгийг бууруулах, шинэ бүтээгдэхүүн, үйлчилгээ нэвтрүүлэх, индексийн хөгжлийг дэмжих, зах зээлийн мэдээллийн ил тод байдал, хүртээмжийг нэмэгдүүлэх зэрэг арга хэмжээнүүд багтаж байгаа аж.
Хөтөлбөрийг хэрэгжүүлэгч талуудын мэдээлснээр, цаашид зах зээлийн оролцогч байгууллагуудтай хамтран хөрвөх чадварыг нэмэгдүүлэх бодлогын шинэчлэлүүдийг үе шаттай хэрэгжүүлж, хөрөнгийн зах зээлийн үр ашиг, идэвхжил болон хөрөнгө оруулагчдын оролцоог нэмэгдүүлэхэд анхаарч ажиллах юм.
