2026 оны хөлбөмбөгийн ДАШТ-ий шөвгийн 16-гийн хамгийн драмтай тоглолтуудын нэг Аргентин, Египетийн хооронд өрнөж, дэлхийн аваргууд 0:2-ын хүнд байдлаас эргэн ирэн 3:2-оор ялалт байгууллаа.
Тоглолтын эхний хагас Египетийн шигшээ багийн давамгайлал дор өрнөв. Тэд хамгаалалтаас довтолгоонд хурдан шилжиж, боломжуудаа үр дүнтэй ашигласнаар Яссер Ибрахим, Мостафа Зико нарын гоолоор хоёр бөмбөгийн тэргүүллийг авсан юм. Аргентины хувьд эхний үед Лионель Месси торгуулийн цохилтоо алдсан нь тэдний байдлыг улам хүндрүүлсэн.
Гэвч завсарлагааны дараа Аргентины шигшээ огт өөр дүр төрхтэй талбайд гарч ирэв. Бөмбөг эзэмшилт, довтолгооны хэмнэлээ эрс нэмэгдүүлсэн тэд эсрэг багийн хамгаалалтад тасралтгүй дарамт үзүүлж эхэлсэн юм.
Тоглолтын төгсгөл хэсэгт хамгаалагч Кристиан Ромеро тооны харьцааг ойртуулж, улмаар ахлагч Лионель Месси тэнцээний гоолыг оруулснаар тоглолтыг нэмэлт цагт шилжүүлэв. Харин нэмэлт цагт Энцо Фернандес шийдвэрлэх гоолыг оруулж, Аргентин 3:2-ын ялалтыг баталгаажууллаа.
Энэ ялалт Аргентины хувьд зөвхөн шөвгийн наймд шалгарсан амжилт бус, хүнд нөхцөлөөс эргэн ирэх сэтгэл зүй, туршлага, аваргын зан чанараа дахин харуулсан тоглолт боллоо.
Харин Египетийн шигшээ хэдийгээр тэмцээнийг өндөрлүүлсэн ч дэлхийн аваргуудыг тун хүнд байдалд оруулж, зоригтой, зохион байгуулалттай тоглолтоороо хөгжөөн дэмжигчдийн талархлыг хүлээлээ. Ингэснээр Аргентин шөвгийн наймд Швейцарын шигшээ багтай хүч үзэх эрхтэй болж, дэлхийн аваргын цомоо хамгаалах дараагийн алхмаа хийхээр боллоо.
Л.Баяр
