Украины Ерөнхийлөгч Владимир Зеленский тус улсын армид ОХУ-ын нутаг дэвсгэрт хийх алсын тусгалт дроны цохилтыг эрс нэмэгдүүлж, өдөрт 1,000 дрон ашиглах зорилт тавьжээ. Энэ нь одоогийн өдөрт дунджаар 300 гаруй дрон ашиглаж буй түвшнээс гурав дахин өсгөсөн үзүүлэлт юм.

Зеленский наймдугаар сарын 28-ны орой хийсэн мэдэгдэлдээ, Украины батлан хамгаалах салбарын үйлдвэрлэлийн хүчин чадлыг нэмэгдүүлэх шаардлагатайг онцолж, “өдөрт 1,000 дрон” гэсэн тодорхой зорилт тавьснаа хэлсэн байна. Түүний үзэж буйгаар одоогийн үйлдвэрлэлийн хэмжээ ОХУ-ын цэргийн болон стратегийн объектуудад үзүүлэх дарамтыг нэмэгдүүлэхэд хангалтгүй ажээ. Украин сүүлийн саруудад ОХУ-ын газрын тос боловсруулах үйлдвэр, түлшний агуулах, ложистикийн төв зэрэг стратегийн ач холбогдолтой объектуудыг алсын тусгалт дроноор тогтмол онилох болсон. Киев эдгээр цохилт нь Оросын цэргийн хангалт болон түлшний нийлүүлэлтэд хүндрэл учруулж байгаа гэж үзэж байна.

Энэ мэдэгдэл Оросын талаас Украинд хийж буй агаарын довтолгоо эрчимжсэн үед гарч байна. Сүүлийн өдрүүдэд Оросын дрон, пуужингийн цохилтын улмаас Киев болон бусад хотод орон сууц, агуулах, дэд бүтэц эвдэрч, хүний амь эрсэдсэн байна.

Украин мөн зөвхөн довтлох дроны үйлдвэрлэлээ нэмэгдүүлэхээс гадна Оросын “Shahed” зэрэг нисгэгчгүй онгоцыг сөнөөх тусгай зориулалтын сөнөөгч дронуудын үйлдвэрлэлийг зэрэг хурдасгах зорилт тавьжээ.

Харин Украины алсын тусгалт цохилт нэмэгдэхийн хэрээр Москвагийн хариу арга хэмжээ болон барууны орнуудтай холбоотой эрсдэл нэмэгдэх төлөвтэй байна. ОХУ өмнө нь Украин Британийн нийлүүлсэн Storm Shadow пуужинг ашиглан Оросын нутаг дэвсгэрт цохилт өгч байгаатай холбогдуулан Их Британийн цэргийн объектуудыг онилох боломжтой гэж анхааруулж байсан.

Ийнхүү Украины дроны дайны шинэ зорилт нь одоогийн хэмжээнээс гурав дахин их буюу өдөрт 1,000 хүртэлх алсын тусгалт дрон ашиглах явдал болж байна. Энэ нь Оросын газрын тос, эрчим хүч, ложистикийн дэд бүтцэд үзүүлэх дарамтыг улам нэмэгдүүлэх зорилготой алхам юм.

Л.Баяр