Украины Ерөнхий прокурор Руслан Кравченко улс төрийн шалтгаанаар албан тушаалаасаа огцрох хүсэлт гаргаснаа мэдэгдлээ. Тэрбээр энэ шийдвэрээ албан тушаалыг улс төрийн тэмцлийн хэрэгсэл болгохыг хүсэхгүй байгаатай холбон тайлбарлав. Кравченко есдүгээр сарын 7-ны орой Telegram хуудсаараа дамжуулан Ерөнхийлөгч Владимир Зеленский болон Украины парламентад огцрох хүсэлтээ хүргүүлснээ мэдэгдэж, хүсэлтийг нь хүлээн авахыг уриалжээ.

Түүний огцрох шийдвэр Украины Прокурорын ерөнхий газрын өндөр албан тушаалтнуудыг хамарсан авлигын шинжтэй хэргийг мөрдөн шалгах ажиллагаа эхэлсэнтэй холбоотойгоор гарч байна. 

Украины Авлигатай тэмцэх үндэсний товчоо (NABU) болон Авлигатай тэмцэх тусгай прокурорын газар (SAPO) өнгөрсөн долоо хоногт Прокурорын ерөнхий газрын албан тушаалтнуудтай холбоотой мөрдөн шалгах ажиллагаа явуулж, хэд хэдэн байранд нэгжлэг хийсэн юм. Мөрдөгчдийн мэдээлснээр тус хэрэг нь хууль бус дуудлагын төвүүдийг хамгаалж, тэдгээрээс авлига авдаг зохион байгуулалттай бүлэглэлтэй холбоотой байж болзошгүй байна.

Мөн Прокурорын ерөнхий газрын Олон улсын эрх зүйн хамтын ажиллагааны газрын орлогч дарга Сергей Кропываг баривчилсан бөгөөд түүнийг хууль бус дуудлагын төвүүдийн үйл ажиллагааг хамгаалсан, их хэмжээний хөрөнгө мөнгө угаасан хэрэгт сэжиглэж байгаа аж. Шүүх түүнд 120 сая гривен буюу ойролцоогоор 2.7 сая ам.долларын барьцаа тогтоожээ.

Кравченко өөрийгөө уг хэрэгт оролцоогүй гэж мэдэгдэж, өөрт нь холбогдуулан тавьсан буруутгалыг няцаасаар байгаа юм. Тэрбээр өмнө нь огцрох төлөвлөгөөгүй гэдгээ мэдэгдэж байсан ч хэдхэн цагийн дараа улс төрийн шийдвэр гарган албан тушаалаасаа явах хүсэлтээ гаргасан байна.

Кравченкогийн огцрох хүсэлт нь ОХУ-тай дайн үргэлжилж буй энэ үед Украины төрийн дээд шатанд гарч буй ээлжит томоохон өөрчлөлт болж байна. Сүүлийн саруудад Украины Засгийн газар болон аюулгүй байдлын салбарын өндөр албан тушаалтнуудын түвшинд мөн хэд хэдэн өөрчлөлт гарсан юм.

Л.Баяр