Парисын алдарт Эйфелийн цамхагийн ажилтнууд өнгөрсөн даваа гарагт ажил хаялт зарласны улмаас тус байгууламж түр хугацаанд хаагджээ. Ажилтнуудын эсэргүүцэл нь Энэтхэгийн хиндү шашны BAPS байгууллагын төлөөлөгчид айлчлах үеэр эмэгтэй ажилтнуудыг ажлын байрнаасаа холдуулах, тодорхой хэсэгт нэвтрэхгүй байх чиглэл өгсөн гэх асуудалтай холбоотой байна.
Уг маргаан өнгөрсөн бямба гарагт болсон 100 орчим хүний бүрэлдэхүүнтэй хувийн айлчлалын үеэр үүссэн байна. Төлөөлөгчид нь Францын Парис хотын ойролцоо шинэ хиндү сүм нээсэнтэй холбоотой арга хэмжээнд оролцож байсан BAPS буюу Bochasanwasi Akshar Purushottam Swaminarayan Sanstha байгууллагынхан байжээ.
Эйфелийн цамхагийг ажиллуулдаг SETE компанийн мэдээлснээр, BAPS-ийн төлөөлөгчид айлчлалыг эмэгтэйчүүдтэй харилцах харилцааг аль болох хязгаарласан байдлаар зохион байгуулах хүсэлт гаргасан байна. Үүний дагуу зарим эмэгтэй ажилтныг ажлын байрнаас нь холдуулж, зарим постод эрэгтэй ажилтнаар орлуулсан аж. Мөн төлөөлөгчид цамхагт байх хугацаанд эмэгтэй ажилтнуудыг тодорхой хэсгээр нэвтрэхгүй байх чиглэл өгсөн байна.
Эйфелийн цамхагийн ажилтнууд уг шийдвэрийг хүйсээр ялгаварлан гадуурхсан үйлдэл хэмээн үзэж, эрс эсэргүүцжээ. Тэд эмэгтэй ажилтнуудыг “хүйсийнх нь улмаас ажлаас нь хойш тавьж, орлуулж, харагдахгүй болгох” мэргэжлийн заавар өгсөн нь хүлээн зөвшөөрөх боломжгүй гэж мэдэгдсэн байна.
Энэ асуудлын дараа Парисын эрх баригчид шалгалт эхлүүлжээ. Парис хотын захирагч Эммануэль Грегуар ажилтнуудын бухимдлыг ойлгож байгаагаа илэрхийлж, уг явдлын нөхцөл байдлыг яаралтай шалгуулахаар болсон байна. Францын улс төрийн зарим өндөр албан тушаалтнууд ч эмэгтэй, эрэгтэй хүмүүсийг тэгш эрхтэй байх зарчим Францын үнэт зүйлсийн нэг гэдгийг онцолжээ.
Харин BAPS байгууллага болсон явдалд харамсаж байгаагаа илэрхийлж, “учирсан аливаа сэтгэл зовнил, хүндрэлд” уучлал хүссэн байна. Тус байгууллагын тайлбарласнаар, төлөөлөгчдийн тоо олон байсан тул бусдад хүндрэл учруулахгүй байх зорилгоор айлчлалыг Эйфелийн цамхагийн багтай хамтран зохион байгуулсан бөгөөд хэнийг ч цамхагт нэвтрэхийг хориглоогүй гэж мэдэгджээ.
Эйфелийн цамхагийн захиргаа ажилтнуудтай уулзсаны дараа тус байгууламжийг мягмар гарагт дахин нээхээр болсон байна. Харин энэ хэрэг шашны зан үйл, соёлын онцлогийг хүндэтгэх шаардлага болон Францын жендэрийн тэгш байдлын зарчмын хоорондын заагийн талаар улс даяар маргаан дагуулж эхэлжээ.
Л.Баяр
