“Паркаа аварья” гэдэг шиг “Тусгаар тогтнолын талбайгаа аварья” гэсэн нэртэй хөдөлгөөн тун удахгүй мэндлэх яриа түгж эхлэв. Учирыг лавлаж асуувал ийм хөдөлгөөн байгуулж Тусгаар тогтнолын талбайн нэрийг өөрчилж хуучин Ялалтын юмуу эсвэл Эрх чөлөөний талбай гэсэн нэрийг сэргээх гэнэ. Бас гол хэсэгт нь байгуулсан “Тусгаар тогтнолын хөшөө”-ний хувь заяаг ч гэсэн дараагийн ээлжинд шийдэж магадгүй сураг гарлаа.

Энэхүү ээлжит ажиллагааг ШӨХТГ-ын дарга О.Магнай санаачилсан мэдээлэл байна. Уг нь түүнийг тун сайн ажиллаж байгааг олон нийт мэднэ. Тиймээс талбайтай зууралдах завгүй гэж бодтол үнэн болоод явчихлаа. Учир нь тэрээр Тусгаар тогтнолын талбайн нэрийг өөрчлөх асуудлаар “Ардчилсан хувьсгалын салшгүй нэг хэсэг болсон талбайн нэрийг өөрчилсөн нь яав ч зөв зүйл биш. Эрх чөлөөнийхөө нэрийг эргүүлэн өгөхийг уриалж байна. 2010 онд МАН-ийн нөхдүүд Тусгаар тогтнол болгон өөрчилсөн юм” хэмээн байр сууриа илэрхийллээ. Ийнхүү Тусгаар тогтнолын талбайг аврах хуучин нэрийг нь өөрчлөх, Тусгаар тогтнолын хөшөөний асуудлыг давхар ярих шинэ давалгаа үүсэх нь тодорхой болчихлоо.

Үнэхээр Ялалтын талбай гэж алдаршсан нэрийг нь 2010 онд Тусгаар тогтнолын талбай гэж өөрчилсөн нь үнэн юм. Тухайн үеийн хотын дарга Г.Мөнхбаярын санаачилгаар Монголын төрт улс үүсэн байгуулагдсаны 2220, Их Монгол Улсын 805, Үндэсний эрх чөлөөний хувьсгалын 100, Ардын хувьсгалын 90 жилийн ойд зориулан НИТХ 2009 онд ийм шийдвэр гаргажээ. Тэгээд уг талбайг хоёр үе шаттай шинэчлээд 2010 оноос эхлэн Тусгаар тогтнолын талбай гэх болжээ.

Ингэж нэрлэх шалтгаан бас байжээ. Хамгийн анх 1911 оны Үндэсний эрх чөлөөний хувьсгалын жагсаал цуглаан уг талбайд өрнөсөн байна. Дараа нь 1921 оны долдугаар сард Д.Сүхбаатарын журамт цэргүүд,  Зөвлөлтийн улаан армийнхан мөн л энэ талбайд цуглаж нэгдээд одоогийн Сүхбаатарын талбай руу хөдөлж явсан түүхтэй аж. Тиймээс л Ялалтын хэмээн тодотгох болжээ. Хожим нь буюу 1990 оны Ардчилсан хувьсгалын гол цуглаан бас л энд болсон юм. Хувь заяаны тохиолоор ч юмуу эсвэл далдын ямар нэгэн сэжмээр ч юмуу улс орны тусгаар тогтнол, томоохон өөрчлөлтүүдтэй холбоотой бүхий л жагсаалууд энэ талбайгаас эхтэй байдаг аж. Ийм учраас л Тусгаар тогтнолын талбай хэмээн нэрлэхээр шийджээ.

Одоогийн Тусгаар тогтнолын талбай нь нийтдээ 6400 ам дөрвөлжин талбайтай. Нийслэлийн хоёр дахь том талбай. Уг талбайг 2010 онд нэг тэрбум орчим төгрөгөөр шинэчилж голд нь хөшөө барьж, усан оргилуур хийж тохижуулсан. Ийм түүх, хөрөнгө оруулалттай Тусгаар тогтнолын талбайн нэрний асуудал дараагийн шинэ сэдэв болохоор боллоо. О.Магнайгийн санаачилж буй энэ асуудал ихээхэн дуулиан дагуулах нь гарцаагүй. Гэхдээ уг асуудлыг ШӨХТГ биш НИТХ шийдэх ёстой гэнэ.

“Паркаа аварья”, “Тусгаар тогтнолын талбайгаа аварья” хөдөлгөөн, санаачилгууд үр дүнгээ өгөх юм бол ийм төрлийн хөдөлгөөнүүд газар авч мэдэх юм. Учир нь МУИС-ийн хичээлийн хоёр дугаар байрны үүдэн дэхь том талбай Оюутны талбай байсан. Одоо нэг буланд нь том барилга бариад машин зогсоол болсон. Удахгүй оюутнууд “Талбайгаа аварья” гэсэн дараагийн хөдөлгөөнөө өрнүүлэх байх.  Үүний зэрэгцээ Хүүхдийн урлан бүтээх төвийн хойд талын орон сууцуудыг буулгах “Хүүхдийн урлан бүтээх төвөө аварья”, гадаадын зочид ирэхэд төрөөс мөнгө гаргахгүй төрийн буудалтай болохын тулд “Чингэс”, “Баянгол”, “Улаанбаатар” зочид буудлуудаа аварья, талхны үнийг буулгахын тулд “Талх чихэрээ аварья”, махаар хавар болгон дутахгүйн тулд “Мах импексээ аварья” хотынхоо иргэдийг цэвэр сүүгээр хангахын тулд “Сүү компаниа аварья”, наадмаа тухтай үзэхийн тулд ойр орчмын айлуудыг нүүлгэж газраа чөлөөлөх “Цэнгэлдэхээ аварья”, шатахууны үнийг өсгөхгүйн тулд “НИK-ээ аварья” хүүхдийн найрамдал зуслангийн ойролцоох айлуудыг нүүлгэх “Найрамдал зуслангаа аварья”, баялагтаа эзэн байхын тулд “Оюутолгойгоо аварья” гэх мэт үй түмэн хөдөлгөөнүүд бий болж, эцэс төгсгөлгүй тэмцэл өрнөх эхлэл чимээгүйхэн тавигдаж байна. Үр дүнд нь бид юунд хүрэх вэ?