МУ-ын Ерөнхийлөгч Ц.Элбэгдоржийн зарилгаар МУ-ын Ерөнхийлөгч асан Н.Энхбаяр суллагдлаа.

МУ-ын Ерөнхийлөгч Ц.Элбэгдорж түүнд уучлал үзүүсэн нь олон асуудлыг араасаа дагуулах нь тодорхой боллоо. Юуны өмнө Ерөнхийлөгчийн уучлалыг МАХН-ын гишүүд ч, Н.Энхбаяр ч, түүний гэр бүлийнхэн ч таатай хүлээж авсангүй. О.Баасанхүү, З.Баянсэлэнгэ тэргүүтэй гишүүд “энэ бидний хүсэн хүлээж байсан зүйл биш” гэж шууд ил тод мэдэгдэв.

Эх сурвалжийн мэдээлж байгаагаар бол МУ-ын Ерөнхийлөгчийн уучлалыг Н.Энхбаярт Шүүхийн шийдвэр гүйцэтгэхийнхэн очиж сонсгожээ. Тэгэхдээ бичлэг хийсэн байна. Үүнээс өмнө намынх нь зарим УИХ-ын гишүүд түүнд өглөө дуулгасан учир бэлтгэлтэй байсан бололтой. Харин Ерөнхийлөгчийн уучлалыг сонссон Н.Энхбаяр “би уучлалыг биш цагаатгалыг хүсэж байна” хэмээн мэдэгджээ. Гэвч Шүүхийн шийдвэрийнхэн гарч явж. Бас хамгаалалтаа буулгаж. Удалгүй МАХН-ынхан Н.Энхбаяр даргынхаа өрөөнд ээлж дараалан цугларч баяр хөөр болжээ. Намынхаа гишүүдэд хандаж Н.Энхбаяр сэтгэл өвтгөм үг хэлж. Тэрээр “Хүнд хэцүү бүхий л үед хамтдаа байсанд баярлалаа. Маш хэцүү үеийг тууллаа. Та бүхнийхээ хүчээр ийм шийдвэр гаргууллаа. Бидний улс төрийн зам одоо л эхэлж байна. Та бүхний ачийг мартахгүй. Бүгдээрээ улс орныхоо шударга ёсны төлөө зүтгэнэ. Хэлмэгдэлийг биеэрээ амслаа. Таслан зогсооно. Би Ц.Элбэгдоржоос уучлал, өршөөлийг хүсээгүй. Зөвхөн цагаатгалыг хүсэж байсан. Цагаатгуулахын төлөө дахин нэг тэмцэл бидний өмнө бий. Хамтдаа энэ хүртэл явсан юм. Цааш явж чадна. Хүний чанарыг танилаа” гэсэн утгатай үг хэлж зарим гишүүдийнхээ нулимсыг бөмбөрүүлсэн гэж эх сурвалж мэдээллээ. Тэгээд Н.Энхбаяр би эндээс гарахгүй. Цагаатгатал нь хэвтэнэ гэж мэдэгджээ. Харин намынхан төдийгүй гэр бүлийнхэн нь түүнийг ятгасан байна. Цагаатгаталд хугацаа орно. Эхлээд биеэ эмчлүүлэхгүй бол болохгүй. Эрүүл явбал улсын наадам үзнэ гэсэн үг бийг сануулж. Тэгээд удтал ярилцсаны эцэст энэ удаадаа гарахаар шийджээ. Харин дараа нь цагаатгуулах тэмцлээ эхлүүлнэ гэж тохиролцжээ.

Н.Энхбаярт цагаатгуулах гэж зүтгэх шалтгаан бий. Хэрэв тэр дахиж улс төрд орохыг хүсэж байгаа бол цагаатгуулах ёстой. Учир нь УИХ, Ерөнхийлөгчид нэр дэвшихэд ямар нэгэн ял шийтгэлгүй байх ёстой гэсэн хуулийн заалт бий. Тиймээс улс төрд эргэн ирэхийн тулд цагаатгалыг хүсэж байгаа хэрэг. Магадгүй тэр хэзээ нэгэн цагт цагаатгуулж байж л салахаар зан чанартай хүн гэж тун ойрынх нь хүн тайлбарлав.  

Ийнхүү Н.Энхбаярын дараагийн алхам, улс төрийнх нь тэмцэл цагаатгал болж хувирлаа. Тэр уучлал хүлээн авах өдрөө л ийм шийдлийг гаргаж. Өөрөө ч ингэж хүсч байж. Тэр одоо болтол өөрийгөө хэлмэгдүүлсэн, буруугүй “улс төрийн хоригдол” байсан хэмээн бодсоор байна.