БНХАУ-ын дарга Си Зиньпиний айлчлалын үеэр Ялтан шилжүүлэх гэрээг баталгаажуулсан. Энэ гэрээний дагуу эхний ээлжинд 14 хүнээ шилжүүлж авахаар хүсэлт тавьсан байгааг албаныхан онцоллоо.

Харин дараа дараагийн хүмүүс нь хурдан хугацаанд хүсэлтээ гаргаж, замын зардлаа шийдсэн тохиолдолд шилжүүлэх авчрах алхамуудыг хийх нь ээ.

Монголын талаас бол БНХАУ, Хонконг, Макаод ял эдэлж байгаа 41 хүнээ бүгдийг нь шижлүүлэн авах хүсэлтэй байгаа ч зарим тохиолдолд  хүмүүжигчид тэндээ ял эдлэх сонирхолтой байдаг гэнэ. Мэдээж энэ нь тухайн хүний сонирхол, хүсэлтэй холбоотой ч ийм тохиолдолд тухайн ялтныг албадан авчрахгүй гэдгийг албаны хүмүүс хэлээд байна. 

Монголдоо ирэхгүй гэсэн ялтнуудын хувьд тэндэхийн шоронг Монголын шоронгоос нөхцөл байдал дээр гэж үздэг аж. Харин нөгөө хэсэг нь богино хугацааны ял авсан байдаг учир суллагдаад тэндээ ажиллаж хөдөлмөрлөх сонирхолтой байдаг байна.
Ер нь БНХАУ-д цаазын ял л аваагүй бол хар тамхи, хулгайн хэрэг гээд ямар ч төрлийн гэмт хэрэгт холбогдсон хүмүүсийг авчирж болох учир өөрсдөө хүсэлтээ гаргаж, зардал мөнгөө шийдэх л чухал юм байна.

Юутай ч гэрээ хийгдсэнээс 30 хоногийн дараагаар бодит алхамууд хийгдэх бөгөөд энэ хугацаанд хүмүүжигчдийн ар гэрийнхэн зардлын мөнгөө бэлдэх хэрэгтэй гэдгийг сайдын зүгээс ч онцлоод байна.  Харин шилжүүлэх  ажлыг Тахарын алба хариуцах нь ээ.

Дашрамд дурдахад, ялтан шилжүүлэх гэрээнд БНХАУ-ын талаас тавьсан гол шаардлага нь “Манай талаас шилжүүлж авсан хүмүүсээ хорихгүйгээр ял завшуулахгүй байх”, “Эх орондоо шилжүүлж авсаныхаа дараа манай шүүхээс ийм ял өгөх нь шударга гэж үзээд өгсөн ялыг нь өөрийнхөөрөө өөрчлөхгүй” гэдэг шаардлага аж. Тиймээс авчирсан ялтнуудаа тус улсын шүүхийн шийдвэрт тусгасан хугацаатайгаар нь шилжүүлж авах юм байна.
Өөрөөр хэлбэл, тэнд хэчнээн жилийн ял авсан энд тэр ялаа л эдлэнэ гэсэн үг юм.