БОНХЯ-ны Төрийн нарийн бичгийн дарга Ж.Батболд, БНХАУ-ын Ойн үндэсний хорооны орлогч дарга Жан Ян Лонг тэргүүтэй төлөөлөгчидтэй өнгөрсөн баасан гаригт уулзаж, ойн салбарыг хөгжүүлэх, цөлжилтөөс урьдчилан сэргийлэх, зэрлэг ан амьтан хамгаалах болон мазаалай баавгайн амьдрах орчныг сайжруулах, тоо толгойг нь нэмэгд үүлэхэд дэмжлэг үзүүлж, хамтран ажиллахыг хүсэв. Тэрбээр “Хятад улс панда баавгайг өсгөн үржүүлж, байгальд нь нутагшуулсан. Тэр ч байтугай дэлхийн байгаль хамгаалах байгууллагын бэлгэ тэмдэг болгосон арвин туршлагатай.

Бид дэлхийд 20 гаруйхан үлдээд байгаа мазаалай баавгайгаа та бүхний туршлага, хамтын ажиллагааны хүрээнд өсгөн үржүүлэх боломжтой гэж үзэж байгаа. Тиймээс панда баавгайг өсгөж үржүүлсэн Сычуань мужтай хамтарч ажилламаар байна” гэв. БНХАУ-ын Ойн үндэсний хорооны орлогч дарга Жан Ян Лонг “Зэрлэг ан амьтныг хамгаалах нь дэлхий нийтийн үүрэг. Бид пандаг үржүүлэхдээ бусад орны туршлага, дэмжлэг авч байсан. Тиймээс мазаалай баавгайг өсгөн үржүүлэхэд хамтран ажиллахдаа таатай байх болно. Бидний хамтын ажиллагаа удахгүй ажил хэрэг болно гэдэгт итгэлтэй байна” гэлээ.

БОНХЯ-ны Төрийн нарийн бичгийн дарга Ж.Батболд ирэх сард БНХАУ-д айлчлах бөгөөд тэр үеэр хамтын ажиллагааны төсөл хөтөлб өр үүдээ ажил хэрэг болгох аж.